منتديات بنوته - عرض مشاركة واحدة

10-07-2011, 08:37 PM

.
.
وفجهه ثانيه منصور وعبدالله ومحمد وسيف يلعبون كره طائره ..
محمد وهو يصرخ على سيف : ايييييييه فوووق ... لا لا لا فووق
سيف يصرخ : اييييه صمختنـــــــا ..
منصور نزل على الارض يضحك : ههههههه احين نحن نلعب ولا نتضارب
صرخ حمد اللي كان قاعد يطالع الـ tv : منصووووور احين بجســـــر فونك
يا اخي طفربنــا .. تعال رد على اللي يدق ..
منصور يصرخ على حمد : منو اللي داق ..؟!
حمد وهو يطالع على شاشه الفون : أحم ميم – نون والباجي مشفر
ضحكوا الشباب لانهم فهمو قصد حمد ..
منصور وهو يرفع الكـره : حطه سايلنت
حمد : مابترد عليها حرام ساعه كامله تدق ..
سيف يصرخ على حمد : ايييييه ترا صكيتنا ...خلاص بس عاد ..
قالك مايبا يرد عليها ..
محمد وعبدالله ومنصور ميتين من الضحك على سيف اللي معصب لانه مهزوم ..
.
.
هزاع يرمس عبد الباسط : شو السالفه ..؟!
عبدالباسط بهدوء : ماشي بس ربيعه منصور داقـه ..
يكون فـ علمك ( وهو يرفع عيونـه يطـالع على منصور اللي يلعب ) : ماشي بنت فـ الدولـه ما مرقمنـها
..( وضحـك .. لانه خـانه التعبير شوي خخ ) ,,!
ضحك هزاع على حركات منصور لانه شكله ما بيمرر جماله بـ هالهدوء
اكيد بيستغله فـ جذب البنات ..
بس كان توقع هزاع مب فـ محله .. لانه منصور يسوي هـ الحركات عسب يتناسى
اللي فـ داخله بـس ..
.
.
.
.
.
وبـ مكان بعيد عن الشباب كانت ميره متسدحه فـ الشبريه وهي تفكيرها
مب وياها ..
" يعني اللي انا سويته حرام .. هيه اكيد حرام ..
(مدت ايدها
على خدها وهي تتذكر مكان الطراق اللي عطتها اياه روضه )
.
وقالت : انا استاهله .. حرام اللي سويته فـ روضه انا وايد ظلمتها
ولازم احين اكفر عن ذنبي عسب ارتاح من هـ التفكير والارهاق
بس شقايل اوصل لها .. اكيد انها كارهتني وحتى ماتبا تسمع صوتيه ..
اوووووه انا بجرب بس مب احين .. باجر ان شاء الله من الصباح
بحاول ارمسها .. بس فجأه كانه احد قالها انتي بهالحركه راح
تخوني اخوج ..
وبسرعه غيرت رايها وقالت : مستحيل انزل من قدري راح انسى
السالفه .. ومع الوقت راح انسى .. انا متأكده ..
.
.
.
.
الساعه 1:00 صباحاً ..
فجت روضه عيونها بـ خوف وهي تتطالع على الحجره وجنها تبا تتمسك
بـ اي شي يقولها ان هي بالواقع ..
نشت بتعب وتسحبت لحد مانزلت من الشبريه
وعقبها سارت برع الجناح .. جربت من الغنفه وقعدت .. وردت راسها على وراء
وهي تتذكر سبب خوفها واللي استوى قبل شوي ..
كانت تتطالع بالحلم عهود تصرخ وتقول كلمات مب مفهومه
وروضه كانت تتطالع عليها وتضحك ..
.
تنهدت بـ تعب وهي تقول : آآآآه يا عهود انتي الموت كان اقرب لج
وارتحتي .. لكن انا يا عهود ما فكرتي فيـه ...
ما فكرتي فيه شقايل انا بعيش بعد ماتموتين .. عهود ارجوج
ردي .. ردي .. ( ردت لوعيها وهي تقول ) : استغفر الله يا روضه
شو هالرمسه .. موت عهود حق .. ( سكتت لفتره ) وعقب كملت
والدموع بدن ينحفرن بخدودها وبصوت أجش : بس انا اشتقت لها
وربي اشتقـــــــت لها ... آآآه يا عهود كيف ان فرقاج عذاااب ..
