الفصل الثامن
(الجزء الثالث)
طارت دانه للمستشفى بعد مادرت عن الي صار لاختها ...
دخلت غرفة الماس وضمتها وهي تبكي قالت الماس تهديها :-هدي نفسك دندون روعتيني
ابتسمت دانه وهي تمسح دموعها :-وتنكتين بعد وانا جايه وقلبي طايح برجولي
الماس:-ماله داعي تجين لاني بطلع الحين
الا وبدخلة سعود...بعد ما تنحنح لانه سمع صوت دانه
سعود:-هلا والله بحرم راكان
ضحكت دانه :-كيفك سعود
ابتسم :-بخير الله يسلمك وانتي كيفك
دانه :-الحمد لله بخير وعافيه
قالت الماس والحب بعيونها وهي تناظره :-عطاني الدكتور خروج
قال سعود يمزح :-بغيت اتوطى ببطنه ..بس فالاخير عطاك خروج على مسؤوليتي
وبلباقه قال :-بروح اوقع الاوراق جهزي اغراضك ..
وطلع من الغرفه...
جلست دانه جنبها ..وقالت لها الماس:-كيف عرفتي باني في المستشفى
دانه :-دقيت على امي بسولف معها وكان صوتها متغير وبعد اصرار وتهديد بأني راح اجيها الحين قالت لي...وعلى طول اخذت عبايتي وجيتك طايره
قالت الماس :-دريتي عن الحادث الي صار لطلال
انصدمت دانه :-وشهو طلال مسوي حادث
هزت الماس راسها :-ايه البارح بالليل
قالت دانه بلهفه :-والحين كيفه
الماس:-حالته خطيره ..وحتى ان تشافى بيفقد حاسه من حواسه
دمعت عيون دانه :-آه ياربي وش ذا المصايب الي جت مره وحده
الماس :-الله يحفظه من كل شر..
دانه :-وش اخبار سعود ..
عقدت الماس حواجبها :-بخير ماشفتيه
دانه :-الا بس انا اسأل وش اخباره بعد الانهيار الي جاه امس
انصدمت الماس :-انهيار ...
ناظرتها دانه باستغراب:-ماعندك خبر
الماس وهي مازالت مصدومه :-لا
كملت دانه :-يوم عرف انك مريضه بالوكيميا (وتغير صوتها بس تماسكت) جاه انهيار عصبي
الي صار لسعود كان صدمه ماوراها صدمه ..حتى بعد مازعلته شهور مازال يحبها وحبه لها يتجلى في كل موقف ..غيرت الماس السالفه الي راح ترجع تفتحها لما تكون معه على انفراد اذا زارها في بيت ابوها .
"وين راكان "
كئبت دانه :-سافر اليوم لندن عنده عمل
الماس:-افا بس توكم متزوجين
دانه :-عارفه بس العمل مهم والسفريات للخارج لابد منها ..
تنحنح سعود وتغطت دانه ..قالت الماس :-ادخل سعود
دخل سعود وقال :-جاهزات نمشي...
وقفت دانه وقالت :-انا سيارتي وسواقي تحت ..
قالت الماس:-تعالي معي لبيت ابوي
ناظرها سعود والفكره تكبر في راسه زود!!
هزت دانه راسها :-اليوم ارتاحي وانا بجيك بكره طلعت بسرعه من البيت ولاقلت لامي ام راكان وامي مريم لانهن طالعات مشوار وماراح يطولن
قال سعود وهو يساعد الماس توقف :-اجل انتظريني انا والماس عشان نطلع مع بعض
دانه :-طيب
وطلعوا من المستشفى سوا ..وتوادعو عند البوابه ...
غمضت الماس عيونها ..من التعب وبعد ربع ساعه صحاها سعود ..
"حبيبتي وصلنا انزلي"
وطلع يفتح لها الباب نزلت وهي للحين ما انتبهت للمكان الي توقف فيه ..نزلت ومشت معه وهو ماسكها ودخلت البيت وفجاه استوعبت الي حولها هي ماهي في بيت ابوها ...هذا بيتها هي وسعود ولا تحلم ..
التفتت بسرعه يمه وناظرته ..ابتسم بخوف وقال :-تو مانور البيت يالغاليه
من فرحة الماس ..شوي وتصيح ..يالله اخيرا رجعت للمكان الي تحبه المكان الي اثثته على مزاجها وذوقها البيت الي شهد احلى سنين عمرها.
