منتديات بنوته - عرض مشاركة واحدة

02-06-2012, 06:35 PM

اليوم الثاني
في الديره

قامت هند صلت الفجر طلعت من الغرفه طقت على خالد علشان يقوم لصلاة شافته طالع على الدرج راجع من المسجد

هند / صباح الخير

خالد/ صباح النور والسرور والجو بالديره يرد الروح

هند / ايه شفت اسطبل الخيول والحديق الي وراء البيت

خالد / لا قالو لك البيت بيتي اتحرك بكيفي الحين قبل لانزل طلبت من غاده تسوي لي طريق علشان اروح للمسجد

هند / وينها غدويه

خالد / تحت

هند / خلودي وش رايك نفطر عن الخيول الحديقه هناك

خالد / وجداتك

هند / يقومن يصلن وبعدها ينامن ويقومن على تسع بنزل عندهن بحط خبر انكم موجودين يمكن يجلسن معنا

خالد / اجل بنزل الروح للاسطبل انا وغاده وانتي لخلصتي من جداتك تجيبين فطورنا هناك

هند / طيب

نزلت مع خالد دخلت عند جداتها لقتهن نايمات طلعت لخالد

هند / خلود جداتي نايما بنروح لغاده بالمطبخ وناخذ فطورنا ونروح للاسطبل لقت غاده بالمطبخ تحوس مع الشغاله بالفطور

هند / غدويه تروحين معنا لسطبل الخيول

غاده / وواو وناااااسه احب الخيول

خالد / احلمي تركبينهم خايف عليك وعلى ولدي

هند / محد بيركب الخيل علشان خاطرك

غاده بزعل / حرام عليك تعرف من زمان بخاطري اركب خيل وانتم واعدني

خالد بحب / وعد لولدتي اركبك خيل لين تملين

غاده / ياطولها باقي كثير لين اولد

هند / تلدين بالسلامه واوعدك لتركبين خيل وانتي تعرفيني قد كلمتي

طالع خالد هند بنص عين / اش قصدك ماني قد كلمتي

هند بمزح / الي على راسه بطحى يتحسسها

ضربها خالد على راسها / هاتي فطورك جوعان ماكلت شي من بعد البيتزا

هند / كلنا مثلك ماكلنا شي بعد البيتزا

طلعو من المطبخ بالفطور بسطو فراش بالحديقه الي جنب الاسطبل جلسو يفطرون ويسولفون قامت غاده للاسطبل تتفرج فيه لحقها خالد يتفرج معها على الاسطبل اعجبته الخيول وكان ميت يركبهم قرر لدخلو داخل بيركبها مايبي يضايق غاده وهو عارف انها نفسها تركبهم

في بيت عبدالرحمن
عند غاده

قامت صلت الفجر وطلعت عند خالتها طقت الباب دخلت

غاده / خالتو انا رحلتي الساعه عشر قدموها

نوره بحزن / جهزتي اغراضك لا تنسين شي

غاده قربت منها ورمت نفسها بحضن نوره وصارت تبكي

نوره تمسح على شعرها متاثره من بكى غاده

نوره / غدويه لا تضيقين صدرين وجلس احاتك وانتي مسافره اذا مضايقك السفر ماله دلعي تسافرين

غاده رفعت راسها من حضن نوره ومسحت دموعها / خالتو بشتاق لكم ماتعود ابعد عنكم هالكثر وصارت تشاهق وكملت / خالتو ابي اشوف ماماتي مشتاقه لها شلونا سافر من غير لا تودعني وتوصيني من غير ماتحضيني والله مشتاقه لها بغيابها حسيت اني يتيمه

نوره اوجعها قلبها على غاده الكتومه مابنت ولا شكت شوقها لامها الا لما جت تسافر غصب عنها نزلت دموعها
نوره / يمه وعد مني لجت امك عندنا ثاني يوم وهي عندك لا توجعين قلبي اكثر من هو موجوع من غيابك اختك وغيابك ابي غاده القويه

