وش مسهــــرك يـامــا تغـنـي مــواويــــل
ماهــو طــرب ماغـيــر وجــد وصبـابـــه

ونّــة خفــوقـــــك كـنهـا هـــادر السيــــل
واحــيــــان كـنّــــه ونّـــةٍ مـن ربـابــــــه

ارحــم خفــوقــــــك لاتزيد الغــرابيــــــل
وارحــم حنـايــا القلب من ما سطـابــــــه

قبـلــك غــدى بالحـب ركّــابــة الخيــــــل
منهـم نمــر عـدوان وجــــده غــــــدى به

ومجنــون ليلـى ذاق من حـبــه الويــــــل
واصبـــح مع العربــان فاقــد صوابــــــه

وترى الهــوى لاصــار مابـه تعاليـــــــل
تســري بك الأيــام مســـرى الذيـابــــــه

تمضـي سنينــك بين وجــد وبهـاذيـــــــل
ماتفـطــن إلا شيب راســك ســـــــرى به

وان كـان خِـلــك مقـفـي ولا بـه الميـــــل
ولا بـه أمــل ترجـيـه ولا هـــو قـرابــــه

خلّـه يروح وشف عمــرك مع الجيــــــل
تلـقـــى بديـلـــه فـيـــه حــب وذرابـــــــه

وترى الهــوى يامعــذب الشــوق والليــل
فيه الأســـى والحــــزن بالــغ نصــــابــه