منتديات بنوته - عرض مشاركة واحدة

10-20-2011, 09:33 PM

.
روضه وحمدوه دارن يزوي فـ كل زاويه من الفله وما لقنها ..
حتى جناح قوم مي وامل وشوق وعواش ..
حمدوه : خيبـه وين بتختفي جيه .. لاتكون راقده فـ ملحق البشاكير ..
روضه : عن الطنازه ، وتعالي بندورها برع فـ الحديقه ..
حمدوه : شووو .. برع .. منو احين يسير برع ولا يرقد بعد شو تبا تمووت من البرد
..
روضه : انتي تعالي ندورها بسرعه قبل لا ينش احد ، ولا تنش هـ النسره عواش ..
حمدوه : يلا انزين ..
لبسن البنات جاكيتات وسكارف وعقب ظهرن برع الفلـه ..
.
دورنها فـ كل شبر من الحديقه بس محـد ..
حمدوه وهي بردانه : روضوووه بموت من البرد ، خلينا نسير الفله مستحيل
يزوي تكون هني وابصم بالعشر ..
يمكن تكون فـ الملحق مال التسالي تحيدينها خريشه ..
ما اعارت رمسه حمدوه اي اهتمام ، وكانت تتفحص بعيونها وهي تمشي
على يزوي ، كانت مصره انها لازم تلقاها ..
وقعدت تمشي وهي تتلفت وتدور على يزوي ..
.
بس فجــآه صرخـــت روضه : هئئئئئئئئئئئئئئئئئئئئئئئئئئئ .. حمدووه طالعي طالعي
تحت ها الشيره ..
حمدوه بخووف صرخت : يـــــــاربي هـ الخبله شو تسوي هناك فـ هالبرد ..
( سارن حمدوه وروضه يربـعن صوب يزوي
وهن محطيات ايديهن على قلوبهن )
.
( يزوي كانت شبه متجمده ، ولا تتحرك مول ، وكان ويها وشفايفها زررق
وخشمها احمررررر من الخااطر ، وكانت متسدحه فـ العشب وهي
ضامه ايدينها وريولها ويا بعض من البرد ..)
.
روضه بخوف الدنيا وهي تهز يزوي : يزوووي يزووي انتي تسمعيني ..!!!!!؟
حمدوه : يزووووي نشي دخيلج انتي تسمعينا مب جيه ..
يزوي كانت ترتجف من البرد ومن حست فـ حمدوه وروضه فتحت عيونها
بصعوبه وقالت : هـ ـ ـا
حمدوه وهي توها ارتااحت : انتي تبيــــــــن تموتي وتموتينـــا ويااج ،
شو هـ الخباااااال ليش راقده هني ..!!!
روضه : حمدووه مب وقته البنت بتمووت ، خلينا نشلها وندفيها بسرعه
قبل لا احد ينش ..
حمدوه : انزين انزين ..
.
(سندن يزوي ويساعدنها وهي تمشي ، لحد ما وصلن فوق فـ جناحهن ) ..
.
.
( اول ما وصلن البنات الجناح على طول قعدن يدفن فـ يزوي لانها كانت
ترتجف من البرد )
حمدوه : افففف الحمد لله محد طالعنا ولا بيسون لنـا سالفه ..
روضه : يالخبـــله والله خوفتينا عليج زين ما يتني جلطه ..
شو هـ الحركات متى بتوبين انتي وبتعقلين ..
ادريبج خريشه بس مب لـ هالدرجه عاد ، وليش تسيرين
بدون لا تقولين لحد .. هاااا ..
يزوي وهي قاعده تتذكر ليش امس ظهرت واول ماتذكرت حست بنغزه فـ قلبها
بس كتمتها وقالت وهي تحاول تخفي اللي فـ داخلها : مب انا اللي سرت !!