احس ان الموت ارحم ليه ولا هالعيشه .. ليش تركتيني ..ليــــش !!
مب كافي اللي كل يوم اعيشه ( سكتت لثواني وعقب قالت ) :
ومب بس جيه يا عهود عذابي احين عذابين .. الفيصل وايد يجرحني
وهو ما يحس واحين مب هو وبس .. احين ياب ربعه .. آآآه يا ربعه ..
(غمضت عيونها وهي تقول ) : وربيـعه الحنوون..!! ( عقب عقدت حواجبها وهي
تفكر فـ هالكلمه ) وقالت : الحنوون .. ومنو هـ الحنوون ..
وليش اول ما طالعته حسيت بشئ غريب ..
آآه ياربيه ماعدت اقوى .. انا ضعيفه ..
( وابتسمت بألم ) : .. هيه انا ضعيفه ..
الكل اول ما يطالع عليه يقول هالبنت تملك كل قوه وجبروت الدنيا
بس انا ضعيفه ( غطت ويها بـ أيدينها ودموعها تنزل بألم وهي تشهق ) :
أنـ ـ ـ ـ ــ ــا ضعيفـ ـ ــه ...
ماعدت اقوى اكثر من جيه .. انا بعد انسانه ليش الكل اول
ما يطالع عليه يقول انا قاسيه .. ليش الكل يتعمد يجرحني
.. آآه يا عهود من عقب فرقاج وااايد اشياء تغيرت .
حتى اللي من لحميـه ودمي جرحنـي .. يتحروني اني ما احس
الكل يقول اللي فخاطره وما يحس انه جرح انسانه ضعيفه
اكــره هالكلمه اكره كونـي قويه من الخارج لكن ضعيفه من الداخل ..
الكل يترجم غروري قساوه .. حتى حمدوه ويزوي جرحني يا عهود
.. ( ابتسمت بألم وهي تقول ) : قالت لي انتـي قلبج حجر ..
طول عمريه ما راح انسى هالكلمه .. ليش انه دموعي ما تنزل جدامهن
الكل يترجمه قساوه ما يدرون انه محافظه على عزة نفسي
عهود انـ ـ ــ ـ ( نشت بقوه وكأنه احد قالها خلاص ياروضه كـــــــافي ) :
انا شو قاعده اسوي ( مسحت دموعها بقوه وشراســه ) ..
وسحبت لـها شيـله وبـ سرعه ظهرت من الجنـاح كامل ..
.
نزلت تحت وهي مول مب واعيـه بـ الي تسويـه ..!
تناست انـه السـاعه 1 .. واذا استوى لها شيء محد أكيد راح يعرف ولا يحس فيـها ..
مشت بـ هدوء لحد ما وصلـت لـ باب الفلـه .. فتحته بـ هدوء ..
وهي تظهر برع ..
كانت تمشي بدون أحسـاس .. مشت ومشت ..
وفجــأه وقفت وهي تطالع وين وصلـت ..
تمتمت بـ همس : أنــا شو وصلني لـ هني ..!
التفتت بـ سرعه وهي تطـالع على الاسطبلات ..
طالعت على المكان اللي كان الفيصـل محاصرها فيـه ..
غمضت عيونـها وكأنها تبا تطرد هـ الفكره من ذهنـها ..!
.
فــجأه حست بـ حركه غريبـه وراءهـا ..
بسرعه فجت عيونـها وهي تحس بـ ريولـها تشللن ..و حتى ماقادره تتحرك ..
كانت متـأكده انه اللي وراءها يستوي مستحيـل يكون من عمل الانس ..
خـافت تلتفت وتطـالع شيء مايعيبـها ..
بس حست بـ شيء قووي بـ داخلـها يدفعها انها تلتفت ..
بسرعه التفتت عسب ماتغير رأيــها ..
أنصدمت من اللي طالعتـه .. كان ظل شخص طويـل واضـح ..