وقبل لا تتكلم قال سعود وهو يمسك يدينها الثنتين :-خلينا نبدء صفحه جديده وننسى الشهور الي فرقتنا ونعتبرها ماصارت في يوم ، عشان خاطرك يالغلا تخليت عن كل شي ..ومستعد ادوس الموت برجولي بس لاتخليني ولاتبعدين عني
دمعت عيونها وقالت :-والله اني ما استاهلك
سعود:-لا تعيدين هالكلام ازعل انا ما يملا عيني غيرك ..ولا ابي غيرك
الماس:-بس.......
حط يده على فمها :-اتركي عنك الافكار الي ضيعتنا انت شفتي الي صار بسبب تركك لي الشهور الي فاتت
ماقدرت الماس تقول شي ولا تعترض بعد العذاب الي ذاقته وهي بعيده عنه ..لازم تحافظ على زوجها لان امثاله معدومين .ولا لو واحد غيره كان طلقها ولا تزوج عليها من زمان .
قالت وهي على وشك تبكي :-سامحني يالغالي والله عيشتي بدونك ماهي عيشه كنت اموت واحيا باليوم مية مره بس كنت اتمنى يجيك ظنا وفي نفس الوقت ماكنت ابي اكون موجوده اذا تزوجت حتى ما اشوف غلاي يروح لغيري ...
سعود :- لو يخيروني بينك وبين الف ولد من لحمي ودمي والله لتكونين اختياري بدون تفكير
ضمته الماس:-الله لايحرمني منك
سعود:-ولا منك والحين يالله اطلعي ارتاحي فوق الطبيب يقول لازم ترتاحين
طاعته الماس وراحت لغرفتها ...إلي اشتاقت لها موت ..
×
؛
؛
×
؛
؛
×
><في بيت أبو سعود ><
قالت سعاد وهي تحس بيغمى عليها :-اتزوج احمد مستحيل لا والف لا
قال ابوها بعصبيه ماقد صارت :-بتتزوجينه غصب انتي محيره له الحين
انهبلت سعاد من هالعقليه :-وين حنا عايشين فيه التحيير عاده انتهت من زمان
ابوها:-لا ما انتهت وان ماتزوجتيه له حق يمنعك تاخذين غيره
انقهرت سعاد:-مو على كيفه
ابوها:-الا على كيفه ...
ناظرت سعاد في اخوانها الي جالسين وماتكلموا
قالت وعيونها مدمعه :-سعود تكلم ترضى اتزوج غصب عني
قال سعود :-الموضوع طلع من يدينا ياسعاد
سعاد:-مستحيل مو معقوله
سلطان :-سمعتنا بين يدينك الحين ياسعاد احمد طلبك قدام كل جماعتنا ويش بيكون موقفنا لا رفضتيه وش بيقولون الناس عنا
انقهرت سعاد المسكينه والي ماعلمها احد بموضوع التحيير الا قبل ربع ساعه عشان الظروف الي مرت على العايله ...
قالت وعيونها مدمعه :-كلكم بتاخذون ذنبي
قال فهد :-انتي ليش مأزمه نفسك احمد رجال عن عشرة رياجيل يكفي ان الرجال الي خطبك سكت لما قال له احمد انه يبيك هذا من كبر قدره ومن هيبته
وصلت سعاد لمرحلة الهستيريا ..بس ماباليد حيله سالفة السمعه كاسره ظهرها ..
وقبل لاتطلع قال ابوها :-الملكه و العرس بعد شهر من اليوم والمهر بيجي بكره ..
ناظرت سعاد ابوها وهي حاسه نفسها بتستخف ...دخلت امها المجلس بالقهوه حقت العصر ..
قالت سعاد وهي تحاول محاولتها الاخيره :-يمه يرضيك اتزوج غصب عني
لكن امها من انصار احمد ورأيها من رأي عيالها وزوجها ...
طلعت سعاد لغرفتها وهي واصله حدها من القهر ..حست بدموع الحزن والغدر وقلة الحيله تتجمع في عيونها لكنها تمالكت نفسها وقست قلبها لا ماراح تبكي مايستاهل واصلا ان نزلت دمعه وحده بتجيب الأولي والتالي وتجدد جروحها القديمه الي ماتشافت للحين والي كان هو سببها ...
