*
*
*
كانت الماس تدق على سعود ومايرد عليها والساعه الان 11 بالليل وماله حس ...
قلبها صار ياكلها عليه وهي ماتدري وينه ...
فتحت باب غرفتها وطلعت تبي تنزل تتمشي برى بالحديقه لين يرجع لانه ماراح يهدا لها بال ولايرتاح خاطر وهي بعيده عنه ولاتدرين
لما وصلت الدرج حق البيت دق جوالها ...
الماس بحب ووله وخف :-حبيبي وينك كذا تشغلني عليك
قال سعود بصوت كئيب :-اعذريني يالغاليه
قالت بعيون مدمعه :-بعذرك يانظر عيني
×
سمعت نوف صوت جوالها بالسيب وطلعت من غرفتها ذي فرصتها والاحسن بعد ان الماس واقفه عند حافة الدرج تكلم حبيبها الي حقدت عليها اكثر وماترددت دقيقه لانه يحب الماس ومايحبها هي
التفتت الماس ورى الا وتشوف نوف وراها وتدزها مع الدرج بسرعة البرق ..صرخت الماس بصوت عالي وهجت نوف لغرفتها وهي معرقه ترتجف من الخوف ومن الشي الي سوته ...
سمعت هنادي صراخ برى وطلعت تركض من غرفتها وشافت الماس طايحه وماسكه بطنها وتتلوى من الالم
هنادي بخوف وهي تنزل الست درجات الي بالسلم الي ع اليمين :-الماس
طلعت منال وامها من غرفهن :-وشافن الماس طايحه وهنادي عندها
ام سعود :-بسم الله عليك يمه الرحمن الرحيم
الماس وهي تحس بدوخه وجسمها من قوة الالم متخدر :-الحقيني ياعمه
واغمي عليها ...
صرخن البنات الا وبجية ابوهن من برى الي شافهن براس السلم مجتمعات
رقى الدرج بسرعه ووقف بالمكان الي بين الدرجين المنقسمين يمين ويسار وهو المكان الي الماس طايحه فيه
ابو سعود بخوف :-بسم الله عليها شفيكم
ام سعود وهي تبكي :-ياويلي عن بنيتي الحقني يا ابو سعود
جوا بيرفعونها لكن هنادي صرخت :-لاتحركونها يمكن فيها كسر كلموا الاسعاف هم يعرفون شغلهم
وفعلا ماحركوها وخلال عشر دقايق وصل الاسعاف ونقلوها المستشفى
لما طاحت الماس طاح الجوال معها وسمع سعود صرختها وصرخه وراها مو غريبه عليه
صرخ بالجوال :-المااااااااااااااااااااااااااااس
لكنها ماردت عليه دق على جوالها لقاه مغلق
انهبل ومادرى وش يسوي ولا يدري وش الي صاب الماس
ودق على هنادي ....
قالت هنادي وهي تبكي :-نعم
انخرش قلبه ومن صوت هنادي درى ان فيه شي :-الماس شفيها
انهبلت هنادي :-شدراك
صرخ :-الماس شفيها
هنادي وهي تبكي :-طاحت من على الدرج واغمى عليها
انصدم :-ايش كيف حالها وينكم
الف سؤال وسؤال طرى بباله ...حس بضياع والم وخوف ماينوصف
هنادي :-حنا رايحين لمستشفى ----------- الحقنا هناك
سكر الجوال وركب سيارته ومشى بسررررررررررررعه
والوساوس توديه يمين وشمال
×
×
×
>>>بالمستشفى
كانوا كلهم جالسين منال وهنادي وام وابو سعود .....
طلعت الطبيبه وقالت :-وين زوج المدام
الكل ناظر وقال ابو سعود :-مو موجود انا عمها
الطبيبه :-لازم يكون زوجها هنا
قاطعهم سعود الي ملامح وجهه ما تنوصف :-انا زوجها نعم
الطبيبه :-المدام معها نزيف حاد ويمكن تفقد جنينها
ذهووووووووووووووووووووووول خيم على المكان...
لكن صدمة سعود ماتنوصف :-ايش قلتي
الطبيبه :-انت زوج الماس بنت فهد
هز راسه
الطبيبه :-بسبب سقوطها من الدرج صابها نزيف قوي ويمكن تفقد الجنين
قال بذهول :-الماس حامل
الطبيبه :-ماعندك خبر
سعود :------------------
الطبيبه :-تقديريا زوجتك حامل لها اربع شهور
انهار سعود على اقرب كرسي ...
