الفصل
الواحد والثلاثين ..
(( قبل الاخيــــــــــــــــــر )).
"النهايات تتشابه "
تمر الايام ثقيله ...
ريااان.. بالسجن ينتظر رحمه رب العباد فيه ..ويطلب رحمته وغفرانه ..
شموخ.. تشرب من الحياه الالم .. لفقدها اقرب انسان كان لها مهما كانت عيوبه ..وعزاها لوحيد انها حامل ..
سجى .. حزنها على خالها وعلى حاله جدها الساكت .. مانستها مشاعرها لتركي وشوقها له ..ومرتاحه لتغير امها معها ..
تركي .. ماتغيب سجى عن باله لحضه وضد محاولات اهله تزوجيه حنين او غيرها .. يشتغل صحفي بمجله شعريه متواضعه بعد ماكان رئيس تحرير جريده اليوم ..
وعود.. مرتاحه مع رياض بغياب كاترين عن حياتهم نهايا .. واكتشفت ان رياض ماعنده شخصيه اذا حب .. واحترمت فيه هالشي وماستقلته ..
رياض .. طاااير بحبه بوعود وراحته معها ..
متعب.. ينتظر الفرصه اللي يستفرد فيها مع روابي ويتفاهم معها بعد سوء التفاهم ..بعد ماتخلص من لميس ..
روابي.. رااافضه تسمع متعب وتبغى تطلق منه .. مو هي اللي يستغفلها ويضحك عليها .. ومع محاولات سجى تقنعها مو راضيه تسمع ..
نور .. تنتظر زوجها ومتاكده من رجعته ..
هواجس .. عى حالها تتمنى تساعد اهلها بعيونها ..
سامي .. مبسوط مع ندى اللي تقبلت وجوده .. وحنونه معه ... كل مره بيحكي لها عن عقمه تغير الموضوع او الظروف تكون ضده..
ندى ..عامله قلق للبنات بسامي تصحى وهي تشهق اسمه .. وتنام ومافي بلسانها غير حكيه وتصرفاته ..
احمد .. مستمر بنضاله ودفاعه عن الارواح اللي ضاعت بايد مشعل وابوه ...
ربى وراكان ..خطبوا بدون اي حفلات علشان وفاه فيصل .. ام رياض كان مرحبه بالفكره ان راكان يكون وج روابي لانه صار مشهور بدبي وتقدر تطمن على ربى هاللحين وهي بعيد ه ..
يزيد .. تعالج وصحته احسن من قبل .. ماعدا فقر الدم الحاد اللي ملازمه .. مع الاكل الصحي يريحه .. كان مصدوم بوفاه فيصل .. ونفسيته ماساعدته يروح لنور ..وخبروه عن شلل عمه ارهقهه..
فهد .. مع السواليف مع رياض زوج وعود ..عرف عن طلاق هواجس .. مابانت عليه اي رده فعل .. الا انه كتم صرخت فرح بداخله ..
منى .. سافرت لبره لسعوديه .. تلحق نفسها قبل لاتبان براءه ريان ..او يمنعوها من السفر ... وتركت بنتها ..
.
.
.
.
هل هلاله ..
شهــــــر الخير والبركه ..
..انور بدره السماء ..
..واعلن وصول كرمه ..
..شهر رمضـــان ..
قمة الصبر أن تسكت وفي قلبك جرح يتكلم..وقمة القوه أن تبتسم وفي عينيك ألف دمعه ..
مدت روان لامها : ماما انا بنام لي شوي ..لحد الاذان ..
ام ريان هزت راسها بضيقه على حال شموخ : اوكي ..
شموخ طلعت لغرفتها وهي تتامل بحياتها الجديده .. ماكانها تركت امها وريان وسامي الا كم يوم .. وفيصل واهله وحياتها معه كانت حلم ..
لكن يرجعها للواقع التقلصات والضربات اللي ببطنها الكبير شوي .. المحببه لها ..
تمددت على السرير وابتسامه الم على شفايفها ..
غمضت عيونها باسترخاء ..
وكل شي حقير عملته بحياتها يمر قدام عيونها ..
ريوف ..
رسل ..
شمس ..
سجى ..
نجلاء ..
كل هذولاء مارحمتهم وكانوا ضحيه لغرورها ..
حمدت ربها انها عاشت لهالحضه علشان تحاول تصحح من اخطاءها الكثيره ..
ومابتلاها رب العباد الا تكفير لذنوبها الكثيره ..
حطت ايدها على بطنها وتنهدت بآآآهه ..(( آللهم أرحمه وأسكنه فسيح جناتك
آللهم باعد بينه وبين خطاياه كما باعدت بين المشرق والمغرب
اللهم نقه من الخطايا والذنوب كما ينقى الثوب الأبيض من الدنس
اللهم اغسله بالثلج والماء والبرد
اللهم أبدله داراً خيراً من دوره وأهلاً خيراً من أهله
اللهم اجمعنا وإياه في مستقر رحمتك))
حاولت ماتبكي انها مفتقدته .. كان معها وحولها .. مهما عمل كان زوجها .. واقرب شخص لها ..
حست بام ريان وهي تدخل للغرفه بهدوء وتغطيها كويس .. فتحت عيونها وابتسمت .. لو امها عايشه ماكان حنت عليها وحبتها مثل ام ريان ..
: ماما ترااا انا كبيره وبداخلي نونو ..
ام ريان جلست عندها تضحك : ههههه.. مانمتي ..وبعدين وش هذي كبيره والله لو عمرك مليون سنه انتي دلوعتي ..
شموخ حطت راسها على فخذ امها : هههههه ماما وين روان ..
