منتديات بنوته - عرض مشاركة واحدة

04-11-2011, 11:07 AM

الريال شوي شوي يجرب صوب سور مزرعة بو سالم ..روضة بتندس بس عبايتها شبكت
فالحديد مال آلباب
و روضة تسحب عبايتها بس العبايه لازقه وما رضت تتبطل والريال خلاص استوى جريب
من الباب ..
روضة : الله يلعنج اووف ( وتسحب العبايه )..
الرريال خلاص وصل جهة روضة ..
(وما ننسى روضة بس بأيد وحده والايد الثانيه مجبسه ..).
نزلت وتكورت على عمرها عسب ما يشوفها وغطت ايدها لانها بدت تعورها وبالقو بعد

الريال انصدم من هالبنت لانها روضة وسط الباب يعني بين مزرعتهم ومزرعة بو
سالم ..!!
الريال جرب من روضة ..
الريال : منو انتي هـــآه ..؟
روضة خلاص بتموت هالصوت مب غريب عليها تعرفه !!
الريال : ايـــــــه الحراميه ..لكن والله غريبه حراميه وبنت مليالدير !!
روضه بتموت هالصوت مب غريب عليها وخلاص عرفت منوه الحقير إلي جدامها ..بس ما
تروم ترفع رأسها من الفشيلة ..روضة لحد أحين ما تحركت ..
الريال يى صوب روضة ..يبا يطالع منو هالحراميه..
الريال يى بيمد ايده بس روضة ما سمحت له ..بسرعة رفعت رأسها ..
الريال : مصــــــــــــــــــــــــــــــــــــــــــــــــ ــــــــــدوم
من الي جدامه ..!!!
الفيصل : أنتــــــــــي ..!!
روضة بسرعة نزلت رأسها ما تحب اي شخص يطالع عليها جيه ..
رفعت ايدها بتدخل شعرها بس ايدها مجبسه يعني ما تروم تسوي فيها شيء واليسار
ما تعرف تستخدمها وايد ..
الفيصل بصدمه وبخوف : بلاها ايدج ..؟!!
روضة مقهوره منه ما يحق له يطالع عليها جيه وفخاطرها قالت : انا مب من محارمه

روضة نزلت راسها عسب ما يشوفها ..
الفيصل فهم حركة روضة وقال : يالله يالحرامية مسويه عمرج محترمه وانتي حادره
مزارع الناس هــآه ..
(روضة ما غاب عنها اهتمام وسؤال الفيصل فالبداية بس عقب تغير مره وحده )
وقالت فـ خاطرها :اوووووه سويله طاف ..مايهمني المهم انا واثقه من نفسيه ..

روضة متعوده لو استوى ما استوى مستحيل ترمس ريال دوم متعوده تسوي حق كل الناس
طااف بس هذا الظاهر وايد عطته ويه فوق 4 مرات رمسته ..
روضة بخاطرها : والله يالفيصل انا وايد عطيتك ويه وجان تتحراني برد عليك فإنت
غلطان لاني مستحيل فــ يوم من الايام ارمس واحد ..
(و لا زالت منزله راسها ومقهوره تباه يفهم ..
يعني سير عيب جيه يالس تطالع عليه ..)..

