منتديات بنوته - عرض مشاركة واحدة

04-28-2011, 08:47 PM

*********
في المستشفى ...
قال سعود لمدير المستشفى :-لازم تشوف لي الموضوع لانه كبير وماينسكت
ارتبك مدير المستشفى وقال :-متأكد اخوي
عصب سعود :-اكيد متأكد يعني بجيك على عماي
المدير :-محشوم ولايهمك الان بشوف لك الموضوع
ناظره سعود وبقوه ارهبته :-ياليت والله
رفع التلفون وقال للسكرتير :-فيه مريضه جتنا في الشهر (---------) بتاريخ (---------) اسمها الماس بنت فهد ابيك تعرف لي الطبيب الي كان مسؤل عن حالتها وترسله لمكتبي الحين ضروري
السكرتير :-ان شاء الله
سكر المدير التلفون وابتسم بارتباك :-ثواني بس ويكون كل شي واضح
هز سعود راسه وماهرج بكلمه ..
بعد عشر دقايق ...
دخل الطبيب الي كان مسؤل عن حالة الماس :-السلام عليكم
الكل :-وعليكم السلام
الطبيب :-دكتور قالولي انك طالبني وطالب ملف مريضه خير ان شاء الله
المدير :-تفضل استريح
جلس الطبيب ومعالم الوقار بوجهه ...
المدير :-الاخ سعود زوج مريضتك الماس بنت فهد ومقدم شكوى
التفت يمه الطبيب وكأن سعود لاحظ احتقار في وجهه:-خير يا اخ سعود لايش المشكله
مسك عمره لايقوم يخنقه :-المشكله مثل ماحبيت تسميها هي انك قلت لي ان زوجتي فيها لوكيميا وبعد كم شهر اكتشف ان زوجتي حامل ولافيها الا العافيه ممكن تفهمني الموضوع وممكن تفهمني الصح من الخطا هل هي مريضه وتحتضر ولا حامل وبخير
عقد الطبيب حواجبه وقال بملامح حزينه فيها نفس لمحة الاحتقار الي شافها سعود:-اقدم لك عزاي بما اني قابلتك
طلعت عيون سعود قدام :-عزاك ، عزاك في من
ارتبك الطبيب وقال :-عزاي في وفاة زوجتك الماسه
عصب سعود :-لاتفاول عليها
ناظر الطبيب بالمدير الي حالته حاله وقال :-يا اخ انا مقدر شعورك و-------------------
قاطعه بعصبيه :-زوجتي حيه انهبلت انت
رفع الطبيب يده يوقفه عن الكلام وقال وهو يفرك جبهته :-دقيقه التقارير معي تفضل مو هذا توقيعك على اوراق دخولها المستشفى
اخذ سعود الملف الي بيد الطبيب وانصدم قال وهو مو فاهم شي :-الا توقيعي بس زوجتي حيه وموجوده هنا بعد
الطبيب قرب ينهبل الحرمه متوفيه من كم شهر ..
المدير يكلم الطبيب :-وش قولك يادكتور
الطبيب :-مدري التقارير موجوده والاخت المريضه الماسه متوفيه
ارتفع ضغط سعود وهو تو ينتبه :-يا دكتور اسمها الماس علامك تخربط
انتبه الطبيب :-شقلت اسمها
ناظره سعود وكانه تخبل من بعد هالسؤال :-الماس
وقف الطبيب وسكت شوي ، رجع شعره ورى وقال بهدوء :-ذكرت شي لحظه
اخذ التلفون ودق على قسم الملفات الخاصه بالمرضى ...
الطبيب :-الو ابغى تدورين لي ملف مريضه اسمها الماس بنت فهد دخلت المستشفى في تاريخ (وناظر في سعود الي علمه بالتاريخ واليوم)
الممرضه :-اوكي
الطبيب :-جيبيه مكتب الدكتور اسامه
الممرضه :-حاضر
ثواني الا والممرضه داخله ومعها الملف ...