ام ريان : اخذوها بنات اخوانها ..
شموخ عقدت حوابها : بنات اخوانها ..
ام ريان : هههههه ايوه اللي كانوا جيراننا ريوف وخواتها روان تصير عمتهم ..
شموخ ضحكت بصوت مرتفع .. : ههههههه الحمدلله والشكر .. احمد ربي ان ماعندي جده كذا ..
ام ريان : ماتدرين يمكن انا اتزوج ..
شموخ شهقت : تتزوجي ..
ام ريان كتمت ضحكتها: ايوه وش يدريك يمكن حابه لي واحد ومخططه ااهرب معه ..
شموخ ابتسمت : ماما استغفر الله انتي صائمه ..
ام ريان تذكرت : يوووه استغفر الله اللهم اني صائمه ..الا شموخ ليه صمتي اليوم الدكتوره تقول مو زين علشانك ..
شموخ بدلع : ماااما يوم واحد بس علشان خاطري ..
ام ريان : ايوه .. بس مايصير بذمتك النونو ..
شموخ : مو مشكله يوم واااحد .. ابغى اتحمس للاذان .. واكل مثل المشافيح ..
ام ريان : ههههه تراك صرتي باللونه انتبهي لصحتك ..
شموخ ناظرت جسمها.. وبطنها البارز مره كم شهر مر وهي ارمله ..كم شهر مر وهي حامل .. كم شهر مر وهي تعد الشاعه اللي يطلع فيها ريان ..
عادي مايهمها سمنت والا نحفت المهم تحس بمشاعر اي انسانه طبيعيه .. الامومه ..
: يله مصيري بسمن مثلك ..
ام ريان انفجعت : انا سمينه حرااام عليك ..
شموخ مسكت زند ام ريان : ناظري وهذا ايش ..
ام ريان : يوووه قبل ابوك يموت على هالزند ..
شموخ : ههههههههه شايب ..
ام ريان بهدوء : الله يرحمهم ..
شموخ : آآمين .. ياحليلنا ماما آرامل ..
ام ريان تغير الموضوع : قبل مانسى .. ترى خال ندى عازمنا على بيته بكره ..
شموخ : جد ياحليلهم والله ..
ام ريان ابتسمت : ايوه امها مرره عسل بس جدتهم مادري كيف ..
شموخ : ماعلينا منها المهم امها وخواتها ومشاء الله وعود مرره عسل وتحطيها على الجرح يبرئ ..
الا ماما انا ابغى اطلع من هالبيت ..
ام ريان استغربت : ليه ..؟
شموخ تحسست بطنها : مابغى ولدي يعيش مع روان ..
ام ريان : وش يدريك انه ولد .. وليه ماتبغيه يعيش مع روان ..
شموخ (( مابغاهم يعيشوا اللي عشناه انا وريان .. مابغااهم يتعذبواا ..))
: اذااا كان ولد مابغى اما بنت عادي ..
ام ريان : وش معنى ..؟؟!
ضلواا يسولفون بالقديم والجديد .. وفي احلى من ايام رمضان ..
**********************
عشاق من احفاد الشيطان ... روايه رومنسيه حزينه .. ... وخياليه
**************************
<نهاية البدايه ..
ورى كل نهايه .. بدايه جديده ..>
:معليه ياخوي ولا يهمك ..انت باذن الله برياء ..
ضرب براسه بقبضان الحديـد : لااا تقول برياء وتقهرني .. انا مـن شهور مرمي هنا ومـ
قاطعه سامي وهو يحط ايده على كتفه بثقه : لااا تخاف .. انا ورائهم ورائهم انت وش عرفك بغسيل اموال ..
ريان بين اسنانه : انا الحقير اللي استاهل .. انا..
ياليتني ماعرفتها بيوم ولاتزوجتها .. تقولي اموال موروثه وهي تشتغل بغسيل الامـوال .. آآآه لو انها قبالي قطعتها ..
سامي تنهد بضيقه لحاله : لااا حول ولاقوة الا بالله .. يــابن الحلال لاتحرق اعصابك انت بتطلع منها باذن الله ..
ريان بعد عن القبضان : اطلع منها ههههههه .. اكيد تمزح .. كل الاوراق تديني .. انا المسؤؤل قدام اللكل ..
ضحكت علي .. على بالي انا اللي استغلها طلعت هي اللي تلعب فيني ..
تكفى ياسامي طلعني من هنا بنخنق ..
مابغى فلوووسها مابغى ريال واحد والله ابيع كل هذا بس ابغى حريتي ابغى ارجع لبيتنا ..
سامي: ريان ربك يمهل ولايهمل نسيت وش قلنا لك .. لااا تلعب بالارزاق .. لااا ترمي حد بالسجن ظلم ماسمعتنا..عنـ
قاطعه ريان بعصبيه وهو يضربه القبضان برجله : لااا تعملي فيها مصلح اجتماعي وشريف مكه .. والله مو ناقص ..
العسكري اللي عندهم : اخفض صوتك ولاتصرخ ..
ريان ناظره بحقد : كل تبن مو انت اللي تسكتني ..
عارفين الاسد لما ينحبس بقفص ضيق ايش يحصل له ..
هذا ريـــــــان ..
سامي: ريااان ..!!!
العسكري اعطاه نظره وقال بهدوء : انت يبغالك تربيه من جديد ..
سامي قرب لعند العسكري : ياخوي امسحها بوجهي تكفى تكبر الموضوع وانت صايم لاتجرح صيامك ..هو بـ
قاطعه صوت ريان : لاااا تترجاه مابقى الا هذا اتركه عنه ..
