منتديات بنوته - عرض مشاركة واحدة

04-28-2011, 08:59 PM

صحت الماس على صوت صفقة باب قويه ، ناظرت في ساعتها لقت سعود له الحين ساعتين من يوم ماطلع ..
وقفت ... وهي لسى متروعه من صوت الباب الي انصفق بقوه ..
غسلت وجهها وعدلت جلابيتها الخفيفه ..زينت شعرها بسرعه وطلعت...
سمعت صوت بكا في غرفة نوف الي مقابله لغرفتها ومابينهم الا سيب وسيع ...ماقدرت تمسك نفسها مشت بسرعه ووقفت عند الباب وسمعت نوف تبكي ..
فتحت الباب..شافت نوف جالسه في طرف السرير وتبكي ..
قالت الماس بخوف :-نوف علامك
مارفعت نوف نظرها ولاشي حطت راسها بين يدينها وجلست تبكي زود
جلست الماس عندها وهي بتموت خوف :-نوف علامك
ضمتها نوف بدون مقدمات .. انصدمت الماس ومسكتها الماس وجلست تهديها لين هدت تقريبا ..
بعد نص ساعه ...
علمت نوف الماس بكل شي صار من اول خطتها لين الي صار بينها وبين سعود ، تغير لون وجه الماس ..
كملت نوف وهي تمسح دموعها الي نزلت من جديد :-استاهل الي جاني منه ولا بعد قليل بحقي توني صحيت لنفسي كان سعود بين نارين نار انه يستر ويغطي هالفضيحه ونقول للناس اني اجهضت او انه يطلقني وان تزوجت مره ثانيه انفضحت في خلق الله وراح يشتغل القيل والقال ويطلع مليون سؤال وسؤال
الماس بهمس :-ليه يانوف ليه تسوين فيه كذا سعود ماعمره قسى ولاجرح احد
رجعت تبكي والندم مقطع قلبها تقطيع :-ياليتني اموت مدري وين اودي وجهي منه ومنك الماس من قبل ماتتزوجون وهو معجبني ياما دقيت على جواله وسكر الخط بوجهي حتى الشهور الاخيره وهذي حالي ازعاج له .. ماكنت اتوقع فيه رجال ممكن يحب زوجته هالكثر لكن الغرور كان معميني وقلت باخذه يعني باخذه توقعت اني لاتزوجته بيكون ملكي وبيحبني مثل ماهو يحبك لكني عرفت انه عشم ابليس في الجنه انه يحبني حتى لما حاولت اني اغويه صد عني وطلع وترك البيت
همست الماس ودموعها برموش عيونها :-يوم عمي عطاه كف
نوف :-ايه
وقفت الماس ومشت للبلكونه التابعه للجناح تبي تشم هواء تبي تحاول نخفف من هالثقل الي على قلبها ...
وقفت نوف وراها وقالت وهي منزله راسها :-سامحيني يابنت عمي ضيعت نفسي بنفسي
ورجعت تبكي كملت :-ماتدرين شكثر انا ندمانه ضيعت هيبتي وكرامتي واجبرت ولد عمي على ------ على ------- (ورجعت تبكي بزود) عشان يحميني من الفضيحه الي جبتها لنفسي ولاهلي
التفتت الماس لجهتها ...
كملت نوف وهي تبكي :-بطلع من حياتك قريب عارفه اني ماجبت لك غير الحزن والضرر وعارفه اني ياما جرحتك واخطيت بحقك .. بس كنت غيوره وعيني فارغه كنت احسدكم كلكم دانه تزوجت مرتين وزواجها الاخير كان زواج تحلم به كل بنت انتي عندك سعود الي حارب الدنيا عشانك رنا عندها فهد الي مسعدها ومغنيها عنا حتى سعاد تزوجت الانسان الي تحبه انا الوحيده الي كنت ارفض كل من تقدم لي لان عيني على سعود حتى امي الي هي امي كانت تزيد من حقدي عليكم وتزيد من اصراري اني اتزوجه عرفت الحين ان امي لو كانت فعلا تحبني ما خلتني ارمي كرامتي بالارض واخليها مداس للكل
ضمتها الماس وخلتها تبكي على كتفها وبكت معها ....
مسحت الماس دموعها بحنيه وقالت :-انسي كل شي صار وابني حياه جديده واحمدي ربك انك تبتي قبل لايفوت الاوان صحيح ان الي صار بيننا مو سهل ولاهين و اكذب عليك ان قلت اني نسيت ، اشياء كثيره ماتنسي بسهوله ..ويبيلها وقت ..حتى الجروح وهي الجروح تتداوى لكن يبيلها وقت حتى تطيب وتتشافى.
سمعت الماس اصوات تحت وقالت بسرعه :-عمتي والبنات رجعوا من برى برسل لك الشغاله ترتب غرفتك ونامي لك كم ساعه ولاتعلمين احد بالي صار وخلي السالفه مثل ماقال سعود انك حملتي واجهضتي
طلعت الماس وانهارت نوف على اقرب كرسي وهي تشوف بعيونها الانسانه الي حبها سعود وعرفت ان الفرق بينهن بعد السما عن الارض ..
*
*
*
*