بعد ساعه دقت عليها الماس...
الماس:-صدق الخبر بتتزوجين احمد بعد شهر
قالت بقهر:-تخيلي
الماس:-ياويل قلبي
سعاد:-قلت لك لا قال كلمه مايتراجع وقبل ما تنتهي الثلاث شهور سوى الي وعدني فيه وعرف كيف مايخليلي درب اقدر منه اتهرب من الزواج به
الماس:-يالله ياربي ..وش بتسوين
قالت سعاد تتطنز :-مابيدي حيله المهر بيجي بكره والملكه بيوم العرس
ماقدرت الماس تمسك نفسها وجلست تضحك ..
عصبت سعاد :-احر ماعندي ابرد ماعندك
حاولت الماس توقف من الضحك بس ماقدرت قالت سعاد :-انا بسكر الحين مالت عليك لاحسيتي بمصيبتي دقي علي
الماس:-خلاص لاتزعلين ياشينك لاصرتي جديه
سعاد:-تبغيني افرح واخواني كلهم ضدي
الماس كانت تعرف ان سعاد تحب احمد بس الي سواه بليلة ملكتهم ماثر عليها مره ومعها حق بس الانسان مو معصوم من الخطا ..
قالت بجديه :-سعاد انسي
عصبت سعاد :-مستحيل كيف تبغيني انسى الي سمعته كل كلمه كل كلمه قالها للحين تقتلني لا لا مستحيل
الماس:-سعاد انتي مقدره للوضع الحين الزواج بيحط حد لكل شي بتكونون كلكم متعادلين بينتهي التحدي وبينتهي كل شي هذي حياة ومسالة عمر فكري في الموضوع
حست سعاد بالدموع الي كالعاده كبحتها بسرعه :-مقدر يا الماس مقدر
الماس:-طيب وش العمل
قالت سعاد باكتئاب :-الزواج بيتم غصب عني وعنادي للاسف مانفعني بتزوجه بس والله ليندم
حزت بخاطر الماس ان سعاد تعاني :-آه ياسعاد محد مرتاح
سعاد:-وش اخبارك انتي
الماس :-تعبانه والله
سعاد :-مارحتي للطبيب ماسويتي فحوصات
الماس :-تعرفين سعود من كثر ماهو موسوس سوالي فحوصات كثيره طالبينها الدكاتره الي برى وارسلها لهم عشان نعرف مستوى المرض ومدى تقدمه والنتايج بتطلع بعد كم اسبوع .
حست سعاد بغصه :-الله يزيدك قوه على قوتك ماشاء الله عليك
قالت الماس بأمل كبير اثر في قلب سعاد :-عيشتي بعيد عن سعود الشهرين الي فاتو استنزفت كل طاقتي وكل مقدرتي على الحزن وعرفت اني ماراح احزن في حياتي كثر ماحزنت وانا بعيده عنه ،لكن لما اخذني من المستشفى للبيت بدون مايشاورني كان هذا اسعد يوم بحياتي حسيتني انولدت من جديد وإذا المرض الخبيث هو الي بيجمعنا يامرحبا به ، اكيد تحسبيني مستخفه بس الحب ياسعاد العشق يشقلب كيان الواحد وهذا حالي صحيح اني تعبانه مره بس شوفته تنور لي دنيتي وتنسيني همومي واوجاعي .
تأثرت سعاد من كلام الماس والحب الي يجمع بينهم على كثر المشاكل الي صارت لهم
وحست بسكين الذكرى وهذاك اليوم تنغرس في جرحها الندي وتزيد التهابه واوجاعه الي ماتنتهي ياشينها لاحب الواحد انسان مايبادله الشعور ويا قو القساوه لما يكون من تحب يكرهك ويبي ينتقم منك ..
ودها تذبح نفسها لانها رغم كل شي صار تحبه وتموت فيه وكانت مقرره ان ماتزوجته ماتتزوج ابد..واليوم المفروض يكون اسعد ايام حياتها يعتبر أسوأها والجاي الله يعينها عليه لانها ماتدري وش نيته في كل هذا...
:
؛
:
؛
:
؛
:
؛