دخل عليهم عبدالرحمن وانفجع وهو يشوف شكلهم

عبدالرحمن / وش فيه ليش كل الصياح

مسحت غاده دموعها ماتبي تضيق على خالها ويحس انه مقصر بحقهم

غاده / خالو بسافر الساعه عشر وهذي دموع السفر

عبدالرحمن سحبها من نوره وضمها لصدره بقوه نفسه يزرعها هي وختها بين ضلوعه هذا الي بقى من ريحة اخته الغاليه

عبدالرحمن / يبوك هذا طلبك ليه تبكين انتي تعرفين ان ضعفي دموعك انتي وختك واذا هذا كله خوف اذا تشتاقين لنا ابشري يبوك بنزورك لين تملين وهناك حبيبك فهودي تونسينه بغربته ويونسك ولا وصيك يابوك بدينك ودراستك عارفك انك قدها لانك تربيتي

رفعت غاده راسها من حضن خالها وباست راسه / ابشر يالغالي انا بنتك وتربيتك وبجيب الشهاده الي ارفع فيها براسك

نوره / يله بننزل نفطر ونتاكد من اغراضك اخاف ناسيه شي

نزلو تحت وعبدالرحمن بغرفته متسند على سريره وكل تفكيره بهند مشتاق لها وغاده بتغيب وبتغيب ريحة ساره من البيت هو يتصبر ببناتها عن غيابها نزلت دموعه

عبدالرحمن وهو يبكي على الصامت / ياليتك يالغاليه تكونين راضيه عني وفرحانه ببناتك حبيت هند وتعلقت فيها لانها تشبهك ذبحني الشوق يالغاليه وغاده بتلحقها اااااااااااااه خايف عليهن من الهواء يارب اكون قد الامانه الي تركتيها بين ايديني وصار يبكي بوجع

في بيت ام جاسم

صحى فيصل قبل صلاة الفجر حاس بقلق وتوتر من لقائه بغاده خايف من خيبة امله قرر يكون في المطار من الظهر

التفت على اخوه الي نايم طول ليله يتقلب مارتاح عارف ومتاكد انه يعاني من شي يجهله متاكد ان سبب ضيقته وهمه هند من يوم عرفها اخوه وهو كل يوم عذابه يزود

فيصل / جاسم

جاسم / خير فيصل خلني نايم

فيصل / وانت نمت علشان اخليك قوم فضفض عن الي قاهرك ومعذبك بنومك

جاسم تسند على سريره بحزن ووجع / طلقتها ارتحت

فيصل بقق عيونه من كلام اخوه / شلون طلقتها وانت تحبها

جاسم بوجع اكبر / ما شفع لي حبي عندها الا زادها تجريح فيني

فيصل / وش تغير قولي ياخوي

جاسم / حكى له كل شي

فيصل / مشكلتك ياجاسم انك حطيت نفسك معها بوضع غلط قريبه منك وبعدتها بحلفك لخالها

جاسم بوجع / هذا الي صار وقررت انساها حتى سلسالها عطيته لها مابي شي يذكرني فيها

فيصل بحزن عميق / بتقدر تنساها ياخوي اسئل مجرب

جاسم بوجع / كرامتي بعثرتها بنت عمك تدري انها كاشفه حبي لها ومتعمده تجرح فيني اعترفت انها تكرهني وصبرت عليها قلت يمكن لعاملتها بحب بتحبني كان عندي امل لكن كل يوم تزود بتجريحي عطيتها العذر بسبب فعايل ابوها حرمت نفسي منها وانا ميت على قربها لما خانتني نفسي بلحظة ضعف طلاقها كان الثمن

جاسم بحسره ووجع / المضحك ياخوي الامنيه الي من زمان انتظرها صارت لكن يا حسرة قلبي جت بالوقت الغلط

