((الجزء الثاني))
>< في صالة الحريم بمزرعة ابو خالد><
قالت ام راكان :- ماشاء الله هذولي بناتك .......((تاشر على الماس وقمر الي سلمن عليها وجلسن))
ابتسمت ام خالد :- ايه باقي دانه بتنزل بعد شوي ..
وفي هاللحظه ...دخلت دانه المجلس تمشي برقه وانوثه وكانت صدمتها توازي صدمة ام راكان ......
ماصدقت دانه ان ام راكان هي نفس الحرمه الي قابلتها بالنادي قبل شهر تقريبا سبحان الله .....في نفس الوقت حمدت ام راكان ربها في سرها لانه استجاب دعائها عشان تقابل هالبنت لو مره وحده....غريبه مو طبع ام راكان تتعلق باحد وخصوصا غريب لكن البنت هذي فيها سحر غريب (ماتلاحظون الكل متفق على هالشئ) ...يشد الواحد لها ، الي يشوفها يحس بالرقه تفيض من عيونها وصوتها الحنون يغمر القلب بالدفى والامان ...
اسرعت دانه في مشيتها وجزمتها الزجاجيه ترن في الرخام بصوت ناعم ....ووقفت ام راكان في هاللحظه متركيه على عصاتها طبعا وسط نظرات استغراب بكل الي بالمجلس وخصوصا الخاله مريم ...
قالت ام راكان وهي تضم دانه :- ما ازينها من صدفه
ضحكت دانه برقه :- والله مو مصدقه عيوني كيفك خالتي ...
ام راكان :- بخير عساك بخير (التفتت لام خالد ) عز الله انك ربيتي جوهره ما تتثمن بثمن يا ام خالد
ابتسمت ام خالد وهي مو فاهمه في وقت راحت دانه تسلم على الخاله مريم
كملت ام راكان وهي تعلمهم بالقصه في النادي وانها تعبت عشان تاخرت تاخذ ابرة السكر ودانه الي ساعدتها ..........الخ...
قالت ام خالد :- دانه حنونه من يوم يومها
ام راكان :- وانا اشهد ..... (كلمت نفسها وقريب قريب لي جلسه خاصه مع راكان )
جلست دانه جنب الماس وقمر ....وجلست هنادي بعد ماسلمت لانها مادخلت مع دانه لان جتها مكالمه من وحده من صديقاتها وجلست تكلمها برى ولما دخلت المجلس فاتتها السالفه
قالت قمر تستخف دمها:- اخس اخس اختنا (بات مانه) وحنا ما ندري
دانه:- (بات مانه) هههههههههههههههههههههههههه يازينك ساكته
قالت هنادي بفضولها الي انتم عارفينه :- وش السالفه علموني
وجلست قمر بلقافتها تعلمها بكل شئ......وهنادي تعلق وتضحك حتى ارتفع ضغط دانه ...وبعدها بدقايق جلست منال وسعاد معهم وكملت على راس دانه
(اكيد تتسالون عن الماس....)
كانت تفكر في ليلة امس والتهور الي قامت فيه...لانها مابغت تنهي الي بينهم بدون ذكرى اخيره .. حست انها خاينه وان قلبها تكسر الف قطعه..بس وش العمل ..الغيره تاكلها مو قادره تتحمل وهذا هو ما تزوج للحين...لا... تنهي الالم من بدري بدل ما تموت وهي تشوفه ينساها قدام عينها....
تحـبه .....تموت في تراب رجلينه ...
حست بغصه زي النار بحلقها..وقفت وهي يالله تحافظ على ملامحها هاديه مرتاحه ...
دخلت غرفة المكتب وسكرت الباب وهي نفسها تبكـي..وتبكـي..وتبكـي
ماراح يسامحها سعود للابد ...لانها استغفلته امس ..ولانها خانت عهدها معه ....بس لازم احد منهم يضحي وهي عارفه انه قد التضحيه لكن لا ....سعادته فوق كل شئ ..حتى فوق سعادتها ........الي هي حياتها بقربه لين تموت ....
بلعت غصتها بإرادة حديد ...لانها ان بكت الحين ما راح تسكت ابد ... وماله داعي تغث اهلها من الحين!
سمعت الماس اصوات جايه من برى.........وكأن انكب عليها ماء بارد ثلج.....
قالت بهمس لنفسها "نوف......اوه لا انا ناقصه..."
تصلبت في مكانها وطاحت عينها على سيوف ذهب معلقه بالجدار زينه ..وضحكت بدون نفس من تفكيرها لو ان تاخذها وتذبح بها نوف...وكأن الموضوع بهالسهوله...
بعدها بدقايق فتح الباب ودخلت دانه ...الي عرفتها الماس مع ان النور طافي..
قالت دانه برقه :- الماس ...؟ وش تسوين هنا...؟
قالت بتعب :-جـالسه
دانه :- الماس انتي من امس مو طبيعيه وش السالفه
الماس:-...........
