منتديات بنوته - عرض مشاركة واحدة

07-07-2011, 06:05 AM

على الاقل ,, ونزلت لجدتها ثاني

اللي ما زال فهد عندها ومتمدد على الكنبة ومغمض عينه ,,

مرت من جنبه ولفت تشوف وش تقدر تغطيه به

فتحت دولاب جدتها وحصلت لحاف قطن خفيف ,, يالله يفي بالغرض

مدت عليه للحاف والتفت تبي تطلع الا يده تمسك يدها ارتاعت من حركته وصرخت صرخه خفيفه : خوفتني حسبتك نايم

فهد : صحيح نايم بس ريحة عطرك صحتني !!

تحركت هيفاء بسرعه من عنده ما تبي تسمع اكثر حست لو بيقول كلمة زياده يمكن تنهار قدامه ( يا قلبي يا هيفاء ))

طلعت تشوف وين جدتها لقتها في المجلس وتشوف اخبار العالم

جلست جنبها وهي بتطير من الفرح اليوم كله حلووو

ماعمرها حست بالمشاعر ذي رجفة القلب والأرتباك والأحراج

لايكون قلبي حبه لاالالاما يصير اسمح لنفسي احبه وهو بيتركني عشان عبير اللي ماتسوى

طيب وش صار اليوم ((يمكن يتسلى فيك)) ضاقت من الفكره وما بغت تخرب على نفسها فرحتها ,,

تجمعوا الجميع على الغداء والجميع سلم على هيفاء وهنوها بالسلامه

الا عبير اللي كلمتها من دون نفس

كل مرة تشوف عبير هيفاء تحسها تلفت الانظار وتغير من شكلها وطريقتها وتتذكر ان فهد يشوفها ويكلمها وش يبي بي عقبها بس لا لا لازم اسوي شي فهد لازم يظل لي نفس اول

استمر الوضع يومين اضافية في المزرعه بنفس الروتين فحست ام طلال ان القعده مالها داعي لو كانوا بالحالهم افضل لكن مع وجود المجموعه الكبيره ما حست ان فهد وهيفاء خذوا راحتهم

فكرت تقول لفهد انهم يرجعون بس ما تدري فيه شي منعها ذاك اليوم

هيفاء اغلب وقتها يا في غرفة جدتها او في غرفتها وما بغت تدخل في مشاحنات مع عبير اللي ما راح تعديها على خير

تعشوا الحريم كلهم الا عبير ومشاعل اللي كانوا مختفين عن الانظار ما ارتاحت هيفاء لهم ابد واذا ما جاوا على الاكل تاخذ راحتها فعلا

حست اليومين اللي راحت بسلام فعلي مع فهد صحيح ما يأخذ ويعطي معها بس سوى لها كم حركه تعطيها امل على قدام ,,

قالت لريما تمشي معها بعد العشاء شوي لان الجو خيالي ويرد الروح

خذت لها شال من القطن وحطته على كتفها وطلعوا من الجهة المخالفة لاتجاه الرجال

ومشوا والعنود تكلمها عن نواف وسوالف البنات اللي ماتخلص والمواقف اللي مرت بها

لين وصلوا لمكان فيه اشجار كثيفه فقالت لها ريما احسن يرجعون علشان ما يفقدونهم

رجعوا على الطريق والا الهواء يرد لهم الصوت وقفت هيفاء في مكانها ومسكت يد ريما وقالت لها بالاشاره تسكت

سمعت هيفاء صوت عبير تترجى وتصيح استغربت هيفاء من صوتها

مسكت ريما وخذت يدها واتجهت لمكان الصوت وشافتها بين الاشجار

ومعاها مشاعل والمفاجأة اللي ما توقعتها ابدا انهم يكلمون فهد وهو واقف يسمع لها وشتقول

ريما جت بتفتح فمها حطت هيفاء يدها عليها وقالت لا ,,

عبير : فهد انت لازم توقفها عند حدها ما كني بنت خالتك وما حشمتني

تصدق عاد شتقول عني اني ابي نواف هي ما تدري ان نواف يبي ريما

كفايه انك كنت بتاخذني وتركتني علشانها ,, ما يصير يا فهد وهي تصيح ودموع التماسيح تسبقها ,,

ومشاعل تأكد كلامها وتزيد شايفها حالها ومتحكمة في كل شي ومو حاسبه لأحد حساب على وشو عشان جمال بالطقاق هي اصلا مو مستوانا ومو متربيه قليلة الادب

هنااا فارت لمياء وحست بكره لهم ما ينطاق

جت صوبهم وظهرت لهم من الشجر : انتي اللي قليلة الادب يا ست مشاعل وما تربيتي الا على طولة اللسان

اما انتي يا عبير اقل كلمة بقولها لك انك صايعه تبين حد يسنعك ويلمك

وعبير تصيح شفت يا فهد

فهد : اقصري الشر يا هيفاء وروحي داخل كافي اللي جاء منك

هيفاء : الشر ما جاء الا منهم و انا متربيه غصب عنكم كلكم

فهد : الله يأخذ ذيك الساعه اللي جيتي فيها ,,,,

لمي اغراضك يالله انتي مالك قعده عندنا !!!!!!!!