سامي التفت على ريان .. بين اسنانه: كل تبن ريااان لاتزيدها ..انت
ريان : كل تبن انا اصغـر عيـ
سامي اشر له برجاء : بليز لاتعقدها اكثر .وقل اللهم اني صائم ...
ريان لف وجهه عنهم واسند ظهره على الجدار رفع رجل والثانيه نازله .. اعصابه بتنفجر محتاج لسيجاره .. لكن هو عارف انها ممنوعه هنا والعسكري الغبي هذا مارضى برشوته ..: اللهم اني صائم ..
سامي باس العسكري بخشمه : ابوس خشمك عديها هالمره هو يدخن وطبيعي بدون سجاير تكون اعصابه كذا ..
العسكري ناظر ريان باحتقار .. وابتسم بخبث : اوكي هالمره علشانك ..
سامي ارتاحت ملامحه : مشكوور .. وماقصرت .. جزاااك الله خير ..
العسكري : العفو المره هذي بس بعديها .. لكن المره الجائيه انا لي تصرف ثاني .. ويله تفضل الزياره اخذت وقت اكثر من اللازم ..
سامي التفت على ريان .. وتنهد ..
ريان قرب من القبضان ومد يدينه طلعهمم لعند سامي يحضنه ..
سامي ضمه وبينهم القبضان حاجز .. يتمنى يقلب الادوار ويكون مكان ريان ..
عنده يعمل المستحيل بس مايحس بالانكسار اللي بعيون ريان
قاله ريان بانكسار ..: ماوصيك على روان ..
سامي بثقه : ماتوصي حريص .. يله امنتك الله انتبه على نفسك ..
ريان بعد وهو يضحك باستهزاء .. ورجفته تزيد : وش بيحصل لي يعني وانا بالمقبره هذي ..
سامي : تعوذ من الشيطان ريان وادع ربك يفرجها عليك داامك صايم ..
راقب اخوه وهو يمشي لبرى .. وقلبه تتزيد دقاته ..
امله الوحيد بهالحياه ..سامي..
**********************
عشاق من احفاد الشيطان ... روايه رومنسيه حزينه .. ... وخياليه
**************************
صوت صراخهم مرتفع ..
: ارفعي السمبوسه من النااار ..
هواجس ناظرت حروقها اللي سببت لها رعب من النار : ماااقدر النار ساخنه ..
نور رفعت ايدها بتافف وهي تخلط العجين ..: ياارب توب علي .. ملاااااك تعالي ارفعي السمبوسه عن النار ..
ملاك مدخله راسها بالثلاجه وتاكل من الكريمه اللي على الكيك : ماااعرف اخاف احترق مثل هواجس ..ووع ناظري جسمها ..
هواجس ناظرت نور بصدمه ..وابتسمت بتوتر ورجعت لسندويتشات اللي بيدها ..
جرحتها كلمه ملاك ..
عارفه انها صغيره وماتقصد ..
لكن جرحتها ..
تماسكت ودموعها تداعب جفنها ..
نور عصبت من ملاك وسحبتها من الثلاجه وهي تضرب ايدها : كم مره قلتلك لاتاكلي من الكريمه ..وبعدين وش هالحكي ياقليله الادب عيــــب .. الله اللي عمل لها كذا مو هي ..
هواجس : نوور حرام عليك بزر ماتفهم ..
نور : تتعلم .. يله ضفي وجهك من هنا وصومي تراك كبيره ..
ملاك : كيفي .. دامي كبيره لاتضربي
– مرت بسرعه عند هواجس –
وعناااد فيك نوير
– ناظرت هواجس وصرخت –
..هوااجس محروقه هواجس محروقه هواجس محرررروقـــــه ..
وركضت لبره المطبخ ..
لحقتها نور معصبه ومتوعده فيها ..
مسكتها هواجس وهي تبتسم : نوووير لاتحطي راسك براس بزر ..
نور: هذي بزر .. الا قليله الادب ويبغالها تربيه ..
هواجس : نوووير لالاتكبري الموضوع ويله بسرعه خلصي العجين قبل لاتصحى امي من النوم ..
نور رجعت تعجن وهي ناويه على ملاك ..
هواجس كملت شغلها .. وهي تكابر .. نزلت دمعه منها على ايدها ..
مسحت دموعها بطرف كمها ..
بسرعه قبل لاتنتبه نور ..
صوت ملاك الصغير باذنها ..
هواجس محروقــــــــه ..وووع ناظري جسمها ..
ايوه هي محروقه وحاولت تتاقلم على هالوضع ..
بس ماهي قادره ..
قاطعها صوت امها : وش عامله معها يانور وبكيتيها ..
نور : يااااارب توب علي ورجع يزيد وارتاح من هالبزر قبل ماقتلها ..
هواجس: ههههه امين ..
.
.
.
ندى فزت من النوم على تسكيرة ملاك لباب بقوه : بسم الله انتي بشويش ..
ملاك رمت نفسها بحضن ندى تبكي: ليه نوووور ماتحبني.. انا بعد ماحبها ..
ندى تاففت من اول مارجعت من مصر لبيت خالها وهذا حال نور العصبيه مره لغياب يزيد وملاك العنيده ..
: خلااااص ياملاك لاتبكي شكلك مو حلو كذا .. خذي لك شوكلاته من شنطتي واسكتي ..
ملاك كذابه ونصابه مسحت دموعها بسرعه وركضت لشنطه نور ..متحمسه : ياااي انا احب الشكولاته اللي من بو عيون بنيه ..