فتحه الطبيب وهو يحط نظارته ...وتغير لون وجهه ..:- مومعقول
وقف سعود :-خير
ناظره الطبيب وقال :-زوجتك اسمها الماس بنت فهد بن سبع
سعود :-ايه
الطبيب :-مدري شالموضوع لكن فعلا الاخت كانت حامل اتوقع بشهر ونص او شهرين ماتاكدت المده لانها ماطولت بالمستشفى في ذاك الوقت لكنها كانت ضعيفه من قلة الاكل عشان كذا اغمي عليها
فقد سعود اعصابه :-لولا التقرير الي وصلني من المانيا كان مادريت ان زوجتي حامل كل هذا اهمال منكم تخيلوا لو انها باديه تتعالج بالكيماوي وهي سليمه تخيلوا
تورط المدير ...
وقال الطبيب :-يا اخ سعود في هالملفين كان تشخيصي كان سليم وممتاز الماسه كانت مصابه بلوكيما متاخره وتوفت عقب شهر من التشخيص ومن سوء حظك ان اسمها مشابه لاسم زوجتك لان الحرمه الي توفت ماعرفنا عن اهلها شي لانها ساكنه بلحالها وانت مابينت بعد ذيك اليله الي انهرت فيها .. وحسبناك تخليت عنها وماكان عندنا رقم لك حتى احنا كنا ناوين نستعلم عنك لكنها رفضت وقالت انها مقطوعه من شجره وانها ماتبي تشوف زوجها ابد ورضينا بقرارها لانها كانت تعبانه حيل اما زوجتك انت تعرف اليوم الي طلعت فيه انت الي انهيت معاملاتها والي وقعت على دخولها المستشفى ولو كنت منتبه ومركز كان انتبهت انهم اخذوا توقيعك مرتين
سكت سعود يفكر في كلامه ...معه حق
قال بهدوء يكبت انفعاله :-معك حق لكن هذا مايخليكم من مسؤلية الي صار ...
المدير قال بتوتر :-مالك الا طيبة الخاطر وراح نعرف المسؤول ونعاقبه الدكتور ماعمره قصر في واجباته وخبرته تتعدى العشرين سنه والخطأ الي صار اظنه اداري اكثر منه طبي وصدقني يا اخ سعود لو فرضنا انها جت هنا حتى تبدا تتعالج بالكيماوي هالشي غير ممكن قبل اجراء فحوص شامله وساعتها راح يبين كل شي انا ما اقول هالكلام عشان اخلي المستشفى من مسؤلية الي صار لا انا اكلمك بمنطق خارج عن نطاق عملي كمدير وطبيب بهالمستشفى
قال سعود :-انا الي يهمني ان المسؤول عن هالغلط الكبير يلاقي جزاه ارواح الناس مو لعبه
المدير :-وهذا الي راح يصير
قال سعود وهو يناظر في الطبيب وقال بصرامه :-لو تعرفني زين يادكتور ما تخيلت لو للحظه اني اتخلى عن زوجتي وهي في امس الحاجه لي لكن من يجهلك مايثمنك
قال الطبيب بنبرة اعتذار :-الحرمه كانت حالتها النفسيه والصحيه صعبه واسفت لحالها كثير من بيلومني على احتقاري لزوجها
سعود :-صار خير انا المهم عندي الحين الشخص المسؤول عن هالخطأ وراح اتابع الموضوع شخصيا
طلع من الغرفــــــــــــــــه وانهار المدير على كرسيه ...
استغرب الطبيب خوفه وتوتره :-دكتور شفيك متوتر وحالتك حاله جلّ من لايخطئ
قال المدير بعصبيه :-خطا عن خطا يفرق انت تعرف من الرجال الي طلع من هنا
الطبيب :-لا شعرفني
قال وهو شبه يصارخ :-هذا سعود بن سبع هذي عايله لها نفوذ ومعارف وان حطوا المستشفى في روسهم علينا السلام
الطبيب كان مو مهتم لاي شي من هالكلام لانه يراعي الله فقط في مهنته :-باين عليه انه رجال عاقل وثقيل ومعه حق لازم المسؤول يتعاقب وهنا تقع المهمه عليك ، والان اسمح لي عندي مرضى بالانتظار
المدير :-تفضل دكتور ماقصرت
وطلع الطبيب تارك المدير مسوي حالة استنفار بالمستشفى حتى يعرف الي صار بالضبط ....