بس ملامح ويـه مب واضحـه لانه المنطقه اللي كان فيـها يسود فيها الظلام ..
حست بـ راحـه لـكونه اللي واقف من الانس ..
وكانت كل ذره فيـها تحلف أنه اللي جدامه هو الفيصـل بـ ذاته ..
.
فـجت عيونـها بـ صدمه وهي تطالعه يجرب صوبـها..
كانت تبا تشرد بس حست أنـه ريولـها متشللات ..
و كان واضـح انه يطالع عليـها ولا حرك عيونه عنـها
حست انه فـيه شيء غلط قاعد يستووي ..
بسرعه نزلت عيونـها وهي تطالع على شعرها
اللي يتعدى تحت الظهر والشيله واايد قصيره يعني جنها مب مغطيه شي موول
حاولت تتفادى الموقف ومشت بخطوات سريعه عسب تشرد عنه
بس مسرع ما قطع عليها صوته الدافئ ذو البحه القويه : من حقج تشردين
مب انتي تسوين اللي تبينه وتورطين الناس ..
( تجمدت مكانها أحين تأكدت منو اللي وراها ، ولا شو هالرمسه اللي
قاعده تسمعها " انا اللي اسوي الشي وعقب اورط الناس فيه "
وبتهجم اقوى وهو يعلي صوته الدافئ : ارتحتي احين من عقب ما فرقتيهم ..!
غمضت عيونها بقوه ودقات قلبها بدت تسرع ..!
اكثر شي بهالدنيا تكرهه الفرقا .. لانه محد حس بطعمها المر
غيرها هي ..
التفتت بسرعه مستغربه من تهجمه المباشر .. وما اهتمت برمسته مول
ولا حركت فيها شعره ..
لكن الكلمه الوحيده اللي هدتها [ فرقتيهم ] ..
قالت بصوتها المبحوح وهي تتطالع عليه : فرقتهــم .. وارتحت ..!!
شو هالرمسه اللي قاعد تقولها ..!
راكان وهو اعصابه فلتانه خلاص .. ضحك ضحكة سخريه وقال :
ماتعرفين هاا .. لا سلامتج ما قصدت اي احد ..
مب انتي بنت احمد المليالدير ومحد يروم يعاتبج ..
حقج عليه نسيت والله ..
( غمضت عيونها وجنها ما تبا تسمع رمسته )
وبدت تحس ان كل قواها بدت تخور ..
الكل يتهجم عليها بدون سبب مبرر .. وقالت بهدوء وهي تركز
عيونها بعيونه .. ( ولـ اول مره بحياتها ترفع عيونها بعيون واحد غير
الفيصـل ) : أسمعني زيـــن .. انا موول مب فاهمه شي من اللي قاعد تقوله ..
واذا عندك شي ارمس بوضوح .. واذا بس مجرد رمسه فاضيه
انا مب مستعده اخسر وقتيه عشانك ..!
أستغرب من قوتها وقال وهو معصـب : يعني ما لج ايد فـ ضرابه
الفيصــل وثاني .. مب انتي السبب اللي خلاهم يتضـاربون
( سكت لـ ثواني وعقب كمل وهو يركز عيونه بعيونها .. وبسخريه ) : آآآه
نسيت انتي مالج دخل فالسالفه .. نسيــت .. نحن السبب ..
( نزلت عيونها للارض وهي تحس ريولها مب شالتنها تحس بقوتها
اختفت .. )
ضحكت ضحكه سخريه على نفسها وقالت بألم : آآه نسيت
انه اي شي يستوي لازم اكون انا فـ ويه المدفع ..
نسيت انه اي فراق يستوي بين اثنيـن انا سببه ..
ونسيت انه مجرد كوني بنت احمد اللي الكل يطلق عليه
المليالدير ما راح يكون ويايه مشاعر شراتكم ...
ونسيت انه كوني بنت احمد ما راح تمر عليـه شرات تجاربكم ..
( غمضت عيونها بألم وهي تتذكر ) : اذا انت خيفان على علاقتك
بـ ربعك تخرب فـ صدقني ما راح تخـرب ..
لانه محد ذاق طعم الوحده شراتي انا .. ( وتأشر على نفسها )