ندى ابتسمت : عيونه عسليه ويله عطيتك وجهه تتغزلي بزوجي ..
ملاك : ندى هذا زوجك ماتخيل ..
ندى تاخذها على قد عقلها : وليه ان شاء الله ..
ملاك ناظرت السقف: هوو طويل مرررره وانتي همم ..
ندى : همم في عيونك يله عطيني الشكولاته وضفي وجهك ..
ملاك : لااا خلاص بسكت ..
طلعت بسرعه قبل ماتاخذ منها ندى الشكولاته ..
ندى ناظرت جوالها بلهفه وش مرسل لها سامي ..
(( حبــي .. انا طالع لسجن هاللحين ادعي لي الله يفرجها ))
ندى: آآآآمين ..الله يفرج على اخوه ويريحه ويهدي ابوي ويلين قلبه ..
قرت رسالته الثانيه ..
((أبي حبك معي يكبر
وأبي اهواك أنا اكثر
وأبي اهديك أنا دنياي
وكل اللي عليه اقدر ))
ابتسمت بحب وارسلت له ..
غرامك كل يوم يزود
ولا يعرف مدى وحدود
عيوني في هواك شهود
يارب مايوم نتغيّـر
دخلت للحمام .. تغسل وجهها وتنزل تساعدهم بالمطبخ ..
تذكرت اول مارجعت من مصر فرحانه ومشتاقه لاهلها .. وكيف صابتها خيبه امل كبيره ..
((((((((( : يبـــــــه تكفى العذر والسموحه .. ابوس رجلينك ..
الدموع ماليه وجهها وماهي قادره ترفع عيونها بعيون ابوها ..
بو نواف احتقرها وقال بين اسنانه : سعيــد ابعدها عن وجهي .. والله بذبحهــا .. والله بذبحها ..
مسكت بخالها : خالي تكفى قله يسامحني قله ..
ام نواف اشرت لاخوها : سعيد طلعها من هنا ..
بو نواف كان ماسك نفسه مايقتل ندى بكل وقاحه جائيه تترجاه بعد ماسودت وجهه ..
ندى ناظرت بامها وخالها برجاء .. وتدعي ربها بسرها يسامحها : يبه انت صائم وبشهر بركه .. ربي يسامح وانت ماتسامح ..
بوو نواف تفل بوجهها : انقلعي سود الله وجهك انا غضبان عليك ليوم الدين ..
ام نواف صرخه : لااااا يابو نواف ليه ليه ..
سعيد طلع ندى المنهاره بالبكي ..قبل مايقتلها جد ابوها .. سحبها بقوه وهي تسمع صراخ ابوها ..
بو نواف : انا ماعندي الا بنت وحده وعود وقلتلكم من قبل مابغى اشوف وجهها ..
ام نواف قلبها متفطر مررره على بنتها .. لكن تستاهل علشان تعرف ان الدنيا فيها حدوده حمراء مفروض ماتتعداها ..
ام حمد : ليه ياحمد انت عارف وش قلت لها .. غضبان عليها ياحمد غضبااان .. لو مت وانت غضبان وش بيفيدك عقابها ..
بو نواف الدنيا مسوده حوله ويتنفس بصعوبه : ومن قالك انه عقاب .. انا غضبان عليها .. –بضيقه - ماعرفت اربي ..
.
.
.
دخلها سعيد لسياره وهو يحاول يهديها ..
ندى مع خالها تترجاه والندم ماليها : تكفــــى ياخالي لايقول كذا .. – ضربت فخذها بقوه وحسره - ياربي انا وش عملت بحالي غضباان علي ..
يااارب كيف اواجه ربي .. ياويلـــــي قالها غضبان عليك قالها .. وطردني من بيته ..
ياللـــــه .. هذا ابوي .. ابوي ..)))))))))))))))
نزلت دموعها وغسلت وجهها بالمويه اكثر ..
مالها خلق تعيش وابوها مو راضي عنها ... ابوها مايبغاها ولايعتبرها بنته..
كتمت صرخت الم .. جففت وجهها وتدفت كويس ونزلت تساعد بالفطور .. وهي تحاول تبتسم ..
دخلت للمطبخ : صراخك نوران واااصل لشارع .. اعوذ بالله وش هالاخلاق اللي عليك انتي صايمه ..
نور سكرت الفرن بعصبيه : كملــــت ..
هواجس ضحكت واشرت لندى : هلا بالمخطوبه تعالي بجنبي ..
ندى غسلت ايدها وسحبت صينيه فيها خضار قطعتها وقشرتها وهي تضحك على هواجس اللي تتمصلح عندها علشان تعرف اخبارها : ههههه ارسل رسالتين ..
هواجس : اللي هم ...
ندى بخبث : ماحفضتهم ..
نور بعصبيه : علينا قولي لاتخافي مراح احسدك ..
ندى استغربت : ومن اللي قالك انك بتحسديني ..
نور بنفس العصبيه : مادري عنك كاننا بنحسدك ..
ندى تنرفزت : اللهم اني صائمه ..
ام هواجس اشرت لندى وهمست لها : كويس لاتحتكي فيها كبريت ..
ندى وهواجس ضحكوا لان نور سمعت وعصبت اكثر بس سكتت : هههههههه
**********************
عشاق من احفاد الشيطان ... روايه رومنسيه حزينه .. ... وخياليه
**************************
كلهم حول الطاوله جالسين ..
رددوا مع المؤذن الاذان وسموا بالله وفطروا ..
تقدمت لهم صحون الشوربه الساخنه ..
وعود تناظر سجى وتبتسم لها ..لان الشوربه عاملتها سجى ..من دون محد يدري ..
