منتديات بنوته - عرض مشاركة واحدة

10-20-2011, 09:36 PM

أكـــرهكم كلــــــــكم .. اكـــره كل هـ الدنيــــا .. الله ينتقم

منكم كلكم .. على كثر ما عذبتوني وكرهتوني بعيشتيه ..

يــــارب فكنــي واجتلني .. بس مابا اعيش .. مابا اعيش ..

.

( فجأه وبدون سابق انذار حست ان السياره بدت تنحرف

عن موقعها الصحيح .. وبدت تحس بألم فظيع بأيدها اليمين

اللي منجسره .. حست ساعتها قربت .. بس بحركه سريعه منها

بسرعه لفت السياره على جنب وهي ترمي راسها على الستيرنق ..

كانت تهمس بصوت مسموع : استغفر الله .. استغفر الله ..

بلاج يا روضه عمرج ما كنتي جيه .. لا تخلينهم يقضون عليج ..

انتـي اقوى .. عشتي طول عمرج وحيده ..

ماتقدرين تكملين هـ الجمن سنه ..

اذا هم تخلو عنج فـ الله وياج ..

( فجأه حست بالامل والروح تسري بصدرها من جديد ..

كان احساس هادي ينبعث وسط صدرها .. يعطيها الامل وحب

الحيــاه ) ..

.

رفعـت راسها بسرعه وهي تحس انه فيه احد قاعد يحاول يفج الباب

صحت من عالمها وهي تتطالعه جدامها مباشرتاً ..

كانت بصدمه مب مصدقه اللي تتطالعه جدامها ..

معقولــــه هو بشحمه ولحمه ..

( تأكدت لما سمعت له حسه الهادي الواثق ) : انتــي بخيـر ..!!

( غمضت عيونها وهي تلف على الجهه الثانيه جنها ماتبا تتطالع

عليه ) ..

حست انه جسمها كله تجمد من حركته وكأنه احد صب عليها

ماي ثلج .. القشعريره كانت تسري بجسمها .. والسبب الاول والاخير

لما ايده انشبكت بأيدها ..

سحبها وهو يقومها من السيت ويظهرها من السياره ..

( كانت بصدمه من مصدقه .. كان يسحبها وهي تحاول تلحقه

لانه ايدها مشبوكه فـ ايده ...

وصل لحد الجهه الثانيه من سيارتها وركبها السكن سيت ..

بسرعه توجهه لمكان السائق وهو يشغل السياره وينطلقون ..

.

( لحد احين ما رمست كانت بصدمه .. هي تعودت على جرائته

بس صج كانت محتايه احد يكون وياها ..

لانها لو قعدت دقيقه وحده بروحها كانت بتتخبـل من التفكيـر .. )

.

وقف حذال البحر وهو ينزل ويتجهه على مكانها ..

فج باب السياره وسحبها من ايدها .. ( لانه كان متأكد انها

مستحيل تنزل ) ..

وصلو لحد الشاطئ وهو يوقف بـ مكان منعزل وصعب الواحد

ينتبه لـ وجودهم ..

قعدها بـ الارض وظل هو واقف ..

( كانت مول مب موجوده فـ الدنيا .. كانت تعيش بصدمه ..

فكره نايف يتركها كانت صعبه عليها ... الشخص اللي رباها ..

الشخص اللي مستعد يضحي بنفسه لعيونها ..

الشخص الوحيد اللي طلعها من قوقعت الموت اللي كانت

تعيشها ..

حتى حمده واليازيه ما قدرن يظهرنها منها ) ...

صحت من عالمها الاليم بشكل فضيع على صوته المبحوح :

بلاج جيه مصدومـه ..!

( لفت بسرعه عليه وهي تركز عيونها عليه .. وكأنه احين بس

تنتبه لوجوده ) ..

( نزلت راسها وهي تقول ) : انا شوي وصلني هني ..!

( حست على نفسها وسكتت )

لكن فجأه حست بألم فضيع بـ ايدها المنجسره ..

مدت ايدها اليسار وهي تضغط عليها بقوه .. عسى ولعل تخف الالم

اللي تحس فيه ..

( كان مصدوم .. شـ هالسؤال اللي سألته .. ( شو وصلني هني )

وقال فخاطره : هاي مب طبيعيه احس فيها شي بس ماتبا ترمس ..

المشكله انها ماتنعرف اذا متضايجه ولا مستانسه لما اتيي ويايه ..

كل ملامحها ينمحن ويبقى الجمود منرسم فـ ويها ..

( حول نظره عليها وهو يطالعها تعتصر من الالم .. نزل راسه

وهو يطالعها زاخه ايدها المنجسره .. عرف ساعتها انها متعوره

فيها ) ...

جرب منها وهو يقعد حذالها وترك مسافه صغيره من بينهم ..

وقال بصوته الشامخ : تعورتي بأيدج ..!

( التفتت عليه مستغربه شقايل عرف انها متعوره بأيدها ..

بس مسرع ماردت نظرها لـ جدام وهي تتطالع البحر بـ هدوء

وسكينـه ) ..