الفيصل فهم حركة روضة يوم منزلة رأسها ولا رفعته هذا دليل على ان البنت ما
تباه يشوفها ..
الفيصل سار وودر روضة مكانها ما متحركه فالارض .. عسب تأخذ رااحتها ..
(اول ما حست انه الفيصل سار رفعت رأسها تطالع على ايدها مررت عيونها بحركة
جدا بريئة ومب متعمدة على فوق ..بس انصدمت انه الفيصل بعده يالس يطالع عليها
..بسرعة بعدت عينها عنه..
والفيصل ما تحرك من مكانه يالس يطالع ع الملاك إلي جدامه ..
روضة بدت تحرك ايدها تبا تسحب العبايه ..الفيصل فهم وسار عنها ..
روضة ما رافعت رأسها تخاف يكون موجود وطيح عينها بعينه لانها تكره اي شخص
يطالع على عيونها ,,بس طالعت انه ريول الفيصل بدت تختفي ..
روضة : آووف الحمد الله ..
بدت تحرك ايدها اليسار وتحاول تسحب العبايه بس ما فيه فايده ..والعبايه نصها
من تحت اختربت يعني من الجانب كامل تبطل ..
روضة بقلة صبر : آه ياربي تساعدني ..
( العبايه من الجانب انفتحت يعني جنها روضة متعمده تسوي فتحه ..
ولا والقهر روضة لابسه برمودا يعني صدق تورطت ..).
واخيرا وبعد محاولات العبايه انفصلت من الحديد مال الباب وبسرعة البرق روضة
تحاول تنش مشت تحت الشير عسب محد يطالعها بس انصدمت انه منصور ياي صوبها وهي
تحت السور إلي يفصل بين مزرعة بو سالم وهذا الي ما يتسمى الفيصل ..
منصور: آفــا ليش الحلو زعلان ..
روضة تغير الموضوع لانه منصور لحد أحين ما انتبه للعبايه لانه الصوب الثاني
إلي مخترب ..
(رفعت روضة جتفها اليمين ولفت راسها صوب جتفها وايدها اليسار رفعتها جنها
بتعلق شي ..وابتسمت ابتسامتها المعتاده يظهر الجزئ اليمين من اسنانها البيضه
)وقالت بدلع : مب زعلانه ..
منصور غطى ويه بأيدينه الثنتين وحركهم من فوق لحد تحت بحركة بطيئه: آآآآآه
اذوب انا ع هـ الدلع .. (وبـ عياره ) ممكن بوسه ..؟
روضة بدلعها الرباني : ههههه ممم ويت افكر ممم اوك عادي ..
منصور جرب منها وباسها على خدها : فديت هالويه ..
روضة : خلاص بس عاده هههه..
منصور مسك ايد روضة :قومي بنحدر داخل سمعت فيه سبرايس حق دلوعة ابوها داخل
القصر ..
روضة اعتفست : هــآه لا ما اروم ممم ( تحاول تخلي عمرها نورمل ) .. مم انت
سير وعقب انا بتبعك ...
منصور: روضة غلايه انا حاس وراج شيء قولي لي ولو انا ولد خالتج ..
روضة : منصور مممم طالع ولفت صوب عبايتها الي مختربه ..
منصور: حشى شو هــآ شو مستوي ..؟!!
روضة : والله طحت مب متعمده ..
منصور : روضة تراج مخترشه امس مجسره ايدج واحين ريلج ارحمي عمرج ..
روضة : منــــــصور ..
منصور: واااا فديته انا , روحه عمره امري تدللي ..
روضة خلاص ما تروم تتحمل حركات منصور ..صدق حركات خبلان : ههههههه
منصور : لااا روضة بدت تضحك عاده متى بتسكت ..
روضة : هههههه الله ينطبك
منصور: لحد ما تخلصين ضحك دقي على عواش تزهب لج عبايه وانا بسير ايبها ..
(دقت روضة على عواش وسار منصور ايب العبايه )..
بعد 5 دقايق رد منصور : يلا اندوج يودي العبايه ..
روضة : يعلني ما خلى منك تسلم غلايه ..
(لبست روضة العبايه فوق عبايتها الي اختربت )..
وسارت ويا منصور داخل ..
بس تركت ناس صدق بهاللحظة حقدت واحتقرت روضة ومنصور ..
(الفيصل )شهد كل المحادثه إلي دارت بينهم لحد ما منصور قال لروضة انا ولد
خالتج تركهم بعدها الفيصل وهو محتقر روضة وجرائتها إللي سمحت لمنصور يبوسها
وتراويه العبايه وهي لابسه برمود وهو بس مجرد ولد خالتها ..
طبعا الفيصل هذي وجهة نظره أو نقدر نقول جميع الناس تحكم من جهة وحده دون ما
تعرف الجهة الثانيه من الموضوع والفيصل كل إلي فهمه انه روضة مجرد بنت خالة
منصور مب أخته ....

ويـــــا الفيصل
حدر الفيصل الفله وقال فـ خاطره : هههه مسويه عمرها شريفه مكه من جدامي ومن
ورايه محد ما يبوسها ... لا والقهر العبايه كلها متطبطله وتراويه عاادي والله
اعلم بعد شو وراها ...