سجى عضت شفايفها وهي تراقب امها تشرب من الشوربه بهدوء .. كان اختبار بالنسبه لها ..
نقلت نظرها لابوها اللي كان يشربها بتلذذ ..
وابتسمت بفخر عجبتهم شوربتها مثل مايعجبهم اكل الطباخ ..
اما رياض كان عاكف يدينه لصدره مايحب الشوربه .. وينتظرهم يخلصوا منها علشان يقدموا للخدم الطبق اللي بعدوا ..
تقريبا الهدوء مالي السفره ..
دخلت ربى مستعجله وهي لافه المنشفه على شعرها وبالبيجامه الثقيله .. و عيونها منفخه من النوم ..
: سوووري راحت علي نومه ..
بو رياض ابتسم لها : اكيد تروح عليك نومه وانا امس سامعك تحكي مع خطيبك بعد الفجر
ربى ابتسمت له وهي تاشر للخدامه تغرف لها من الشوربه : ههههههه بااابااا ..
ام رياض ناظرت بربى : ربى ايش هذا كيف تجلسي على السفره والمنشفه بشعرك مانتي بزر اعلمك ..
رياض يتحرش : جد ربى اقرفتينا ..
ربى ابتسمت : مامعي وقت امشط شعري ..
ام رياض : مادري وش عاملك راكان اللي ماعندك وقت تسرحي شعرك ..
وعود ناظرت بسجى وكتموا ضحكتهم .. بعد الفطور امس كان الباب مفتوح وربى جالسه مع راكان ومندمجين ..
ربى : لااا ماما مو من راكان انا ..وبعدين راكان بكره ماشي لدبي ..
سجى : بتروحي معه .. والا..
ربى : لااا جدوا سافر وماقالي ارجع للامارات ..
ام رياض ضلت تناظر الشوربه : شكله مايبغاك تكملي هناك .. اتوقع يسكرها من جديد ..
ربى بلامبالاه شربت من الشوربه: براحته انا كذا والا كذا ماقدر اسافر ..
سجى: ليه ..؟
ربى ابتسمت بخجل : راكان مو راضي – قالت تغير الموضوع – الشوربه طعمها غريب امم امم ..
وعود وسجى بنفس الوقت : حلوو ..
ناظروهم مستغربين ..
ضحكوا ثنتينهم باحراج ..
ربى: ايوه يجنــــن فيه نكه يمممم ..
سجى انبسطت مره من مدح ربى لان زوجها طباخ وقالت عن شوربتها حلوه ..
رياض بهمس : وش قصتكم انتي وسجى مع الشوربه ..
وعود : ســر ..
رياض ناظرها بتمعن : علي ..
وعود بهمس اكثر: لاااا .. سجى عاملتها ..
رياض : لاااا – رفع راسه مبتسم لسجى – من متى ..؟!
وعود ضغطت على رجله يسكت ..
سجى استغربت : ايش من متى ..؟
رياض ابتسم بخبث : سلامتـــك ..
بو رياض اشر للخدم يرفعوا الشوربه ويقدمواالسلطه ..
رياض ناظر بوعود طفشان .. يبغى يفطر بغير المويه .. مايحب الشوربه ومو مره مع السلطه ..
همست له وعود : بكره نفطر فوق ..
رياض ابتسم تفهم عليه : يكوون احسن ..
بو رياض : من ساعه وانتم تهمسون خذ زوجتك واطلعوا لفوق ..
رياض : هههههه بكره ان شاء الله نفطر فوق ونريحكم ونرتاح ..
ربى : وين ميتو ..؟!
سجى رفعت حواجبها : ههههه بحااائل ..
ام رياض : روابي لهالحين زعلانه مادري ايش اللي غيرها هالبنت ..
بو رياض : مثل امها .. اختي واعرفها تربتها عليها ..
ربى تستغرب من امها .. مع انها سيده مجتمع الا انها ماتزوج عيالها او بناتها الا من مجتمع عادي .. يمكن لانها متزوجه واحد عادي ..
سجى : ماما بطلع لبيت رنيم اليوم ..
ام رياض : اوكي ..
رياض من شدة طفشه .. شرب مويه وهو يقول : من هذي رنيم ..؟!
سجى رفعت كتوفها : ليه تسال ..؟!
رياض : عادي سوال ..
سجى استغربت من رياض ..: وحده من البنات كانت معي بالجامعه وعامله بارتي ..
رياض : اهاا وعودتي ليه ماتروحي معها وتغيري جو ..
وعود : لاااا ماحب
سجى : جد وعود فكره تعالي معي واعرفك على كل صحباتي ..
وعود : لااا مو جوي ..
ربى : وعود مثلي .. ماتطيق تجمعات البنات كذا ..
سجى : بالعكس حلوه العلاقات ..
رياض : ايوه صح العلاقات تجيب الدراهم ..
بو رياض : مافي بزنز بين البنات يارياض
**********************
عشاق من احفاد الشيطان ... روايه رومنسيه حزينه .. ... وخياليه
**************************
ابوك لابو من ترجى حنانك
لا ابو قلوب بالهوى تشكى الضيم
ذنبي بالحب عليت شانك
ومثلك ولايحتاج في الحب تعبير
: الحمد لله على النعمه ..كثير الله خيركم
عبدالرحمن :ويـــن يارجال ماكلت .. اللحم ماتحرك ..
متعب ضرب بطنه وكرشه البارز : لااااا اكتفييت .. والله مافيه سعه .... سفره دايمه
عبدالرحمن : برااحتك - صرخ وهم يمشوا للمغاسل - ياااولد قلهم يجهزوا القهوه ..