حمدوه وتحطي ايدينها على خصرها : لا والله عيل منو اللي وداج لـ برع ..!!؟
يزوي : قلتلكن مب انا ( وتخفض من صوتها وتجرب صوب البنات) هـا الينانوه شلوني
من ايديه وريولتـي وشاتوني برع الفله .. شكلهم حتى الينانوه ما يحبوني ..
حمدوه وروضه ما رامن يمسكن عمارهن ، رغم الحاله اللي هي فيها الا انها بعدها
خبله وماتوب عن سوالفها ..
حمده : قال ريولتـي الايرانيه ..
روضه : انا اشك انج عاقل ..
حمدوه : وانا والله ..
يزوي وتسوي عمرها معصبه ومدت البوز شبرين : معليه جيه
اللي قاعد يقول لكن معاناته ، تضحكن عليه ..
روضه : اي معاناه واللي يرحم والديج اسكتي .. انتي وهـ المعاناه ..
حسستيني الدنيا ..
حمدوه : اقول يزوي سيري خذيلج شور ساخن وبيخف عنج البرد ..
روضه : هيه والله سيري ..
يزوي : انزين .. بس لا تقولن شي لحد ما ايي .. ولا اقولكن
سجلن كل اللي تقولنه فـ دفتر بالحرف الوااحد ..
حمدوه : ههههههه والخيبه كل ها عسب لا تفوتج سالفه ..
يزوي : هيه ..
روضه : ههههههه انزين سيري سيري .. وبنقول كل شي اقصد مابنقول شي
عشان خاطر يزويتنا ..
يزوي وهي تنغز روضه بنظرات : هيه صدقتج وايدات ..
حمدوه : هههههههه عاااشو وايدات الايرانيه ..
.
يزوي سارت تاخذ لها شور عسب يخف عنها البرد ..
.
روضه وهي تجرب صوب حمدوه وبهمس : حمدوه انا شاكه فـ يزوي ..!
حمدوه : تصدقين حتى اناا ..
روضه : يعني يزوي ما تسويها هـ الحركه مني والدرب اكيد مضايجها شي ..
حمدوه : ادري .. وحاسه ان فيها شي عوود ..
روضه : انزين ليش ماتقولنا يمكن نقدر نسوي لها شي ..
.
( يزوي فجت باب الحمام وطلعت راسها لـ برع وصرخت : اييييييييييه انا ماقلتلكن
لا تسولفن عنيه .. ولا ماتفهمن .. ترا احين بظهر ) ..
.
حمدوه : هههههههه والخيبه شقايل سمعتينا نحن نسولف بـ الهمس
يزوي وهي تصارخ : انا مركبه رادارات عسب اسمع كل اللي يحش فيه ..
روضه : هههههههه انزين هاا بنسكر حلوجنا وظهري بسرعه ..
.
(سكرت باب الحمام وردت تسبح ) .
.
.
.
الساعه 8:00 ص ..
الكـل كان تحت على صاله الطعام ما عدا روضه كانت فـ المطبخ
وطبعـاُ محد يدري شو تسوي ..!!
( حدرت صاله الطعام ووراها بشكارتها ميشيل وهي ماسكه الريوق
وروضه كل علامات الغضب فـ ويهـا ..
بسرعه حولت نظرها للشباب وجربت منهم وهي متجاهله كليـاً
وجود أعمامها وخالاتها ) ..
صرخت بقوووه وهي تقول : سيفـــــــــوه يا النـــــذل ...
( انفجـرو كل الشباب من الضحـك .. لانهم عارفين شو سيف مسوي
روضه بعصبيــه : بـ أي حـــــق تستخدم القلاس مالي ..!!!؟
سيف كانُ عيونه على الطاوله وكاتم ضحكته ..
تخصرت روضه وهي تقول : محد يتجـرا ( وهي تأشر على سيف )
يلمس لي ولا غرض من اغراضي غيرك انت ..
أحيــن جم مره اقولك لا تجرب صوب شي يخصنــي ..!!
عبدالباسط بلعانه : ولا بعد قاعد يتفل فوقــه ..