اول ماحدرو منصور وروضه جان حمدوه ويزوي ينشن ويسيرن صوب روضه : أيييييييه
وين كنتي ..
روضه : ممم سالفه طوويلـه عقب بقولكن ..
بوسالم يزقر روضه : روضـــــه رووضــه
روضه : لبيـــــه
بوسالم : لبيتي حاايه غلايه ..
تعالي اباج شوي ..
روضه سارت ويلست حذال ابوها ..
ولوا عليها بأيده اليمين وقال : روضه انتي مايتتي هالمزرعه من اربع سنين
تقريبا وانا حبيت اسويلج شئ ضغير كـ هديه
روضه مسكت ايد ابوها وباستها وكملت بـ صدق ..: غلايه ليش تعب عمرك مب كافي
اللي تسويه حقي ..
بوسالم : مم اسمعي انتي تذكرين جناحج اللي فوق ..؟
روضه : هيه ابويه اذكره ..
بوسالم: عيل سيري فوق وبتتطالعي اللي يسرج ..
ولاد عم روضه وعمامها وخالاتها كل واحد فيهم كان مشغول بشئ ..
بس شدهم بوسالم يوم زقر روضه ويلس يرمسها بهمس .."
عبدالباسط يرمس سيف : شكله وايد متعلق فيها ..
سيف : هيه الظاهر جيه حتى هي طالع عليها ..

روضه : بسير اطالع وبيي اوكي ابويه ..
بوسالم : سيري غلايه ..
طلعت روضه هي وحمدوه ويزوي فوق ع صوب الجناح ..
روضه : بنات احين جناحيه مكانه ولا غيروه ..
يزوي : لا تعالي مكانه ..
اول ماوصلت روضه خذال باب الجناح قالتلها حمده : روضه ويت ..
روضه : ليش ..؟
اخاف شي مازين مسويلي لو انه ابويه مستحيل يسويها ..
يزوي : خخخخ لا تخافي بس غمضي عيوونج .."
فتحت يزوي الباب اللي كانت مغمضه عيون روضه وحدرت روضه وكانت تحرك ايدينها ع
جدام عسب تحسس الاشياء ..
يزوي : مستعده ..!
حمدوه : 1 ... 2 ...
يزوي تكمل : 3 ... 4 ... 5 أفتحــــــــي
اول مافتحت روضه جان تتطالع ...

الفيصل داخل القصر مالهم وكان يبا يطلع فوق جناحه بس سمع صوت اخته ميره تزقره
..!
ميره : الفيصـــل بلاك غلايه ..؟
( ميره 19 سنه سنه اولى جا معه ما تقل ابدا عن اخوها فالجمال متوسطه الطول
يعني مب وايد طويله ، وبيضـه ، وعيونها جريبه اخوها عسليات جنهن محددات
بالاخضر الغامج يعني ماشاء الله عليها قمه فالجمال شرات اخوها .." )
(الفيصل ابتسم بحنان عكس الضيجه اللي فداخل قلبه ومايدري ليش كل هالضيجه )