دانه برقه وتفهم :-الماس نوف وامها واختها هنا الله يعافيك اطلعي سلمي لا تخليهن يتشمتن بك طلبتك الاخت جايه ونافشه ريشها وكل دقيقه امها ذا الحيه تسال عنك بشماته وكانك تتجنبينهن وب هالشكل تزيدين امالهن بالي يبغنه ....
قالت الماس بياس:- وهذا الي بيصير دانه ليش اضحك على عمري
قالت دانه :- انتي ما تثقين في سعود ...؟
لمس الاتهام وتر حساس وقالت الماس بقوه :- انا اثق فيه كيف تسالين هالسؤال
دانه :- لكن
الماس بتردد :- لكـ..ني ما اثق بالشياب بيظلون يضغطون عليه لين يوافق وساعتها بموت والله لموت
ضمتها دانه لصدرها لكن ارادة الماس انتصرت وما نزلت لها دمعه .....قالت في نفسها (لاحقه على الدموع يا الماس قدامك العمر كله ابكي فيه لين تشبعين لانها بتكون دنيا بلا سعود.....................! ))
وقفت الماس بسرعه وكلها اصرار تحافظ على كبريائها لاخر لحظه ....زينت فستانها الموف الضيق الي يبرز جمال جسمها الي تنحسد عليه ... عدلت شعرها الشبيه بشعر دانه ..والملفف بكثره...رسمت نظره اللامبالاة والغرور على وجهها واخذت جوالها بيدها....
لما دخلت الماس المجلس شافت اكره الخلق على قلبها ....بنت عمها وامها الي السبب في الي هي فيه ...وقفن غصب عليهن عشان يسلمن .....مشت الماس بدون نفس وراسها مرتفع بغرور كبير (انقهرت نوف من لا مبالاة وغرور الماس هذا دليل انها مو مهتمه لها ...)
بعد ما سلمت ..جلست الماس بين امها ونوف..... لان امها اشرت لها تجلس جنبها وانحرجت الماس لكنها جلست.....في هاللحظه جت جوالها رساله ..فتحتها لقتها من سعود
*اتركـ جمالكـ ياحبيبي على جنب
غير الحلا تعجبني بزود طيبكـ
كلكـ على بعضكـ تجنن وتنحب
حظي كبير اللي جعلني رفيقكـ
إن كان حبي بنظر بعضهم ذنب
يامرحبا والله بذنب يجيبكـ
ماقول غير الله يخليكـ يارب
ويعمي عيون من حسدها تصيبكـ*
ابتسمت الماس غصب عنها ... ما يخلى حركاته ورومنسيته الي ضيعتها ... ( طبعا ما يحتاج اقول لكم ان عيون نوف بتطلع من مكانها من اللقافه والحسد ..)
ارسلت له بيد ترتجف...
*غيابكـ...عني دمرني
احس العين ماتبصر ..وصار الهم لي وحدي
واحس القلب ماينبض ..وعاف الدم شريانه
حبيبــــــي..
تدري في قربك ..تمر ايام وتعدي ..
ثواني في نضر عيني ..ابد ما انلام "ولهـانـه"
تـصور ..!
يا غلا نفسي ..غلاتكـ وش كثر عندي
يذوب الثلج في القطبي .. وتدفى نفوس بردانه
خيالك مالي هالدنيا..واشوفـه وين ما ودي..
ولامنه اختفى عني ..! لعنت ابليس واخوانه
ابي تعرف قدر حبكـ..وابي تعرف انا ش ودي ..
وابي تعرف وش الدنيا بدون الورد والوانه ..
واذا والله جميع الكون وقف كله بعد ضدي
يموت الكون ومايسمع..؟
خفوقي يالملا (خـانـه)
بيسمع كيف انا احيا به .واموت فبسمته ..
وابغى يسمع كيف هو يملك..فكر عقلي وسلطانه
صحيح انثى ولكني ..وقفت بقلب متحدي
احبه ...
قلتها وهزت ..جميع الكون واركانه
وضعت الناس في كفه لجل تفهم علي قصدي
لجل تفهم قدر خلي ..رجح بالقلب ميزانه
يكفي لا نظر لي بشوق .. نسيت اسمي واسم جدي..
وذكرت اسمه واسم امه واسم ابوه واسم جده مع اخوانه
خلاص اليوم ياعالم ملكت الكون من قدي...
ما ابالغ لو عشق قلبي "ظـلالـه"
بس من شـانــه !!!*
وصلت الرساله سعود .. وابتسم بكل حنان الدنيا
(والله حرام الي يصير له ... يمكن تكون قست الماس في قرارها لكن الحب الحقيقي اهم اركانه التضحيه )
كان بيرسل لها بس جت دفعه جديده من الضيوف ووقف يسلم ....
ارسل لها بعد ما جلس...