( وبحركه جريئه منه مد ايده وهو يمسك ايدها المجسوره

ويتحسسها ) ..

بسرعه التفتت عليه مصدومه وركزت نظرها على عيونه ..

بس لقت نفسها تنصدم من اللي حذالها ..

توها بس تركز بـ ملامحه .. بعيونه العذاب .. حست نفسها غريقه

وسط عيونه الزيتونيه .. من ملامح ويهه الحاده و الشامخه ..

( بس مسرع ما حست على نفسها وهي ترد نظرها لـ جدام

وسحبت ايدها بكل هدوء ) ..

كان مستغرب من هدوء روضه .. لا كان بصدمه من الهدوء اللي روضه تعيشـه ..

ما صرخت عليه كـ العاده ولا تركته ولا سبته .. كانت لا تزال بـ مكانها

ولا تحركت ..

واللي كان مستغرب منه اكثر لما مسك ايدها ما سحبتها بكل قوه

وسبته .. العكس هي سحبتها من بين ايديه بكل هدوء وخفه من دون

لا تنفجر فـ ويهي شرات كل مره ..

.

حس انه فيها شي مب طبيعي .. حاول يركز بعيونها بس

ما عطته فرصه موول ..

كان يدور بخاطره شو سبب قعدت روضه ويايه لحد الحين ..!!

وماتركتني شرات كل مره .!!!

.

.

( اما عن روضه ولـ اول مره بحياتها ماتبا تترك الفيصل مب حباً فيه ..

بس لانها كانت ماتبا تتطالع ويوه الناس الثانيه ..

حست انها كرهت كل البشر ..

بس ماتدري ليش ماحست بكره اتجاهه .. غريبه تكرهه كل احد الا هو ..!

قالت فـ خاطرها : يمكن لانه الوحيد اللي مايبا منيه شي

ومتأكده انه راح يضرني فـ يوم من الايام ..

عسب جيه مب متزيغه منه ..

( سكتت وهي تغير رأيها وترد تقول ) : لا يمكن لانه هو الوحيد

اللي فهم روضه شو تبا فـ عسب جيه ما ضغط عليه ولا

رمسني ولا حتى قالي بلاج ..!

وهذا اللي انا اباه ..

( صحت من افكارها على صوته الجهور ) : روضــــــه ..!!

( ماردت بس لفت تتطالع عليه .. ومسرع ماردت عيونها لـ جدام )

عرف انها ما بترد عليه وقال : ماتبيــن ترديـن البيـت ..

( حست بأضطراب لمجرد سماعها لها الكلمه ولا اراديا قالت :

لااااا ..

( استغربت من نفسها : شقايل ظهرت منيه هـ الكلمه ..

معقوله أنـا قالت لااا ..!! ) ..

تأكدت شكوك الفيصل انه روضه فيها شي بس ماتبا ترمس ..

همست بصوتها المبحوح : نحن وين ..!

( حس الفيصل بصدمه تجتاحه .. معقوووله روضه ترمسني ..!! )

بدون احساس منه رد بلهفه عليها : نحن فـ بوظبي ..

روضه بصدمه وهي مركزه عيونها ع البحر : شو وصلني لـ بوظبي ..

ابتسم الفيصل وهو يطالع تجاوب روضه ولـ اول مره فـ الحياه :

ما ادري بس سبحان الله كنت فـ الشارع العام وانتبهت لج وتبعتج ..

ومن حظج طبعاً اني كنت موجود ..

( حست روضه وفجأه بالراحه .. حست انه كونه وياها يحسسها

بالراحه .. بس ماتدري شو سبب هـ الراحه .. بس مسرع

مابعدت هـ الفكره عن بالها وهي تقول : كلكم جيـه ..

( الفيصل ما فهم قصدها .. بس طنش وهو يقول ) :

بتقولين ( سكت فجأه ,, بس شجع عمره وهو يكمل ويقول ) : تبيني

اسألج بلاج ولا تفضلين اسكت ..!

( ردت طرف عينها ببطئ شديد وجنها ملت من كل شي بهالدنيا

وحاولت تخفي اللي فـ داخلها ) : لا تحاول تعاملني بـ هالطريقه ..

( ضحكت بسخريه ) : طول عمرك كنت تعاملني بقسوه .. ليش

احين تعاملني بطيب ..

( استغرب من ردها وتأكد انه مستحيل روضه تتغير )

ابتسم بـ مجرد انه روضه المغروره لا زالت موجوده ..

لانه يحس انها راح تكون بخير اذا كانت تحتفظ بـ روضه المغروره ..

همس بصوته العذب : انا مرتاح جيه ..

التفتت عليه وهي تتطالع عليه تبا تفهم شو يقصد بس هو كان مركز

نظره على جدام ويطالع البحر ..

ردت نظرها لـ جدام وهي تفكر بكلمته وتحاول تفهم ..

لف عليها وهو يركز عيونه عليها ويقول : روضه لا تتغيرين ..