الفيصل : لبيــه .. عيونه .. امري تدللي ..؟
ميره ابتسمت بحب : فديتك والله وفديت هالطيبه .. بلاك غلايه جيه مضايج ..؟
الفيصل : هاه .. لاقلبي .. ولاشي .."
ميره جربت من اخوها اللي كان يالس فالغنفه وبمرح قالت : اعترف بنت منو هالمره
تبا تأدب هـآه .. بس غريبه احيدك يوم تصيحهن تستانس بس اطالع العكس ..؟
الفيصل يت على باله روضه : ميــره ..!
ميره : لبيـه .. عيوني لك ..؟
الفيصل : تسلمين بس ابا منج خدمه (وابتسم بخبث )
(وميره فهمت عليه ) : لاااا مره ثانيه بتورطني مافيه حق المشاكل نسيت اخر مره
يوم البنت قالت حق ابويه وقلت مب انا ميره كانت ربيعتها وتضاربن وانا يحليلي
اول مره بحياتي اجوفها ..
الفيصـل : هههههه بس هذي غير اوعدج بتستانسين واايد عليها ..!
ميره : ههههه لا الظاهر البنت شئ مسويه فيك ..؟
الفيصل بغرور وثقه : تخســـــــي .. بس صدقيني هالبنت بتندم وغير عن كل ندم
ندمته اي بنت .."
ميره وهي متحمسه : متوو هالبنت دخيلك قوولي ..؟
الفيصل : طالعي ترا البنت ما اي شخص يروملها واللي عرفته انها فقمه الغرور
والثقه والبذخ الشديد ..
ميره : حـــــــــشى منو هااي ؟
الفيصل : تعرفين المزرعه اللي حذالنا ؟
لا تقول مزرعه بوسالم المليالدير
الفيصل ابتسم : حتى انتي تعرفينه ؟
ههههههه هو بشحمه ولحمه ...
ميره : وانا اقول ليش الفيصل يالس له جم يوم يخطط ويرمس ابويه عن المزارع لحد
ابويه ما قاله اختار المزرعه وانا عليه البيزات ..
عسب هالسالــــــــــــــــــــفه واناااا اقووووول .."
واللله الظاهر هالبنت مب هينه الظاهر شئ قوو
الفيصل : الا بس قوو اقولج حتى ماترضى اترد على الشباب
تقول الشباب مب من مستوايه ..
ميره : خيبــــــه .. حتى يعني مارضت ترمسك ؟
الفيصل بخيبه امل : مارضت
بس فديتج انا الفيصل ولو ...
ميره : والله غريبه اول مره ما طالع بنت تربع وراك
الفيصل بقهر : لا اللي يقهرني صج برودها اللي يذبح
ميره : ههههه الظاهر مارمت عليها ولاول مره تغلبك بنت ..
الفيصل : ههههه حبيبتي مب انا الفيصل اللي تغلبني بنت طالعي بس طالعي
(وراواها صوره روضه اللي كان مصورنها فالحوي )
ميره بدهشه: يالـلـــــــــــــــــه صااروخ .. صااروخ
الفيصل : الله ينطبج انتي بنت وتقولين جيه .. عيل شو ودرتي حق الشباب
ميره : بس ماقلتلي من وين يبت هالصوره صج قوو مابتروم اتسوي شي وانت وياك
هالصوره ..(وبفلسفه) يعني زخيتها يا فصيلان من ايدها اللي تعورها ..
الفيصل : البنت ايدها منجسره
ميره : هههه يحليلــــــها جني كنت اعرف
وفجأه صرخت : انت شقااايل تعرف ان ايدها منجسره ؟؟
الفيصل : هههههههه اووني بأدبها ..
ميره : انزين ماقلتلي شو تباني اسوي ؟
الفيصل : اسمعي ..

ويــــــــا البنات ...
روضه اول مافتحت عيونها جان تتطالع جناحها غير شكل كامل اسود واحمر يعني
اليدران بعضها بالاسود وبعضها باللاحمر والاثاث كان بالكامل اسود ..
وعلى صوب مطبخ اوروبي جميع ديكوراته سوده وحمره ..
المطبخ عباره عن طاوله طويله بشكل طولي وحذاله كراسي دائريه سوده وحمره
اول ما مررت عيونها عـ البلازما اللي كان معلق على اليدار وكان ممدود بحاسب
الي يعني تقدر تشتغل الكمبيوتر على الـ tv

مشت شوي بخطواتها الخفيفه لحد ماوصلت عند باب الحجره .. مدت ايدها وفتحت
الباب ..
حدرت الحجره وكانت تتطالع على الشبريه السوده اللي كانت من وراء مخطايه
بالمخمل الاحمر ..
ومررت ايدها على الستاير اللي كانت ممدوده من المخمل الاسود وفوقها قماش
مخملي عود بالاحمر الغامج اللي كانت فيه كسرات خياليه ..
وعند نهايه الشبريه محطين غنفه من النوع الروماني الجديم المطرزه بالمخمل
الاسود الاصيل .. وممدود فوقها قماش احمر بأهمال ..( يعني محطاي القماش
الاحمر فوق الغنفه بدون ترتيب ظاهر شكله خباال ×خباال ..

مددت ايدها على اليدار اللي كان يومض بألوان جدا هاديه فيها ماسات باليدار ..
وفجأه صرخت روضه : فديـــــــــــــــــــــــــــته ياااااربي ( منو تتوقعون)؟؟

روضه كانت شابكه ايدينها فبعضهم وحطتهم حذال رقبتها ( يعني شرات ما الواحد
يوم يكون مستانس من شئ وقاعد يطالع عليه بكل حب وماخوزت عيونها من الصوره
اللي كانت محطايه على اليدار )
طبعا لحد الحين ما عرفتو شو روضه قاعده تتطالع ..
بوروضه يدري ان روضه والبنات يمووووتن على شئ اسمه (حمد العامري) فـ عسب جيه
حب يهدي روضه هالصوره ..
كانت صوره الفنان حمد العامري فبرواز اسود ملكي رااقي جدا وتحت الصوره توقيع
من الفنان حمد العامري (طبعا بأيدين حمد العامري ) وكانت الصوره ماخذه جزاء
من اليدار لانها عووده ..

