منتديات بنوته - عرض مشاركة واحدة

10-20-2011, 09:37 PM

لفت عليه وهي مب منتبهه انه مركز نظره عليها ..

والتقن عيونها بعيونه الزيتونيه ..

سرحت لـ ولهه بعيونه الذبوحيه .. بس مسرع مانزلت راسها

وهي تحس بدقات قلبها ارتفعت فجأه من حطت عيونها بعيونه ..

ابتسم من حركتها وحس بشعور غريب بداخله وجنه يعرف روضه

من زمان مب جنه الا من جمن اسبوع ..

كانت تتنفس بصوت شبه مسموع وهي تقول فـ خاطرها :

انا قويـه .. انا قويـه .. مستحيل يأثر فيه هـ الفصول ..

مستحيـــل ..

( فجأه قطع عليها تفكيرها وهي تتطالع الفيصل ينش من مكانه

ويتجه نحو سيارتها ) ..

ردت عيونها على البحر وهي حتى ما اعارته اي اهتمام

وردت تفكر فـ نايف .. صعب فجأه تترك شخص عشت

وياه كل ايام حياتك وفجأه يبتعد .. اصعب شعور اللي مب ممكن

انه احد يستحمله هو " الفرقاء " ..

تذكرت كلماته لما كانو بالمستشفى .. وكان وقتها اول لقاء

بينهم من 4 سنين .. تذكر كلماته زين ..

لمـا طاحت من رمسـته ووداها المستشفـى ..

( رواضي وصوتها المبحوح المتعب :وانا اشتقتلك موت..اربع سنوات يا ابويه اربع سنوات..!

.

نايف:اوعدج ما ارح اودرج ولا لحظه ..ورب الكعبه مابودرج ..صدقيني غصب عليه سويت جيه..! )

.

اما عن الفيصل اول ما رد عيونه عن عيون روضه ابتسم وهو

يقول فـ خاطره : كانت تتطالع عليه .. معقولـــه ..

( ابتسم بـ وناسه وهو يقول ) : ولو انا الفيصل ماتباها تنعجب فيه ..

(كان بـ يضحك لو ما قطع عليه صوت غريب ..

التفت على روضه بس تفاجئ انها ما تحركت وكأنها مول مب موجوده

فـ الدنيا ) ..

نش بسرعه واتجه على سيارتها لانه الصوت كان ياي من هـ الصوب ..

فج الباب بسرعه وهو يقعد ويصك الباب .. ونزل نظره يدور على

مصدر الصوت .. [ على كثر السنين اللي تمر ولا قدرت انساك

خيالك ساكن عيوني ]

كان الفون يصيح بـ هالاغنيه والفيصل لا زال يدور ..

بسرعه مد ايده على السكن سيت وهو يرفع الفون ويطالع

على الشاشه ..

فج عيونه للاخر وهو يطالع على الشاشه بصدمـه [ أدمنت حبـكـ ]

يتصل بك ..

وبحركه سريعه ولا اراديه منه رفع الفون وهو يرد على اللي

داق .. ظل ساكت وهو يسمع الصوت الثاني يرمس ..

نايف بلهفه وندم : دخيلج يالغاليه اسمعينـي .. بقولج كل السالفه

( ماسمع رد ) وصرخ : روضـــه والله ماتعرفين شئ ..

روضه انا مستعد اتخلى عن كل هـ الدنيا الا انتي ..

دخيلج لا تفهميني غلط .. دخيلج يا الغاليه ..

صكر بسرعه وهو يتنفس بصوت مسموع ظاهر منه الغضب :

وانا اقول بـــلاها .. ظهر هـ الشي كله عسبت انها متضاربه ويا

حبيبهــا ..

آآه يا القهر وانا اللي مهتم وافكـر .. انا قلت انه السالفه تدور

حول واحد من ربعها ..

( سكت وهو يكتم الغيض اللي بداخله ) وقال بصوت حامق :

بالطقـــــــاق اللي يطقها مابا فيهـــا شي ...

انا بنفذ انتقامي وعقبها بعقهـا شرات الجلاب ..

شحقه بعد احرق عمريه ..

( فر الفون فـ السكن سيت وهو يفج الباب ويظهر وهو مندفع يبا يتهجم على

روضه برمسته المعتاده ) ..

بس فجأه وقف وهو يطالعها شقايل قاعده بهدوء وهي تتطالع

على البحر ببـرائـه .. وشعرها من جدام ظاهر ويطاير ويا الهواء ..

كانت سارحه كلياً ..

وكانها ماتحس بأي شخص حولها ..

فجأه صحت من افكارها المؤلمه وهي تلتفت بسرعه عسب تتطالع

منو ها اللي واقف ..

اول ما التقن عيونه بعيونها وطالعت انه كان يطالع عليها ويراقبها

بسرعه مدت ايدها وهي تدخل شعرها اللي ظاهر ..

( ابتسم الفيصل بسخريه وهو يقول : ماتتعب من هـ التمثيل ) ..

مشى وقعد حذالها وهو متوعد لها وقال بتهجم : منو هـ المره

اللي متضاربه وياه من ربعج ..!!

التفتت بسرعه وهي تتطالع عليه بعصبيه .. بس مسرع ما ذابن

ملامح العصبيه وردن ملامح الجمود فـ ويها وهي تتطالع

على جدام ..

ما ثواني غير تنش روضه وهي تاركته وراها ..

نش بسرعه ووقف وراها وهو يقول : ماتعيبــج كلمه الحـق ..

هاي الحقيقه يا روضه ولازم تتقبليها ..

( التفتت بسرعه على وراء وهي تتطالع عليه وملامحها الحزينه

بدت توضح جدام الفيصل ولـ اول مره فـ الحياه انصدم لما اطالع

على ويها .. وانصدم اكثر وهو يسمع صوتها المبحوح الممزوج

بنبره الحزن : الفيصـل ..

( سكتت وكملت عقبها بـ ثواني .. وبصوت مؤلم لـ اول مره

فـ حياته يسمعه ) : تعبــانه ....!!

.

,‘

.

أنتظرونـي يوم الاربـعاء بـ أذنً من الله ..!

،

‘,