سكتوا البنات وكل وحده سرحت في الجانبيه هيفاء كانت حاطه راسها على ورى وتفكر
ونظرتها تحكي كلام كثير
وهي تسمع كلمات الأغنيه ( ياليل خبرني عن امر المعاناه هي من صميم الذات ولا
اجنبيه ))
ما انتبهت ان فهد يشوفها في مراية السيارة ويلمحها كل شوي اول ما لاحظت نظرته
مع انه لابس نظارته الشمسيه
حركت مكانها شوي بحيث انها ما تجي على اتجاهه حست انه عرف حركتها بس بكيفه
,,,,
وصلوا للمزرعه وحصلوا سيارات الضيوف قد وصلت فهد يكلم نواف وينكم انتوا في
الخيمة والا الفيلا
فهد: اوكي
وقف السيارة عند مدخل الفيلا وجاء يفتح لجدته الباب ويساعدها تنزل ,, نزلوا
البنات
ومشوا معاهم تجاه المدخل ,,,
دخلت ام طلال وكانوا الموجودين قاعدين قاموا لها وجاوا يمها يسلمون فهد اللي
كان ماسك يدها
سلم على امه وخالته وعمته والبنات اكتفوا انهم يسلمون عليه من بعيد عبير اللي
نظراتها على فهد
تعمدت انها تصافح هيفاء بس بدون ما تكلمها ام طلال حست نفسها تعبانه من
الطريق قررت انهاتدخل غرفتها ترتاح شوي وطلبت من هيفاء تجي معها
طلع فهد للخيمة عند الشباب ويبي يشوف تجهيزات المكان للعشاء ,,
جهزت هيفاء الحمام لجدتها وحطت لها الفوط مرتبه وجهزت شرشف الصلاة حقها
مسكتها ام طلال من يدها وقالت لها : شوفي يا قلبي ترى الحريم ما يسنعهم الا
الحريم
واذا تركتي عبير تلعب على فهد انتي الخسرانه انا مو خافي علي تصرفاتها من اول
ولولا خاطر سلطانه
ان ام نايف ما تجي بيتي ثاني
هيفاء تبي تفتح فمها : يمه .....
ام طلال : انا وصيتك واسمعي وصيتي ,,, اطلعي لغرفتك تجهزي وغيري ملابسك ,,,
هيفاء ما تدري وين بتقعد وين مكانها استئذنت من جدتها وطلعت تدور ريما هي
اللي بتقولها
حصلت هدى في الطريق : كيفك يا هيفاء
هيفاء : طيبه الله يسلمك انتي وشلونك
هدى الحمدلله ,,, وراحت وحست انها رسميه مره معها ويمكن لولا فهد حتى هدى ما
عطتها وجه ما كنها عمتها
حصلت ريما تسولف مع بنات عمتهم وعبير مختفيه مو مع الحريم
هيفاء : ريما وين اغراضنا نرتبها
ريما طلعوها للغرف امشي اوريك
كان الفيلا فوق فيها اربع غرف مع ملاحقها
غرفة لهدى وغرفة لطلال وسلطانه وغرفه للبنات
وغرفه لفهد وهيفاء
طلعت ريما تبي تشوف وين حطو الشنط
وشافت الغرفه على يمين المدخل اول شي هي غرفة فهد بحكم شنطهم فيها
دخلت معها هيفاء وشافت المكان ومو عارفه وشلون بتتصرف مع فهد وهل هو بيقعد
هنا والا بس اغراضه
دق قلبها بقوه من هالشي بس حاولت تتجاهل الشعور ذا
طلعت ريما وخذت شنطتها وفتحتها طلعت اغراضها وبغت تطلع لها لبسه لايقه
للأجواء
حست ان عبايتها مضايقتها فصختها وحطتها على السرير وحطت جزمتها ورفعت
بنطلونها شوي على فوق لين تخلص المهمة بسرعه
حست بمجهود وهي ترتب الأغراض تبي كل شي في مكانه ودخلت غرفة الملابس وحطت
اغراضها في جناح كانت معقوله الغرفه هيفاء افكارها تروح وتجي