غسلوا ايدهم ..
وتقهوا مع عبدالرحمن .. ضحك وسواليف ..
من يعرف متعب ومايحبه ..
متعب قال بعد فتره ..: اذا ماعليك امر عبدالرحمن تنادي لي روابي ..
عبدالرحمن وقف : ابشر تعال معي ..
اخذ متعب لمقلط الحريم ونادى روابي اللي جاءت بعد ماغصبتها امها ..: يله بالاذن ..
متعب : الله معك
روابي دخلت معصبه : السلام عليكم ..
متعب وقف لها ومد ايده : وعليكم السلام
مشت بهدوء لعنده ..سلمت بسرعه وسحبت ايدها ..
متعب : افااا ياذا العلم كل هذا زعل ..
روابي ماردت عليه وجلست ..
متعب جلس عندها : يااحلو اللحم من ايدك ربروبه ..
روابي : مو انا اللي مسويته ..
متعب حك راسها : لاااا .. وانا داقها بالخمس قلت انه انتي ..
روابي تاففت : خير وش تبي جائي ..
متعب يتميلح عندها : يرضيتس حالنا يابنت خدوجه .. يرضيتس ..ظالمتني وزعلانه بدون ماتسمعي لي ..
روابي : انا ماظلمت حد وشفت بعيوني ..
متعب : واللــه واللــــــه اللي خلقني ماااعرفها هي تضايقني من زمااان ..
روابي : ايوه صدقت ..
متعب : اقسم بالله جعلي افقد عيوني ..
روابي خافت عليه يدعي على عيونه بس قالت باستهزاء : اجل اول ماتطلع بتنعمي ..
متعب وقف ومشى لعندها وهي مشتاقه له ..
مسك ايدها وضغط عليها : ورررربي مافيه بالقلب غيرك .. والله مامعي هالحركات وماتعجبني ..
روابي تسحب ايدها : لاتحاااااول ..
متعب : جيبي المصحف واحلف لك ..
روابي : قالوا للحرامي احلف قال جائنا الفرج ..
متعب : ياللليل ربوربه كيف تصدقي ..؟!يعني بحلف كذب ..
روابي غرقه عيونها : تقلك حبيبي ونور عيني وتقولي ماعرفها ..
متعب تنهد : الله يستر عليها راحت للمكان اللي تستاهله ..
ماكان يبغى يحكي لها ويبغى يستر على لميس .. بس اضطر يحكي ..
: هي ناشبه لي من شهور وحاولت معها بكل الطرق ومافكت ..
هي بنت مو كويسه جراره .. وحركاتها مشبوهه .. وانا دخلت مزاجها ..
خبرك خطيبك صاااروخ ومهبل ببنات حواء ..
لما عرفت انك دريتي عنها وقريت الرسايل وعرفت انها تبغى تستفزك لانك ملقوفه ورديتي عليها ..
بلغت عن فلتهم المشبوهه ومسكوهم الهيئه ومع التحقيق سجنوها الله يستر على بناتنا ..
اقسم بربي انا هذا اللي حصل .. وجعلي افقد عـ
قاطعته روابي وهي تسكر فمه بدلع : لاااا لالالاتقول تسذا ..متعب ابغى عيونك ..
متعب ابتسم : صدقتيي ..
هزت راسها وناظرت الارض تعرف متعب رجال وسنافي ومايكذب : وانا اقدر ماصدقك ..
متعب : يالبيه القزاام انا وحشتيني ..
روابي : وانت اكثر ..
متعب : اذا صدق وحشتك .. ابغى صحن لقيمااات من ايدك الحلوه ..
روابي اشتاقت لهجيته : هههههه ثواني ويكون عندك ..
**********************
عشاق من احفاد الشيطان ... روايه رومنسيه حزينه .. ... وخياليه
**************************
:أووه غريبه صائمه اليوم ..
ابتسمت لسامي وهي تاكل روان البطاطا المهروس : شايف كيف جائني الفرج
سامي: بس مو كانه.. مو كويس على بزرك مش عارف ايش ..؟!
شموخ : ههه ايوه مو كويس علشان مايصير عنده جفاف ..
سامي باستهبال : يعني ايش جفاف .. كيف تجف المويه والا ايش ..؟!
شموخ قرفت هم على اكل وسامي يسال سئله مقرفه : سواليف حريم اذا حملت ندى ان شاء الله تقولك ..
سامي بهدوء غريب وهو يشرب الفيمتو : ماااراح تحمل ..
شموخ شهقت : ليه ليكون انت من جدك ماتبي عيال
سامي كمل اكله ساكت ومارد عليها وفي كلمه بداخله تتردد ..(( عقيـــــم ..))
ام ريان كانت تقلب بالاكل سرحانه مو معهم ..
شموخ ناظرت امها وعارفه انها ماتستلذ اللقمه ولا تحس بطعمها لان ريان محروم منها بالسجن ..
قالت باستهبال تخفف عن امها : مااااما ..
ام ريان رفعت راسها : هلا ..
شموخ : ليه ماتاكلي كل هذا تفكري بعريسك ..
سامي : عريسها ..؟؟!!
ام ريان ضحكت : ههههه ايوه عريسي .. مادريت انا بتزوج ..
شموخ : واذا ماوفقتوا بتهرب معه ترى ..هههههه
سامي ناظرهم : من جدكم ..؟؟!!
شموخ : لاااا بس ماما اليوم تقولي تحب واحد وبتهرب معه ..