مثل النسيم العذب..تجرح سكوني
تسرق بقايا ضحكتـــــي...وسط الاصحاب
احاكي اصحابي وهم يسمعونـي..قلبي معكـ وكنهم عندي اغراب
وعنك يحاول بعضهم يسالوني...متى..؟ووين..؟وكيف..؟ اصبحتوا احباب؟
استقبلت الماس الرساله وابتسمت وهي تحس الدمعه تتمرد بعينها...وما ردت عيه خلاص اليوم هي النهايه...نهاية حبهم وسنين الهنا الي جمعتهم ... لازم تنفيه من حياتها تحاول تنساه..وهذا الشي ماراح يتم ان ظلت تتراسل هي وياه...
..انتظر سعود ترسل له وما ارسلت....
قام دق...ماراح يتحمل لازم يسمع صوتها..
دق جوال الماس ...ياسنين عمري كفايه حزن يا سنيني...خلاص راح الذي يستاهل احزاني...
ناظرت في الرقم ...
أمير الروح -- يتصل
انتبهت نوف لاسم المتصل وحست نفسها بتحترق من القهر والحسد ...
ردت الماس بصوت هادي واطي:-هلا
سعود:-آه يا زين هالصوت
ارتجفت شفايف الماس لانها على وشك تنهار :-هـ..هلا قلبي بغيت شئ
سعود :- لا بس مشتااااااااااااااااااااااااااااااااااق لك
قالت الماس لانها وصلت حدها ولازم تطلع قبل لا تنهار قدام اعدائها :-انـ....انا كلمني بعدين
وسكرت الجوال ...
استغرب سعود ردة فعلها الماس فيها شئ مستعد يراهن بحياته ان فيها شئ وشئ كايد بعد.....
؛
؛
كانت سعاد جالسه على نار لان نوف وامها جالسات قدامها ويناظرنها باحتقار ...بادلتهن النظر با استهزاء...واشرت على الماس الي شكلها متضايقه لانها جالسه جنب نوف رغم ان هذا ما يبين الا للي يعرفون الماس زين والماس صديقة سعاد الروح بالروح..
ماصدقت الماس خبر ، قامت بهدوء وجلست جنب سعاد...
نست همومها شوي وقالت لسعاد هامسه :-اقول وش فيها ذي مطيره عيونها فيك
قالت سعاد وهي تزين تنورتها :_ عادي كالعاده الا عيونها بغت تطلع تو يوم دق جوالك
ابتسمت الماس من القهر :-حسيتها ودها تقوم وتخنقني...
قالت سعاد باستهزاء :- طبعا اكيد المتصل سعود ..
حست بغصه في حلقها :-ايه سعود
وكملت الماس بسرعه لانها ماتبي سعاد تحس بشئ لانها لو تعرف نيتها بتذبحها وبتدق على اخوها وتعلمه ...
:- غريبه ليش ما تنامون الليله هنا السفر باليل مو زين
سعاد :- ههههههههههههههههههههه ساعه ونص سارت سفر والله انك مضيعه بعدين انتي عارفه عمك مايستغني عن الشغل وزوجك طالع عليه يموت في الشغل ..
ابتسمت الماس :- الله يسعد لي عينه
سعاد :- آه ياقلبي الحب مالي الجو
قالت الماس بحب :- فيه احد ما يحبه
قالت سعاد تمزح :- حب عن حب يفرق
ابتسمت الماس وما ردت .. ايه حب عن حب يفرق والدليل انها مستعده تضحي بحياتها عشان عيونه ..
في هالوقت كان سعود مشغول البال ليش الماس سكرت التلفون في وجهه ليه ..؟
هو حسب ان كل شئ رجع مثل اول بعد الي صار بينهم البارح بالليل ...لكن الظاهر ان الي صار البارح بداية شئ راح يستنزفه للموت ....وعشان ما تعذبه الوساوس والظنون اكثر .. رجع دق عليها.....
؛
ناظرت الماس في شاشة الجوال -- أمير الروح يتصل
شافت سعاد الرقم وقالت وهي توقف :-ههههههههههههههههههه يالله العواذل بيقلبون وجيههم اشوفك على العشاء
وطلعت من الصاله .... على بالها ان اخوها العاشق مكلم بيتغزل فيه زوجته كعادتهم دايم ....ماتدري إن زمان اول تغير
راحت سعاد بتغسل يدينها قبل العشاء ولقت المغاسل زحمه...
وبما ان الرجال بيتعشوون في الحديقه لان الجو حلو قررت تروح لمغاسل الي بقسم الرجال لانها اقرب من المطبخ....
دخلت سعاد ....القسم الي ديكوراته بين البني والذهبي ...مشت والصوت الوحيد المسموع في المكان هو صوت كعب جزمتها (وانتم بكرامه) وقفت قدام المغاسل الملوكيه الفخمه وزينت تنورتها السوداء الخفيفه .. وبلوزتها الحمراء الي ماسكه في صدرها بدون تعليقات .. ملست شعرها الاسود الطويل والي كانت قاصته قصه مزوده في كثافته ولمعته وطالع خيال...ابتسمت لنفسها في المرايه كان كحل عيونها مرسوم بفن ... والروج الاحمر الجرئ الي حاطته معطيها اثاره مو طبيعيه ..
؛