×
×
صار لالماس ثلاث ايام بالمستشفى وحالة الجنين للان مجهولــــــــه وعلمها بالغيب ...
طلع سعود من غرفة المدير طفشان وراح يدور الدكتوره المسؤوله عن حالة الماس وكان في نفسه يحمد الله انها سليمه وان هالشي موثق باوراق رسميه لان اعصابه ماعاد تستحمل صدمات ....
[[[[[[[[آه لو تدري وش ينتظرك ياسعود كان عرفت ان صدمه عن صدمه تفرق !! ]]]]]]]]
كان يعرف مكان مكتب الطبيبه لانه كان يسأل عن الماس وحالها بشكل متواصل..
دق الباب ..
الدكتوره وهي تسوي نقابها :-تفضل
دخل سعود :-سلام عليكم
الدكتوره :-وعليكم السلام اخ سعود جيت بوقتك
خاف سعود وبان هالشي على وجهه قالت الطبيبه :-ابشرك الجنين بخير وتقدر زوجتك تطلع من المستشفى
اشرق وجهه من عقب هالخبر .. كان يتمنى من كل قلبه لو الله ينجي حلمه وحلم زوجته من سنين ويخليه لهم ..
يقولون الواحد مايبني احلامه من رمال ..وسعود بنى احلامه من اوهنها وهو عارف... وكان يدعي ليل نهار ماتضيع هالاحلام بسبب موجة بحر صغيره مالها قيمه ووزن
ابتسم وقال :-الله يبشرك بالخير
قالت الدكتوره :-شف يا اخ سعود ممكن تكون مستغرب ليش انا تعديت التوقيت الدارج من 48 الا 84 ساعه مهله لمعرفة الوضع النهائي للجنين ال 48 ساعه هي الدارج لكني اضفت عليها يوم وكم ساعه حتى تستقر نفسية زوجتك المتدهوره وتخف ضغوطاتها النفسيه الي عاشت معها الشهور الي مضت والي تعتبر من اهم فترات الحمل لكن الي اشوفه انها بدت تسترخي نوعا ما .. وانا اقترح عليك كاخت اكثر مني كطبيبه مختصه تبعدها عن كل الضغوطات لان ممكن في اي لحظة انفعال تجهض
توتر سعود وقال :-ماتقصرين دكتوره المطلوب من الناحيه النفسيه وفهمناه طيب من الناحيه الصحيه وش المطلوب الادويه والاكل وهالاشياء
الدكتوره :-راح اكتب لها مقويات وفيتامينات لا تجهد نفسها باي شي ولاتشيل ثقيل لو حتى دلة قهوه جسمها تعرض لطيحه قويه وراح يكون حساس حيل ادع ربك يحميلك ضناك المفروض باول شهور الحمل تاخذ ادويه خاصه بمنع التشوهات وهالاشياء ولكنها ماخذتها وماعلينا من الي فات زين طبعا بتكون لها زيارت دوريه لمتابعة حملها وفي حالة زوجتك راح تكون مواعيد زيارتها لنا ضعف الحالات الطبيعيه حتى نتابع الوضع عن قرب (ابتسمت) وكلها خمس شهور وراح تعدي بخير ان شاء الله
هز سعود راسه واخذ منه الوصفه حقت الادويه :-ان شاء الله
وقع على اوراق الخروج .... واخيرا بتصفى ايامهم وبيعيشون بسلم وسلام ...
وانا هرج ابوه بكلمه بيتصدى له وبيتفاهم معه ...!
خلاص
انتهى كل شي .. الماس حامل
ونوف اخذت جزاها بعد فعلتها السوداء حمد ربه انها جت بارده مبرده وطلاقه لها له مبرراته ...
والله يعينه على مواجهة عمه ابو احمد ...
×
×
×
*