.قال بصدمه :-الماس حامل
رحمت الطبيبه حاله وقالت :-راح نحاول نوقف النزيف والله يكتب الي فيه الخير
وراحت
لحقها سعود وقال بنبره حزنت الطبيبه وحركت مشاعرها :-دكتوره بين يدين الله ثم يدينك اغلى خلق الله على قلبي
هزت راسها بتفهم :-الله معنا ان شاء الله بس لاتتامل في سلامة الجنين
قال بقوه واصرار اعجبها :-لامال ولاعيال يهموني الي يهمني توأم روحي الي بين الحيا والموت
دمعت الطبيبه وكملت طريقها ....
جلس سعود بالانتظار بعيد عن مكان اهله ...
جاه ابوه :-وكل امرك لله
هز راسه وقال :-ونعم بالله
كان ابوه بيحاول يعتذر منه بطريقه غير مباشره لكن الممرضه جابت اوراق لسعود يوقعها ..
وقع الاوراق وسند ظهره للكرسي وهو مانزل عينه عن ساعة الجدار ...
جت امه وخواته وجلسن جنبه ....
حس بضغط على قلبه ماينوصف ....
قال لامه بتوتر :-يمه لهم ساعتين داخل وش يسوون
مسكت امه ذراعه وقالت :-هدي نفسك يمه الحين بتطلع الطبيبه
نزل راسه وحط كفوف يده على وجهه ...حس روحه متعلقه بين السما والارض
قالت منال بهمس :-طلعت الطبيبه
وقف الكل وركض لها سعود :-بشري
ابتسمت الطبيبه :-الحمد لله قدرنا نوقف النزيف الام بخير باقي البيبي صحيح انها ما اجهضت لكن ما نقدر نحكم اذا كان ثابت او ما تأثر من سقوطها من الدرج لكن الاربع وثمانين ساعه القادمه بتكون حاسمه
قال من قلب :-احمدك يارب ، وينها يادكتوره
الطبيبه :-هي مخدره الان ماشاء الله عليها قويه وخصوصا يوم درت بحملها طلبت منا نساعدها حتى تحافظ عليه
خنقته الغصه :-صحت داخل
الطبيبه :-ثواني بس ثم رجعت غابت عن الوعي
ام سعود :-اللهم لك الحمد تسلمين ياابنيتي ماقصرتي
ابتسمت الطبيبه :- واجبي ياخاله بالاذن
ابو سعود :-الحمد لله على سلامتها ويارب يسلم ولدك يبه
قال سعود وهو لسى مجروح من ابوه :-تسلم يبه
قال بو سعود :-يالله مشينا بنطلع
سعود :-بجلس هنا
ابوه :-هذا قسم حريم ماراح يسمحون لك
سعود :-ماراح اتركها
امه :-رح يمه ريح وانا برافق معها
سعود تردد
لكن امه اقنعته
قال وهو يمشي :-يمه لاصحت كلميني لاصار لها شي نادي الطبيبه او الممرضات
ابتسمت امه :-ابشر يالله رح
وفعلا انهوا الاجراءات اللازمه ورافقت ام سعود معها
قال بو سعود :-عود بيتك يبه
سعود :-اسمحلي يبه عقب الي صار لي اليوم ماظنيته
ابوه :-بس----------------
سعود :-طلبتك يبه اجل الكلام الحين انا تعبان وخايف على الماس
ابوه :-براحتك
وطلعوا .....
البنات وابو سعود رجعوا البيت ....
وسعود رجع البيت الي جمعه هو والماس في يوم البيت الي له ذكرى في كل زاويه من زواياه...
×
كانت نوف ترجف وخايفه من الي سوته ....
سمعت اصواتهم راجعين وماجتها الجرأه تطلع وتسأل عن الي صار او تسوي مصدومه ..
لكنها سمعت صوت سلطان العالي :-من وين الحلويين جايين
قالت هنادي بتعب :-الماس طاحت واغمى عليها
سلطان :-افا
هنادي :-وامي معها الحين
سلطان :-كيف حالها الحين
ابتسمت منال :-شكلنا بنصير عمان قريب
انهارت نوف على الباب من صدمة الخبر ... بعد كل الي سوته وماصار لها شي
صرخ سلطان :-احلــــــــــــــــــــفي
منال وهنادي :-ههههههههههههههههههههه بس ادع ربي يعديها على خير طيحتها قويه
سلطان من قلب :-يارب
التفت وقال :-وين سعود
هنادي :-مدري عنه
سلطان:-ليه مارجع
قالت منال بحقد :-بسبب العقربه نويف جاه من ابوي كف
انهبل سلطان :-تكذبين
هنادي :-لا ماتكذب سالفه طويله بس هذا هو المختصر المفيد
قال سلطان بقهر :-كنت داري ان مقدمها شر علينا
ونزل بسرعه وشماغه بيده ....
هنادي :-وين
سلطان :-بروح له
منال :-تعرف مكانه
سلطان :-ايه
وطلع من البيــــــــــــــــــــــــــــــــــــــــــــــ ــت