فيصل رفع حاجبه مستغرب / قول ماصرت افهمك

جاسم بوجع عميق / طلقت مصيبتي بالثلاث واعفتني عن الملايين لكن اااااااه فرحتي مبتوره لاني طلقت هند قبلها

فيصل / الله يعينك

جاسم بحسرة والم / ااااااااااااااه من وجع الي بين ضلوعي تصدق ذبحني الشوق لها تركتها تعبانه نفسي اشوفها وتطمن عليها عارف ومتاكد انها مبسوطه بفرقاي ويوم عيد عندها

فيصل / مدري اضحك ولا ابكي على حالنا وين كنا وين صرنا بسبب بنات عمك يمكن سوينا ذنب كبير بحياتنا ربي عاقبنا بحبنا لهن

جاسم بوجع وقهر / ذنبنا ان ابوهن عمنا على كثر حبي وعشقي لهند على كثر كرهي وحقدي على ابوها

كمل بغصه ومرار / تدري انها قالت ماينجبر قلب على قلب تقول ان قلبها شاخ بسبب سوات عمي بامها البنت معقده وصبت كل عقدها فيني والله كنت متحملها وبتحملها لاخر يوم بعمري لكن هي رافضه تعطيي نفسها فرصه تتقبلني دايما عمي محشور بينا

في الديره

بعد ماخلصو فطور طلبت هند من الشغاله تشيل الاغراض وتتاكد اذا الجدات صاحيات

بعد نص ساعه جت الشغاله تقول ان جداتها يسالن عنها

قامت مع غاده بيدخلون داخل عند الجدات واستغل خالد الفرصه وركب الخيل

تركت غاده واقفه براغرفة الجدات ودخلت عند جداتها بتحط خبر عن وجود غاده ماتبيهن ينحرجن او يتفاجان

قربت من جداتها وباست راسهن

الجده ام راشد / يمك وينك من امس ماشفناك نمنا مابعد جيتي

هند / كنت اتمشى مع جاسم انت كيفكن

الجده ام موضي / البارح سرت علي رجالاتي

هند / سلامتك يالغاليه انا جايبه مع ضيوف يبون يسلمون عليكم

ام راشد / حياك وحيا الله ضيوفك ناديهم يمه اسلم عليهم وقولي لشغاله تسوي فطور وقهوه وشاهي

هند بمزح / يالي عند الباب جاك الجواب

دخلت غاده وهي مبسوطه تحب العجائز كثير محرومه من جداتها من صغرها

قربت منهن وباست راسهن وهي تشم فيه ريحة الماضي

غاده / كيفكم

الجده ام موضي / بخير جعلك بخير بشريني عن نفسك وعن اهلك

غاده / الحمدلله كلهم بخير

الجده ام راشد / بشري عن زوجك ان شاء الله بخير

غاده / بخير وهو جاي معي برا

ام راشد اطالع بهند بعتب ولوم / هند شلون تخليه برا من غير ما نضيفه شكلك ما تعرفين السنع والمدينه مخربتك قومي ناديه وقلطيه بمجلس الرياجيل وانا بجيه

هند منحرجه من جدتها / ان شاء الله بقلطه

غاده كاتمه ضحكتها على شكل هند المصدوم من جدتها

طلعت هند من عندهم رايحه عند خالد شافته على الخيل

هند بعصبيه / انزل انت وجهك راكب خيل ومبسوط وانا اخذت تهزيئة بسبتك انزل اقلط بالمجلس لا جدتي تضربني بعصاها

خالد / هههههههه وش السالفه ليش كل الحقد

هند / جدتي هاوشتني اني ماقلطتك بمجلس الرجال وضيفتك

خالد / يحليلها جدتك تعلمي منها السنع

هند بعصبية / ادخل بسرعه المجلس تبي تقابلك

نزل من الفرس ومشى مع هند ودخلته بملحق خاص لرجال

دخل خالد وجلس على الجلسه الارضيه تركته ودخلت المطبخ طلبت من الشغاله تسوي قهوه وشاهي للحريم ولرجال