سامي: افاااا يايمه بتمشين ورى بنتك نجـ
وبلع كلمته .. كان بيفجر مصيبه عليهم هاللحين ..
ام ريان : بنتي مين ..؟
سامي: ماعليكم مني بديت اهلوس مشتااق لندوش ..
شموخ : ايوه قل كذااا .. ترى بكره معزومين عندهم حنااا ..
سامي : بكره مرافعة ريان ماقدر ..
شموخ : جد بكره الله يطلعه بالسلامه لبنته ..
سامي ابتسم : قصدك لبنتينه ..
شموخ مابتسمت لسامي الا الضيقه ملت صدرها ..
بنته ..
ليه هو يذكرها علشان تكون بنته ..
هو رماها ومايبغاها ..
وهي ماتبغى تفرض نفسها عليه ..
**********************
عشاق من احفاد الشيطان ... روايه رومنسيه حزينه .. ... وخياليه
**************************
يقول اللى به الهم منصابي "" دنياه شاف العجايب من مصايبها
ما في شيء وإلا له اسبابي "" مير ان لى قصه معروفه سبايبها
والله لولا الحيا لشقق اثيابي "" وان الدروب العسيره حيل لضربها
ناظر بالاكل وهو ضاغط على زنده ..
تمر ..
لبن ..
خبز ..
لقيمات ..
وش هذا فطور والا ايش ..
كيف بيشبع معدته الجوعانه ..
وجسمه كله يصرخ الم .. جوعان وتعبان ..
نفسيته محطمه بالارض ..
ابتسم وهو يسمع صوت الشايب اللي نقلوه معه اليوم ..(( ابتلت العروق وذهب الضماى وثبت الاخر ان شاء الله ))
الشايب الجداوي وهو ياكل التمره: كول يابني الرسول عليه الصلاه والسلام كان يفطر بالاسودين التمره واللبن .. وفي احسن من سنتوا عليه الصلاه والسلام ..
ريان بهدوء : عليه الصلاه والسلام ..
اخذ التمره واكلها بدون نفس ..
الشايب : لاتتبطر على النعمه غيرنا مو لاقي المويه ..
ريان استغرب من التزام الشايب وشلي رماه بالسجن ..: ياعمي وش اللي رماك هنا ..
الشايب : الديون ياولدي ياريان الديون قسمت طهري ..
ريان ابتسم له وهو يغمس اللقمات بالشيره او العسل : من وين عرفت اسمي ..
الشايب ابتسم له بالم .. وعيونه لمعت بعتاب : انا كونت بالشركه هي اللي انت اشتريتها من الست صاحبتها ..وكان اسمي من اللي انطردوا ..
ريان حس بقطعه اللقيمات توقف بحلقه ..
و كلمات الشايب تحرق صدره ..
ياللـــــه وش هالحقاره اللي كان فيها ..
قطع ارزاق ناس كثيره .. وهذا رب العباد يرد له الدين ..
اللي قضى على مستقبل عيالهم وشتتهم جالس قباله ويعاتبه ..
((لااااا ياربي يكفي عذاب السجن اعيشه لاتقتلني كل لحضه وانا اناظر بالشايب ))
نزل عيونه للارض وهو يرجع باقي قطعه اللقيمات بالصحن ..
وين يودي وجهه من رب العباد وهو عامل كل هذا ..
الشايب : يابني كمل اكلك ربنا مايبتبلي الا العبد الا يختبروا يصبر والا يجحد .. والفرصه قودامك ياولدي ..
هز ريان راسه وهو مخنوق .. مكتوم اكثر من السجن ..
البرد اللي مالي الزنزانه صار حار ..
والهواء انكتم عنده ..: ربك كريم ..
**********************
عشاق من احفاد الشيطان ... روايه رومنسيه حزينه .. ... وخياليه
**************************
وش حيلة اللي هام في حب مخلوق
فرقاه موت وجيته مستحيله!
سجى انقهرت لما عرفت ان السايق موقف سيارته بره القصر .. مو بالباركنق او بالمدخل ..
مشت مستعجله برى البوابه الضخمه وهي تسب السايق .. بس رحمته لانه جديد ومايدري وش القصه ..
ماعندها وقت تجهزت بساعه لانها متاخره على البنات ..
حصلت البي ام السوداء واقفه وانوارها مشغله .. داخلت بسرعه وسكرت الباب : بسرررعه لبيت رنيم ..
تركي ماستوعب
صوتها ..
ريحتها ..
حركاتها ..
التفت لورى بسرعه ..شافها مو منتبهه له كانت تزين اظافرها بالمناكير الاحمر ومندمجه ..
قفل الابواب وحرك السياره بسرعه يبعد عن القصر ..كان جائي ياخذ السياره من متعب علشان تكون له واجهه اجتماعيه لما يحظر امسيه لاكبر الشعراء ..بس يبيع الامسيه دامه حصل فرصه يحاكيها فيها ..
سجى مانتبهت لانها باختصار ماتناظر السايق ولاتهتم له ..
دق جوالها ردت بسرعه وهي تنفخ على اظافيرها : ايوووه ثلث ساعه وانا عندكم ..
:........
سجى : كيف .. من فيه غير هيونه ..
:.......
سجى : جد ههههههه مشتاق لها مووت .. انا بالطريق ..ايوه تقريبا بقالي امم ..
التفتت لنافذه كان الطريق غير الطريق المعروف ناظرت بالسايق : انت هيـه ويـ ..
انلجم لسانها وهي تناظر بالغميزات والذقن العريضه اللي حافظته من كثر ماادققت فيه ..
تــــركي..
كيف وليه . وش هالغباء دخلت سيارته ..
