منتديات بنوته - عرض مشاركة واحدة

02-06-2012, 06:29 PM

عند نوره

جالسه بغرفتها وبيدها صورة ساره الي مخبيها عن غاده اسمعت صوت الباب يفتح لكنها مستمره تطالع بالصوره من غير لا تلتفت قرب عبد الرحمن منها وجلس بجنبها اخذ الصوره ودخلها بدرج الكمودينها لفها بجهته انصدم وهو يشوف دموعها

نوره وهي تبكي / ليش يا عبد الرحمن بعدت بنات الغاليه عني انت اكثر واحد تعرف اني اشوفها فيهن

عبدالرحمن بحزن / ادري يا لغاليه لكن الظروف اجبرتنا

نوره / هند وعرفت واقتنعت عن سبب موافقتك انها تبعد لكن غاده قولي ليه وافقت

عبدالرحمن / غاده لازم تبعد ما نبي يوصل لها فعايل ابوها مع هند انتي تعرفينها حساسه بتنهار وانا خايف عليها والسبب الثاني خايف العصابه لكتشفو كذبتنا ياذونها خليها تبعد يا لغاليه وهي سالمه احسن ما يبعدها الموت عنا

نوره بخوف / بسم الله عليها جعل يومي قبل يومهن

عبدالرحمن بحب / روحي طمنيها انك موافقه على سفرتها هي طلبت مني اطيب خاطرك وقالت مستحيل اتسافر وانتي زعلانه منها

هند بحب / فديتها غدويه بروح لها

طلعت من غرفتها نزلت تحت طقت على باب غرفة غاده ودخلت اول ما شافتها غاده ركضت لها وضمتها

غاده بحب / خالتو انتي تعرفين غلاك عندي ولا ابي اروح وانتي زعلانه

نوره بحنان / من قال اني اقدر ازعل عليك لكن تعرفين ان قلبي ما يقوى على بعدكم اولهم فهد وبعدين هند والحين انتي

غاده / خالتو كل اجازه تزوريني و ازورك تعرفين ما قدر على البعد

نوره بحب / لا وصيك على اخوك هناك وانتبهي على نفسك

غاده باست راس نوره / لا توصين حريص باهتم بنفسي وبفهود

نوره / يله بطلع انام نامي خلي السهر عنك وراك دوام ولا تنسين اسحبي اوراقك علشان ما يتاخر تسجيلك

غاده بفرح / ا ن شا ء الله و بكره العصر بودع الجوهره بروح لها في بيتها

نوره / خلي محمد يوصلك بكره ما عنده شي ولا تطولين يدوب تجهزين اغراضك وتشترين ملابس شتويه لان الجو هناك بارد

غاده / ان شاءالله

طلعت نوره من غرفة غاده ارجعت لغرفتها لقت عبد الرحمن نايم غيرت ملابسها ونامت

عند غاده

غاده بغرفتها متضايقه بسبب قرارها الي معتبرته هروب قررت تتصل على الجوهره وتقول لها قرارها

عند الجوهره

الجوهره كانت تشتغل بالمطبخ تسوي عشاء لنواف اذا جاء من الشغل شافت رقم غاده على طول ردت

الجوهره / هلا بالقاطعه

غاده / منهي القاطعه من تزوجت وهي مطنشتني صرت اكره نواف بسبتك

الجوهره / اكلتيني انا بعذري مشغوله بين زوج وبيت وجامعه والحمل متعبني انتي وش وراك من تزوجت ماجيتيني

غاده / استحي من ام نواف

الجوهره / هههههههههههه قولي غيرها انك تستحين من خالتي ماتدرين اش كثر غلاك عندها

غاده بجديه / انا قررت اسحب اوراقي من الجامعه وبكمل دراستي برا عند فهد

الجوهره بحزن / ليه الهروب يا غاده اذا تحبينه مره هو يحبك مليون مره لا تعذبينه يا غاده وتكسرينه

غاده تكابر / من قالك هالخرابيط انا بسافر علشان ماماتي ماقدر اعيش من غيرها

الجوهره / الكلام هذا قوليه لغيري لكن بكذب نفسي واصدقك

غاده / لازم اقابلك قبل لا سافر

الجوهره / الله يحيك باي وقت البيت بيتك

غاده / انا مسافره بعد يومين ووراي شغلات بسويها قبل لا اسافر

الجوهره / تعالي عندي بكره العصر يكون نواف توه طالع من البيت

غاده / خلاص بكره عندك لا وصيك بالحلى الي احبه

الجوهره / ولا يهمك ما طلبتي شي بكره لما تجيني بيكون قدامك

غاده / لازم اسكر سلمي على خالتي ام نواف والبيبي

الجوهره / ما تبيني اسلم على ناس ثانيه ووصل لهم خبر سفرك

غاده بصراخ / الجووووووووهره

الجوهره / وجع قصري صوتك اذني ابيها

غاده / تستاهلين يله مع السلامه

سكرت غاده الجوال و تفكيرها راح بعيد

عند الجوهره

سكرت التلفون وهي منقهر من غاده ليه تنكر حبها لفيصل وهو واضح وضوح الشمس وتفكر بفيصل الي عنده امل فيها وكل يوم والثاني ناشب لها علشان يسالها عنها وتشوف بعيونه العشق والحرمان لو بيدها اجبرتها على اخوها لانها متاكده محد بيسعدها كثره لكن ما باليد حيله وهي بتفكيرها سمعت صوت الجرس استغربت من الي جاي وباقي على رجوع نواف ساعه