بعد ربع ساعه جهزت القهوه اخذتها عند خالد جلست جنبه الا على دخلت جدتها

ام راشد / نورت الديره وانا امك هند ماتعرف السنع مخليتنا نايمات ماخلتنا نضيفك

خالد يطالع بهند وهو يبتسم / ماجينا الا متاخر ولاحبت تزعجكم واليوم ماقصرت فطرتنا من صباح الله خير

ام راشد / الليلة عشاك عندنا ماني قابلة منك عذر

خالد منحرج / جعلك سالمه ماقصرتو ياجده وحنا اهل مكان ماله داعي للكلافه

ام راشد / انا غاصبتك ماني باخذتن رايك المهم اليلة العشاء عندنا وهذا اخر كلامي

هند اطالع بخالد المنحرج الي مايدري وش يقول

خالد منحرج / مالك الا طيبة الخاطر وقبلنا عشاك جعلك على القوه

اصرخت ام راشد على هند / قومي صبي القهوه لخوك

فزت هند من صرخة جدتها وقامت تصب القهوه لخالد الي كاتم ضحكته

جلست قريب منها وتكلم بصوت مايسمعه الا هند

خالد بابتسامه / من يصدق ان مديرتي الي قدامي تصب لي القهوة وتضيفني محدن قدي ان شاء الله انتي الي بتطبخين عشاي

هند ترص على اسنانها / اقول اطفح ذا الفنجال لفتح الدله وصبها بفمك

خالد بينرفزها / ههههههه اقول ترى بقول لجدتك كلامك شكل ماعندها تفاهم

الجده ام راشد / وش عندكم كلامكم بينكم

خالد بيقهرها / هند حالفه علي مايطبخ ذبيحتي غيرها

هند بققت عيونه من كلام خالد وبداخلها تتوعد فيه وتتحلف وخايفه ان جدتها تطلب منها تطبخ الذبيحه وهي البيضه ماتعرف تسلقها

ام راشد / بعدي بنتي هذا العشم فيك ولا يهمك انتي الي بتطبخين ذبيحته

خالد خلاص مايقدر يكتم ضحكته وجهها حمر لانه كاتم اضحكه مايقدر يضحك مستحي من ام راشد

هند بتتهرب من الطبخ / جده ودي اطبخ الدكتور مانعي اشم ريحة الطبخ

افرحت الجده وبانت تجاعيدها من تحت البرقع

ام راشد / يجعله مبارك يمه ليش ما بشرتيني ارتاحي يمه الطبخ بتطبخه الشغاله

هند مستغربه من كلام جدتها طالعت خالد الي بادلها نفس الاستغراب سكتت ماحبت تجادل جدتها قدام خالد

قامت ام راشد من عندهم ودخلت داخل بالمطبخ طلبت من ممرضتها تتصل على جاسم

عند جاسم

منسدح على سريره شاف اتصال ممرضة جدته خاف صاير لجدته او هند شي على طول رفعه سمع صوت جدته