ريما وهي تمسك هيفاء يرجعون للفيلا : الله يهديك يا هيفاء يعني ما كنك تعرفين عبير تبي تناحسك وترفع ضغطك وتطفشك شلون نزلتي لمستواها

هيفاء : هي اللي جابته لنفسها واخوك ما قصر بعد مصدقهم في كل اللي قالوه

اصلا يستاهل اللي يجيه والا ليش يقعد مع ناس مو محارمه وعادي

ريما : هدي يا هيفاء انتي المفروض تمسكين اعصابك مو كذا ناار وش عليك منهم ينطقون يقولون له اللي يبون هو مو مصدقهم اصلا

هيفاء : عقب هالكلام ومو مصدقهم خلاص يا ريما خلاص

ريما : هيفاء لاتاخذين على كلام فهد ,, هو يعصب بسرعه ويقط له كم كلمة بس بسرعه يرضى والله اخوي واعرفه قلبه طيب

هيفاء اللي تقلص الدمع وحست عينها ناشفه وفيها كره لهم ونار شابه في قلبها: ومن قالك اني بستنى لين يرضى ,, انا مستحيل اقعد هنا عقب كلامه ,,,,

دخلت غرفتها وريما معها وتهديها : انتي من جدك تبين تفجعين جدتي بطقاقكم انتي وفهد

هيفاء : ريما لو سمحتي انا ما عندي غير اللي قلت

فهد وهو واقف بينهم : ريما اطلعي برى ,,

ريما مستغربه جدا من فهد هو شصاير له اكيد فيه شي لا يكون حد صكه بعين

هيفاء كانت واقفه ولما شافت فهد قعدت على الكنبة وقوت نفسها بكيفه هو اللي بدى سمح لهم يتكلمون عني ويستاهلون اللي جاهم ليه يعطيهم فرصه اصلا

فهد : انا حذرتك قبل نجي هنا لكن انتي مافيك فايده اللي تبينه بتسوينه لا وتألفين من عندك قصص بعد ,, بس مو غريبه عليك هالحركات اللي قلتي كلام على لساني ما قلته ,, لا تستغربين اصدق اي شي عنك ,,,

هيفاء : والمطلوب ,,

فهد : انا مالي رغبه فيك ولولا جدتي ما خذتك لكن الحين انا ماقدر اكمل معك

احنا بنرجع للقصر بكره وبنتفاهم هناك ,,,

نزل فهد ودخل على جدته بالغرفه لما شافها مبسوطه وتشوف التلفزيون ما بغى يغثها في هالليل بس قال لها انهم بيمشون بكره الصبح

عبير ومشاعل طايرين من الفرح عشان اللي صار وتأكدوا ان اللي يبونه قرب

عبير : اسكتي يا مشاعل مدري وشلون اشكرك اخيرا ,,, اخيرا فهد بيطلقها وبنفتك ,,,

مشاعل : قلت لك يا حبيبتي اتركي كل شي علي بس انتي الله يهديك فيك قل صبر

عبير وهي ما ندري وش تسوي تقوم وتدور في الغرفه مثل الخبله فرحانه باللي صار

ما جاء فهد للغرفه وطلع للشباب وعطاهم خبر انهم بيرجعون بكره وكلم ابوه وقال له ان الشغل محتاجينهم ولازم يرجعون

هيفاء بعد ما طلع فهد خذت شنطتها ورتبت اغراضها بالكامل ولان بالها مشغول ما جاء الترتيب على الخاطر بس حاولت كل شي تحطه في مكانه المعتاد

لمت اغراضها اللي في الدرج وهي توظب الاشياء تذكرت كيف كان طريقته من كم يوم معقوله هو ذا بس ما بغت تحسف نفسها

نامت وهي ماسكه نفسها ما تبي تشكي لحالها يمكن يجي يرتب اغراضه ,,,

نامت على الكنبة ولا قامت الا وقت صلاة الفجر,,, توعت ما شافت فهد صلت ورجعت تكمل نومتها ::::,,,

جهزت نفسها بشكل رسمي ما حطت مكياج ولا شي ما نزلت ابدا من غرفتها وقت الفطور وكلمت ريما وقالت لها اذا بيطلعون للسياره تكلمها