سكرت فمها على صرخة رنيم : سجووو وينك ..
سجى ببلاهه : قريبه باي ..
سكرت السماعه بسرعه ..
تركي التفت لها وقال بصوته المبحوح : اخبارك نانه ..؟!
سجى غمضت عيونها بقوه وهي تقوي بصوت مرتفع : احلم احلم احلم احلم ..
تركي اشتاق لبرائتها وطفولتها ..
اخذ نفس طويل وهو يحس الجو مكتوم : لااا مو حلم نانه انا تركي ..
سجى فتحت عيونها
هوو تركي .. صوته نظرته ..
حست بجسمها ترتفع حرارته وبطنها يمغصها ..
فتحت النافذه وهي تقول بعصبيه : رجعني لليبت ..
تركي برجاء وهو عارف انها مشتاقه له اكثر منه : اوكي نانه .. بس ابغى خمس دقايق اتفاااهم معك ..
سجى حست ان الهواء خلص من حولها ..
تحرك مشاعرها كلمه نانه منه ..
قالت بعصبيه تكابر .. : لالالاااا تقول نانه ..انا سجى .. وبليز رجعني للبيت ..
تركي: خمس دقاايق بس هذا اللي اطلبه ..
سجى بقهر : لاااا مو انا زباله وغذره ومنحطه وبدون اخلااااق وش تبي فيني ..
مو تخلصت من العار اللي مسكنه عندك وش تبغى ..
وقف تركي السياره على جنب بمكان بعيد عن الازعاج ..والتفتت عليها :انا اســف ماسمحت لي الفرصه اعتذر لك ..
سجى ميلت فمها باستهزاء وغرقه عيونها : اسف على ايش انت قمت بالواجب وزياده ..
تركي بجديه : لاااا جد اسف كنت نذل وذليتك .. اعذريني على كل دمعه نزلتها من عيونك
سجى رفعت اصبعها المرتجف : تذكر وش قلتلك .. اذا عرفت اني بنت وجئيت تعتذر مراح اسامحك ..وانت وش رديت علي ماتذكر ..
تركي ببحه : ايوه عارف بس انا ماقدر ااعيش بدونك ..سجى والله ماعرف النوم مفتقدك .. كل شي يالبيت يذكرني فيك ..
سجى نزلت دموعها بسرعه .. تمنت تسمع هالحكي من زمان ..لكن جاء متاخر ..
تركي : تمنيت اكون بجنبك بعزاء خالك فيصل .. اضمك وامسح دمعك .. ابغاااك ياسجى ابغاااك ..
لما ماسمع رد منها ..
قال برجاء : اعطيني فرصه ..
سجى اتعبها الفراق وحالهم المسكين ..
طفشت وهي تبكيه كل ليله وتناديه ..
قالت بحده : وكرامتي ..
تركي بجديه : على عيني وراسي ولك اللي تبين ..
سجى اخذت نفس طويل تجمع شتات نفسها : ابغى ترجع تخطبني من جديد وتدفعي لي مهر وشبكه .. وتعمل لي حفله زواج وملكه ..
وماسكــــــن عند اهلك نهايــــــــــا ..
عجبتك والا كيفك ..
تركي ابتسم وكان روحه رجعت له : بــــــس ماطلبتي والله .. لك اللي تبين ..ورب العزه والجلاله من بكره جائي لك خاطب .. وشهر عسل اي مكان تحبيه ..وايش تبغي بعد ..
سجى قلبها دق بسرعه وش هالجنون اللي هم فيه ..
من جدها هي جالسه وتركي قدامها ...
تتشرط عليه بعد ماطرده جده من شغله ..
بيجي يخطبها بكررره ..؟؟!!
وش هالجنـــــااان الرسمي ..
قالت بهدوء:رجعني للبيت هاللحين وبسرعه ..
تركي حرك السياره وهو يقول بهدوء : اسمك من جد عليك ..
سجى فكرت ..وش يقصد اسمها عليها
الليل سجى.. وش دخله فيها ..
طوال الطريق كان الصمت والسكوت ابلغ لتواصل ارواحهم ..
اهم شي يرجعوا لبعض مايهمهم كرامه ولا شي. ..
اللي ذاقوه بفراق بعض مو سهل ولااا حد يدري عنه ..
**********************
عشاق من احفاد الشيطان ... روايه رومنسيه حزينه .. ... وخياليه
**************************
من يقول ان الحق كذبه ..
من يقول ان لعدل مفقود ..
من يقول ان القلب ماينسى من حبه ..
ويزحف لجل يرجع حق مغليه ..
من يقول ان حنا مو ببلاد الخير .. والعدل والنور ..
من يقول ان الواسطه حل وان العدل غايب ...
.
.
.
ضم المحامي بحماس وهو مافي بلسانه غير الحمد لله الحمد لله ..
خلاااااص الـــــــحق بان ...
وبهت البــــــطال ..
بهالشهر الكريم بانت الحقيقه ..
وانسجن مشعل وابوه ..
سجد سجود شكر لرب العالمين .. وهو يبكي نجلاء اللي ضاعت منه ..
ررفع من السجود ولسانه يكبر للحق : الله اكبـــــر..
اليوم انتصاره على اعدى الانسانسه غيررر عن اي نصر ..
مايصح الا الصحيح ..
كان مفروض من زمان اتبع هالخطوه ..
صحيح من شهور يركض ويطالب ..
لكن صدق من قال "ماضاع حق وراه مطالب .."
دق على لمى بمصر بسرعه يبشرها ...
واي بشاره هذي اللي لو نجلاء عايشه ان بكت منها ..