ام راشد / الو

جاسم / هلا وغلا بالغاليه بشريني عنك

ام راشد بعصبيه / يالي ما تستحي راجع لرياض وتارك زوجتك مريضه

جاسم استغرب ان هند قايله لهم انها تعبانه

جاسم / مارجعت لرياض الا بعد ماتطمنت عليها

ام راشد بعتب / زعلانه عليك ليه ماقلت لي وانت تعرف اني بفرح بالخبر

انصدم من كلام جدته شلون بتفرح بمرض وتعب هند

جاسم مستغرب / ما بغينا نشغلك

ام راشد بفرح / هذا يوم المنى يجعله مبروك عليك

جاسم مستغرب / الله يبارك فيك يالغاليه لكن على شنو

ام راشد بفرح / هند حامل شكلها بتسويها لك مفاجعه وانا خربت عليها

جاسم بصراخ / شنووووووووو

ام راشد / هههههههه فجرت اذني مالومك فرحان منت بمصدق

جاسم بوجع والم وضيقه / ايه ماني بمصدق جده لازم اسكر عندي شغل

ام راشد / مع السلامه

سكر من جدته والتفت على اخوه بوجه مقلوب

فيصل / شنو الي منت بمصدقه

جاسم بوجع / شر البليه مايضحك تدري جدتك ليه متصله

فيصل / لاوالله وش يدريني

جاسم يضحك بحسره / هههههههه تبارك بحمل هند

فيصل بصراخ / شنووووووو من جد هند حامل طيب كيف وشلون

جاسم بجدية / انت مصدق تعرف العجائز اذا شافن الوحده تعبانه ولا مكسله ولا ترجع قالن حامل

فيصل بجدية / تدري اني صدقت انها حامل

جاسم بعصبيه وقهر/ انت مجنون من وين تحمل وهي للحين بنت مالمستها

فيصل / اجل الحق على جدتك لا تنشر الخبر ويوصل لعبد الرحمن وتصير علوم

جاسم بياس / وانا ناقص بلاوي

فيصل طالع بساعته / قوم الساعه تسع بننزل نفطر عند امي وندور حل لمشكلتك

جاسم قام من سريره دخل الحمام خذا شور على السريع طلع مالقى فيصل لبس نزل لقى امه تحت وجنبها فيصل

جاسم / السلام

وقرب من امه وباس راسها

ام جاسم / شخبارك يوليدي وجهك موعاجبني

جاسم بخير/ لا تحاتيني تعبان من السفر

الفطور جاهز قم انت واخوك افطرو

في بيت عبدالرحمن

صحت قبل الفجر تتاكد من اغراضها سكرت شناطها وطلعتهم بالصاله طلعت لها لبس ساتر عباره عن بنطلون فضفاض وبلوزه لتحت الركبه مع اشارب بتلبسه اول ماتوصل هناك حطتهم بشنطه صغيره بتكون بيدها

طلعت بالصاله كان البيت هادي الكل نايم تمددت على الكنب الي بالصاله تشغل نفسها بالتلفزون تنتظرهم يصحون لصلاة الفجر بتبقى معهم لين وقت سفرها

وهي جالسه نزل محمد الي بيوصلها عند فهد وبيرجع في نفس اليوم

قرب منها وهو متاكد انها شايله هم البعد والغربه

محمد / السلام الحلو صاحي بدري

غاده بحزن / انتظركم تصحون ابي اقعد معكم اطول وقت قبل لا سافر

محمد / الي يسمعك يقول بتهاجرين مكان مافي اتصالات

غاده رمت نفسها بحضن محمد وهي تبكي / حمودي يادب بشتاق لك

محمد / وانا بشتاق لك وبشتاق لطولة لسانك

غاده وهي مازالت دافنه راسها بصدر اخوها تركها على راحتها

محمد / وش رايك مدامك صاحيه بدري اندور انا وانتي بشوارع الرياض باقي ثلاث ساعات على الصلاه

رفعت راسها من صدر اخوها وعيونها حمراء من الصياح / فديتك حمود ياليت اشم هواها قبل لا اتركها

محمد بحب / وهي بتفقدك قومي البسي عباتك وانا بغير لبس وبنزل

رجعت لغرفتها لبست عباتها فوق بجامتها مالها خلق تبدل وتحوس ترتيب الشنط لان كل غراضها بالشنطه غير لبس السفر

طلعت بالصاله جلست على الكنب دقائق ونزل محمد قامت مسكها بيدها وطلعو برا وركبو السياره بعد ثلاث ساعات من الفرفره رجعو على اذان الفجر دخلت غاده غرفتها وطلع محمد غرفته توضاء ونزل لقى ابوه وامه وعدنا جالسين عند غاده وواضح عليه متاثرين من سفرها طلعو يصلون ونوره جلست مع غاده

