منتديات بنوته - عرض مشاركة واحدة

05-31-2011, 02:54 AM

بمجلس الرجال ...
نزل فيصل فنجاله ..وقال لابو متعب "حجزت ياعم قاعه والعرس بعد شهر"
ناظروا العيال في بعض وتكلم ابو متعب "الي تشوفه ياولدي"
كمل فيصل "كل القاعات محجوزه ومالقيت الا هالوقت .."
ابو متعب "مايخالف وانا ابوك الله يقدم الي فيه الخير "
فيصل "اللهم اميـن "
طلع من جيبه ظرف بيج كبير مطوي ومده على ابو متعب "وهذا المهر "
اخذه ابو متعب وحطه جنبه ...بعد شوي وقف فيصل ..
ابو متعب "العشا الليله يا فيصل"
ابتسم فيصل "مابينا هالكلام يبو متعب حنا اهل "
ابو متعب "وعشاننا اهل لعشا عندنا الليله"
فيصل"الله يسلمك مره ثانيه ان شاء الله وراي مشاوير لازم اخلصها "
ابو متعب "الي يريحك وان عمك"
وطلع ومعه بندر والوليد ...
عند باب الشارع قال فيصل للعيال "امانتكم امانه ان نقص شي من الفلوس عليكم تكلموني "
بندر "ان شاء الله تكفي وتوفي "
فيصل "حتى لو انا امنتك يابندر ان نقصت الفلوس على البنت تكلمني "
بندر "مايكون خاطرك الا طيب "
فيصل "الله يسلمك فمان الله "
وطلع ...
قال الوليد "والله انه رجال "
بندر "صادق الله يوفق جود تستاهل كل خير"
الوليد بحزن "ماني مصدق انها بتتركنا "
بندر "هذي سنه الحياه الله يوفقها هذا المطلوووووب .."
الوليد "اللهم امين .."
/
كان ابو متعب بالمجلس يقلب سبحته بيده وخاطره ضايق ...دخلت عليه المجلس ام بندر بعد ماقالوا لها العيال ان فيصل راح ...
وجلست عند ابو متعب ...
قال ابو متعب بعد لحظات صمت طويله "جا المهر "
ابتسمت ام بندر "عشان كذا خاطرك ضايق "
ابو متعب "هذي الدلوعه حبيبة قلبي "
ام بندر بغصه "مصيرها مثل خواتها الله يوفقها بس "
"كنت اتمنى تاخذ من عيال عمها بدل ماتروح لغريب "
ام بندر "هذي الحياه ..والقسمه والنصيب "
ابو متعب "على قولتك خذي هذا مهرها عطيه لها وان نقص عليكم شي علميني "
ام بندر "الله يطول لنا بعمرك ..."
وقامت تدخل بعد ماقام ابو متعب يروح يشوف اشغاله ...جت لقت البنات بالصاله يتقهون وياكلن حلا ...ومن حسن الحظ كانن بلحالهن ... قالت ام بندر وهي تعطي الظرف لجود ..
"هذا مهرك "
جلست جود ترجف وقالت "متى العرس "
ام بندر "بعد شهر "
شهقن البنات وجود شوي ويغمى عليها "شهررررررررررررر"
جود شوي وتبكي "يمه وش شهر ابي ريوف تحضر زواجي "
ام بندر "الرجال مالقى حجز الا هالوقت "
طلعت جود من الصاله وهي متضايقه ودخلت غرفتها وجلست تبكي هل هو وقع المفاجاه الي صدمها هالصدمه ولا ضيقها لان ريوف مو حاضره الزواج ..ولا بوقت ماهي بتبدا حياتها انتهت حياه بنت عمها واقرب الناس لها ..بعد شوي دخلت ندى عليها ولقتها هاديه بس عيونها حمر "جود ياقلبي الي صار صار "
غصت جود بريقها ..."تخيلي شهر ..اريام بتولد وريوف بالعده وش ذا "
ندى "الرجاجيل وش يفهمهم بالامور ذي اهم شي انتي والباقين مو مهم ..ان شاء الله لاطلعت ريوف من العده نسوي حفله ونستانس "
جود "مافي شي يعوض عن حضورها العرس يالله ياندى شهر وش يمديني اسوي "
ندى "يمدي يا بنت الحلال يالله قومي ننزل ضاق صدري امي يوم طلعتي ..."