صــرخت روضه من سمعت رمسه عبدالباسط : سيـــــف يالحيوااان
ييــب القلاس مــــــــالي بســرعه ..
الشباب فـ الارض منفجرين من الضحك .. ( رفع منصور راسه وهو يقول :
روضه طالعي شقايل زاخنه لا يشرد ..
( حولت روضه نظرها لـ سيف اللي منزل عيونه على القلاس وكاتم ضحكته )
عبدالله يكمل على منصور : لاااا شباب دخيلكم طالعوا زاخ القلاس
بأيدينه الثنتين لا يشرد ..
( حمد يكمل : أقول سيف الوردي بين ايدينك عـذاآاآاآب )
(ضحكن البنات وهن يسمعن تعليق حمد ) ..
مشت روضه بكل عصبيه حذال سيف وسحبت من جدامه القلاس
بس وقفتها ايدين سيف وهن يحوطن على القلاس ..
( رفعت عيونها بكل عصبيه وهي تتطالع عليه .. وصرخت عليه
بكل قوتها متجاهله ابوها واهلها : سيفــــــــــــــوووووه ..
ضحك سيف وهو يقول بـ همس محد يسمعه : عيـــونه ..
روضه بعصبيـه : يحـــولن ان شاء الله ( تقصد عيونه )
الشباب ما سمعوا سيف لما قال عيونه بس لما سمعوا
تعليق روضه فهموا .. وتسدحو من الضحك على روضه اللي
شكلها من صج مقهوره من سيـف اللي يتعمد ينرفزها ..
( حاولت روضه تسحب القلاس بس ايدين سيف اقوى عنها
كتلت ايدينها وهي تسويهن كتلـه وحده .. ودحــت ( ضربت ) سيف
بقــــــووه ..
صرخ سيف من ضربتها وانفلتن ايدينه من على القلاس
سحبت القلاس بسرعه وهي تسير حذال بشكارتها وتعطيها القلاس
عسب تسير تسويلها كوفي ..
سارت مكانها وقعت بـهدوء وهي ابتسامتها تعلو فـ ويهـا ..
( الشباب ، خالاتها ، البنات ، الكل كانوا مصدومين من الحركه ) ..
فجأه وبدون سابق انذار انفجروا الشباب من الضحك ..
اما عن روضه فـ كانت فـ مكانها قاعده بكل هدوء ..
وهي تتريا الكوفي يوصـل ..
(حرك بوسالم راسه بأسى على انه مستحيل تتغيـر هـ الروضه ..
طول عمرها جريئـه .. )
رفعت عيونها وهي تتطالع على الشباب يضحكوا ويتشمتون فـ سيف ..
حولت عيونها للجانب الثاني وهي تتطالع انه مركز عيونه عليها ..
حست ولـ اول مره انها تحس بالخجل من حركاتها اللا اراديه ..
اصلاُ الضرابه اللي استوت قبل شوي كانت لا اراديه .. هي حتى
ما حست باللي حولها .. كان يطالع عليها وهو حاط ايده على خده
ويطالع عليها بنظره ما قدرت تفهمها .. ابتسمت ابتسامتها العذبه
وهي تظهر الجزء الايمن من اسنانها البيضه ..
وعقبها بسرعه حولت عيونه على سيف وهي تتطالع عليه بحقد ..
.
كان مصدوم ... مب مصدق .. هي ابتسمت لي .. معناته ..
( سكت .. ماقدر يكمل .. بس مسرع ما رد وهو يفكر شو معنى هـ الابتسامه ..)
ابتسم هزاع وهو يقول : ماتعني شي [ غير انه كل اللي بينا مجرد علاقه
اخويه ، لو مثلا كانت تحبنـ (سكت بس مسرع ما قال ) : تحبني !!
لو تحبني مستحيل تبتسم فـ ويهي أكيد انها راح تستحي ..
بس احين فهمت كل شي .. ابتسامتها ماتعني غير شي واحد ..
( انه انت اخويه وبس )..
.