نوره / غدويه تاكدتي من اغراضك

غاده / ايه وطلعتهم برا علشان مانسى شي

نوره / لا اوصيك بصلاتك وحشمتك مو تقولين انا برا كل شي مسموح

غاده بحب / خالتو انا بنتك وقد ثقتكم

نوره قربت منها / داريه ومتاكد لكن وش تقولين بحرصي الزياده

غاده / فديتك وفديت حرصك

نوره / اذا احتجتي شي ولا نفسك بشي كلميني وقوللي

غاده باست نوره على راسه / من عيوني يالغاليه

نوره / انتبهي لخوك وانا كلمته ووصيته عليك يزعلك كلمي وانا اسنعه

غاده / فديته فهودي حبوب مايزعل احد الله يستر لزعله انا

نوره / الله يخليكم لبعض وتمر هالسنين بسرعه ونتجمع كلنا

غاده / امين

رجع خالها واخوانها من الصلاه جلسو سوالف يحاولون يخففون على غاده الي كل ماقرب الوقت كل ماحست بضيق

كلم محمد السواق طلب منه يجيب لهم فطور على ذوق غاده افطرو لما خلصو على الساعه تسع

محمد / يله غدويه البسي الساعه تسع يادوب نلحق

غاده بحزن / ان شاء الله

دخلت غرفتها بدلت لبست بنطلون فضفاض وبلوزه طويله لتحت الركبه ولبست صندل مريح بالحركه

طلعت من الغرف لقتهم كلهم ينتظرونها وعلى وجيهم الم وحزن على غيابها قربت من خالها وضمته بقوه وبعده خالتها ضمتها غصب على نوره نزلت دموعها الي تحاول تخفيها خلصت من نوره ضمت عدنا الي واضح انه متاثر كثير لكن طبعه كتوم مايبين مشاعره

طلعت لمحمد الي كان ينتظرها بسيارته بعد نصف ساعه وصلو المطار قبل لا تركب بالطياره كلمت الجوهره تطمن عليها وسولفت معها شوي وخبرتها انها مسافره و بعد بربع ساعه ركبوا الطياره وبعد عشر دقائق كانت الطياره في الجو

في الطياره

جالسه جنب شباك الطياره مركزه نظرها برا وجنبها كان محمد بعد ماستقرت الطياره بالجو قفلت الشباك والتفتت على اخوها

غاده / حمودي كلمت فهد يستقبلنا

محمد / ايه فرحان مره فيك تلقينه من الحين ينتظرنا
غاده / فديته مشتاقه له

محمد / ترى سجلتي بنفس جامعته

غاده بفرح / ووواو وناسه كنت شايله هم الجامعه مع فهودي خلاص بطمن

محمد / غدويه نامي واضح عليك التعب والارهاق

غاده / ايه تعبانه مدري ليه حاسه اعصابي مشدوده كاني اول مره اسافر

محمد / نامي وارتاحي لاني بنام لين نوصل البارح مانمت زين ووراي رجعه بسرعه

محمد اسند راسه على الكرسي وبعد دقائق نام غاده تتصارع مع النوم وبعد تعب نامت

في بيت عبدالرحمن

الجو بالبيت كئيب وحزين نوره من بعد ماطلعت غاده وكله تبكي وعبدالرحمن خانقته العبره حس كان روحه انتزعت منه

عدنان طلع لغرفته وقفل عليه الباب وبكى صحيح انه مع غاده كثير يتهاوشون لكنه فقدها من قبل لا تغيب دايما سهرتهم سوى دايما يسولف معها ويفتح قلبه ويشكي لها كانها صديقه وغاده ماتقصر معه تسمع له وكل ماسافرت جابت له الهدايا الي يبها وتعرف الي يحب ويكره اكثر من امه

عبدالرحمن طلع من البيت مخنوق ماله خلق يروح لشركته

يتبع