جود بحزن اكبر "والله ماكان ودي اضايق امي بس غصب عني .."
ونزلن تحت ... وكان باين على امها الضيق بس مع سوالف البنات ورجعت الجو الحلو روقت وانشرح صدرها
قالت اريام "يوه ما يمدي احضر زواجك قهر "
جود"بضيق شنسوي عاد غصب "
امال غمزت لاريام الي قالت "اهم شي العروس يالله من بكره اطلعي شوفي اشغالك ماعاد فيه وقت تضيعينه "
جود "والله مشكله متى يمدي اسوي شي "
اريام "اهم شي فستان الزواج .. وباقي الاغراض هينه حتى لو تكملينها عقب العرس مافي مشاكل "
جود "الله يعين ..هم "
اريام "لاهم ولا شي الا وناسه وسعه صدر "
جود "هههههههههههههههههه ايه مره "
وقفت وقالت "ثواني وراجعه "
طلعت غرفتها ... قالت ندى ياقلبي ياجود خلاص بتتزوج وتصير حرمه راعيه بيت"
امال بمحبه "الله يوفقها يارب تستاااااااااهل كل الخير "
ورجعت تتذكر يوم انهارت جود عليهم بسبب ملكه ماجد ..ومشى شريط هالقصه بعيونها من محبه صغر لحب تعمق مع كبرها بالسن ..مسكينه يا جود مالك بالطيب نصيب ..ياشين هالشعور الي يتغلغل زي المرض بعروق الدم .. يدمي .. يالم .. يخلي راعيه يعاني ..هالشعور الي ما يكتمل الا بفرح شخص..بوجود شخص ..بشعور شخص ..
شخص واحد معين .. لا الاحسن منه .. لا الاكبر ..لا الاعظم يحل محله ..انسان توغل باعماق الروح ..استحل الكيان ..وملك الوجدان ..حتى النفس الي نتنفسه يكون مقسوم نفس لنا ونفس له ... انسان مهما كبرت عيوبه نشوفها صغيره .. هذي هي عين الحب الي عن كل عيب عميا ماتشوف ..حتى احكم الناس يضيع لا جربه ..
هذا الشعور الي يدخل قلوبنا بدون استئذان بدون احم .. وبدون حتى ما يلقي السلام ...نقدر نسميه مرض.. ونقدر نسميه نشوة للروح في سما الاحلام ودنيا ملونه بالوردي ..
هالحب الي ماجاب الا العنا والشقا لاختها الحنونه الطيبه ..
قالت ندى بحزن "عساها تتوفق وتنسى "
همست امال "لاتسمعك امي تراها منكره ان جود تحب ماجد "
ندى بقوه "كانت "
امال "لا تلعبين علي وعلى نفسك عمر هالشعور ما يزول عسى فيصل ينسيها حبه بعشرته الطيبه "
ندى "يااااااااارب "
اريام بهمس "وجع مانسيتوا هالسالفه انتم الي تكبرونها براسها ولا من متى نحب ونعرف هالاشياء"
ندى "حنا ماكبرنا شي وطبعا مانعرف الحب مافيها اعتراض لكن جود غيرنا من يوم وهي صغيره وهم يقولون انها لماجد من بيننا حنا يا خواتها لانها كانت متعلقه فيه وتموت عليه فتنه طفوله وكبرت وكبر هالشعور بقلبها لين صار مالي حياتها .. اهلنا السبب وهم المسؤولين عن تعاستها "
امال بواقعيه "الي صار صار انتهينا وحنا عيال اليوم ..اهم شي نبدا نجهز للزواج باسرع وقت مابقي شي "
اريام بحزن "قهر ماني بحاضرته "
امال "توقيتك غلط"
اريام "وانا شدراني انها بتتزوج قبل ولادتي "
امال "هههههههههههههههههههههه تحملي نتايج تصرفاتك اجل"