طلعت شافت فهد واقف في نص الغرفه ويشوف الوضع
جات في وجهه مستعجله ووقفت يوم شافته موجود
قال من جاب شنطتك هناا
هيفاء : ليه وين تكون المفروض وبحده شوي
فهد : سؤال بس ,, وهو عارف بس يبي يكدر جوها شوي
هيفاء : والله اذا في مكان لي بعيد عن هنا يكون احسن ومرت من جنبه تبي تروح
للتسريحه
فهد : اذا جيتي تكلميني تعملين الف حساب لكلامك :: ,, مو تسوين حركات بزران
هيفاء حست به مررره يطفش ,, حاضر
ووقفت عند التسريحه وهي ترتب اغراض المكياج وهو قاعد يطالعها نزلت عيونها ما
تبي تشوفه هو راح هو قعد وحست عيونها بتدمع من حركته مسكت نفسها وخذت نفس
عميق بقوه سمعت صوت دفة الباب ,,,,,
لبست هيفاء بلوزه بقصة سفاري مع تنورته اللي جايه قصات مرتبه حررت شعرها
ورتبت غرتها حست انها طولت شوي ورتبت مكياجها ورضت عن شكلها ونزلت
كانوا الحريم متجمعين في غرفة الطعام دخلت برزتها ومشيتها اللي تخلي الانظار
تتجه لها
باست راس جدتها وقعدت معاهم
ام طلال : تفضلوا سموا,,
تعالت اصوات صحون والملاعق وعبير تطالع هيفاء من وقت لثاني وتحس بنار في
جوفها ان فهد يشوفها
لانه مو معقول حد عنده وحده مثل هيفاء يتركها
بعد الغداء دخلوا المجلس وشافوا البنات المنظر الخارجي وبغوا يطلعون يتمشون
كانوا كلهم لابسين كاجوال بناطلين مع توبات قطن
طلعوا في المزرعه يتمشون وما فكروا يتغطون يمكن حد يشوفهم هيفاء اللي شافت
المنظر ( قالت بكيفهم وش خصي
ريما اللي تسولف مع العنود يبون يروحون اصطبل الخيول يشوفونها من زمان ما جت
وودها تلقي نظره
هيفاء حست انها ضايعه الجميع عارف المكان هذا زين الا هي حست بحزن خفيف كنها
غريبه عنهم
دخلت غرفة جدتها تبي شي يلهيها من الناس
شافت من نافذة جدتها المطله على الخيمة فهد ومعاه رجال واقفين يسولفون يا ترى
ذا نواف ولا حد ثاني
كان شكل فهد ملفت مبدل ملابسه ولابس رياضه شكله يبي يشتغل في المكان شوي
وهم واقفيت التفتوا تجاه معين ولما شافت وين يناظرون شافت عبير تأشر لهم
اغتمت من شوفتها وكلام جدتها اللي يرن في راسها
اكيد عبير ما راح تخلي فهد
مشى فهد واللي معاه صوب عبير اللي ماخذها راحتها في المكان وتأكدت ان هذا
اكيد اخوها
هيفاء (( مالت عليك انت واختك صحيح ما عندك غيره))
هيفاء وهي تكلم نفسها يا سلااام ونسيتي فهد ليش يسمح لها تطلع عنده بالمنظر
ذا
سكرت الستاره ما تبي تشوفهم
التفت الا جدتها في وجهها
ام طلال : شفتي اللي اقولك انا عارفه حركاتها من زمان ما تخفى علي يمك بس فهد
عاقل ولو يبيها كان خذها
هيفاء : اللي رجعت على ورى بسرعه : متى جيتي يمه
ام طلال : شوفي حبيبتي المكان هذا بكبره لك انتي الآمره الناهيه تصرفي كنك في
بيتك
ولاتخجلين من شي والشغالين كلهم بيسون اللي تبين لاتتركين لأي حد فرصة ان
يخرب عليك فاهمه هالشي
جت هيفاء صوب جدتها وضمتها بقووووه
الله لا يحرمني منك يا جدتي ,,,,