ارسلت الشغاله تشوف من عند الباب وتفتحه وهي سرحانه بالمطبخ سمعت صوته وراها

فيصل / السلام ساعه وان ادق الجرس

الجوهره / حياك الله الاجودي عند طاريه

فيصل / اعترفي كنتي تحشين فيني قولي مع من التفت ما شاف الا الشغاله ليكون مع شغالتك

الجوهره / هههه لا كنت احش فيك مع حبيبت قلبك

فيصل لا شعوريا / غاده

الجوهره بحزن / انساها يا خوي غاده بتسافر تكمل دراستها برا ويمكن في الفتره الي بتسافر فيها تتزوج غيرك

فيصل اوجعه كلام اخته ورجعته لواقعه المرير وهو متاكد من هالشي لكن يحاول يتناساه ما قدرت اعظامه تشيله جلس على كرسي بالمطبخ

فيصل بالم / تبيني انسى روحي غاده روحي يا الجوهره حاولت اشيلها بعد الي سوته فيني وضرب على صدره بقوه لكن هذا متعلق فيها

ركضت له الجوهره ومسكت يده

الجوهره وهي تبكي / خف على نفسك يا خوي خل امي تخطب لك الريم يمكن تنسيك غاده

فيصل بوجع / لا ريم ولا غيرها بينسيني حب عمري الي من عرفتها ما شوف من الحريم غيرها مابي اظلم بنت الناس معي

فيصل بصوت كسير / طالبك وانا اخوك ابي اشوفها

الجوهره انفجعت من طلب اخوها / اسمح لي ما قدر تبيني اخون صديقتي وخليك تشوفها من وراها

فيصل قرب منها ومسك يدها وبرجاء / ارحمي حال اخوك اعتبريه اخر واهم طلب بطلبه منك تستخسرينه علي

الجوهره بالم / مامن شوفتها فايده بتضرك اكثر وبتزيد العشق والشوق بداخلك يا خوي مابي لك العذاب وشوفتها عذاب لك

فيصل بحب / انا متحمل العذاب لكن ما تسافر من غير لا شوفها اذا سافرت من غير لا شوفها هذا هو موتي

الجوهره باستسلام / سلامتك من الموت بتجيني بكره بعد العصر

اشرق وجه فيصل ونور / من الظهر وانا عندك

الجوهره حزنت على تغيره واشراق وجهه

بسبب وهم / لا تعال بعد صلاة العصر مابي نواف يلاحظ وانت تعرف نواف ضد حبك لغاده

فيصل بفرح / فكينا من نواف بجيك العصر وبجيب معي حلويات علشانها واذا ناقصك شي كلمني اجيبه لك

الجوهر طالعته بعيون حزينه / والله ما تستاهل حبك ولا احد يلاقي احد يحبه كل هالحب ويطنش

فيصل بحب / تستاهل واكثر لا تنسين قبل كل شي انها بنت عمنا

عند جاسم

بعد الي صار بينه وبين هند طلع من غرفته وركب سيارته وهو متضايق حزين على تهوره وضربه لها

رجع للبيت لقى جداته جالست جلس معهن بالجسم لكن قلبه وروحه معها نفسه يشوفها بعد ما ضربها خاف ان عمليتها تاثرت من ضربه شاف الجدات ينعسن فيهن النوم وقف

جاسم / انا طالع بنام لازم بكره الصباح اطلع لرياض وبرجع بالليل

ام راشد / يوليدي ارحم نفسك من هالمشاوير

جاسم قرب منهن وباس راسها / الي ربي كاتبه بيصير لو نايم بفراشي

طلع فوق وطلع لغرفته دخل الحمام اخذ شور ولبس بجامته وانسدح على سريره وحاس بضيقه وتانيب ضمير وخوف عليها من بعد الي صار بينهم ما شافها

عند هند

من بعد ما ضربها جاسم وهي معتكفه بغرفتها مالها خلق تشوف احد حست بالمهانه والقهر لو الجدات شافن اثار الضرب مراح تسلم من السانهن وعارفه ان كفة جاسم الرابحه

لكن مستحيل تخلي الي سواه يمر بالساهل بتخليه يدفع ثمن ضربه غالي هذي ثاني مره يضربها للحين ما هي مستوعبه شلون استسلمت له وخلته يضربها

قامت اخذت حبتين من المسكن الي فيه نسبة منوم تبي تنام وتريح جسمها ومخها من التفكير رجعت لسريرها دقائق نامت

عند فيصل

بعد ماطلع من بيت نواف ركب سيارته متجه لبيتهم دخل البيت لقى امه جالسه تنتظره

ام جاسم / وينك فيه اتصل عليك جوالك مغلق

فيصل / كنت عند الجوهره وجوالي يمكن مخلص شحنه

ام جاسم / احط لك عشاء

فيصل / تسلمين يالغاليه تعشيت

ام جاسم / وانا امك ما تدري عن اخوك

فيصل / مرني اليوم مضطر يرجع لديره

ام جاسم بخوف / ليكون جداتك ولا هند فيهم شي

فيصل / تطمني ما فيهم الا العافيه نسيتي انه معرس جديد ما يقدر على فرقى عروسه

ام جاسم بحسرة / الله يهنيه واشوف عياله

فيصل في نفسه / من وين يجون العيال من الهواء الله يكون بعونك يا خوي

فيصل / امين واصير عم اسمحي لي يالغاليه بطلع

طلع فيصل لغرفته دخل الحمام اخذ شور ولما انسدح على سريره وهو كله شوق ولهفه لبكره مشتاق يشوفها قبل لا تغيب عنه طلع اااااااه طويله تحكي عن معاناته

يتبع