روضه على حركتها بعدها ..
جان اتيي يزوي من ورااء وتشهق : يااااااااااقلبي انـــــا .. وااافديته
يااربي ..
وتربع حذال روضه ولا ارادي سوت شرات حركتها .. ياتهن حمدوه من ورا وتربع
بلاكن وشافتهن صافطات حذال الصوره جان تتطالع على الصوره وتصرخ :
لاااااااااااا
حمــــــــــــــد مااصدق ...
جان يربعن بثلاثهن على الصوره ويقعدن يمسحن عليها واللي تتفدى واللي تسوي
حركات انها بتموت خلاص واللي تمسح على توقيعه ..
كان شكلهن يموووت من الضحك ..

يزووي : وااافديته عمي بوسالم ..
حمده : حتى انا فديته عمي بوسالم ..
روضـه : ايــــــه لا تتفدن ابويه انا اتفداه بس ..
وه فديت ابوويه ياربي كله ذووق ..

عقبها حدرت روضه حجره تبديل الملابس اللي كانت بالاحمر الغامج وداخلها بدلات
وملابس من ارقى الماركات العالميه ..
خرجن قوم حمدوه ويزوي من الحجره وسارن الصاله يلعبن بالكمبيوتر ..
اما ويا روضه بالداخل ..
مرت حذال التسريحه بس شدها فيها شئ محطاي ..
مدت اناملها الرقيقه والطويله تتلمس البرواز الوردي المجسر واللي واضح انه
ملزق وكان داخل البرواز صوره لـ روضه وعهود (الله يرحمها)
يالسات حذال بعض .. والضحكه شاقه الحلج ..
اول ماشافت الصوره والبرواز المجسر نزلت بالقو على الارض (يعني ضربت الارض
بركبها شرات ما الواحد يوم ينهار )
روضه وبكل حزن الدنيا : شو يـــــــــــابج انتـي هنــي هااا شو يـــابج
وكانت اتعلي صوتها وهي تصررخ على الصوره..
اكيد هلي قصدهم ايضايجون فيه ..

ابحرت روضه بذكرياتها .... وردت للماضي :
بعد ماردت روضه من المول وكانت صج متحطمه ومنجسره وقلبها مغروس فيه سجين
الغدر ..
اول مايات عيونها على البرواز اللي هي وعهود اشترنه ويا بعض فرته روضه بقوه
على الارض وتجسر البرواز وعقبها عقت عمرها فوق الزجاج المتناثر ..
وكانت اتصيح بكل عبره والم يحرق القلب وشهقاتها تتعالى كل مالها وتزيد : لااا
ليش انا يااربي .. الا عهود ياربي الا عهود .. ماصدق .. اااه ياربي ارحمني
(وصياحها كان يعور القلب ) ياااربي اباا امووت اكرهـــــــــا .. اكره كـــل
هالدنيا كل هالناس جذابه .. محد منهم صادق .. طول عمريه بعيش وحيده .
الكل جذاب الكـــــــل .. حتى انتي ياعهود .. خنتيني وغرستي سجين الغدر بيوفي

واثرها بيبجا طول العمر .. آآآه ياليت لو حد غيرج سوى هالسوات ...
خلاااص انا انتهيت روحي غدرت فيه شبقى بعد ..
نشت تتطالع فونها اللي كان يرن عاد له ساعه كامله ..
واول ما نشت مرت على المرايه وطالعت منظر يخوف بصدق
كان كامل جسمها من جدام مغطى بالدم لانها كانت راقده على الزجاج المجسر ..
انشغلت بعمرها ونست الفون اللي احين بينفجر من الصياح ..

ردت لماضيها المر وهي تتطالع البرواز اللي بيدينها واللي واضح عليه انه قبل
جيه كان مجسر ..
مررت نظرها على الصوره بس مسرع ما شالت نظرها عن الصوره ..
ماتبا تتطالع على وحده خانتها ,, بس مسرع ما ردت نظرها على الصوره وحضنتها
بالقـــــــو ..
روضه من بين دموعها : اشتقت لج يا عهوود اشتقت لج .. ليتج اتعودين والله
بسامحج بس ردي دخيلج ... ليش توفيتي ليش .. ليش الموت خذاج .. ليتني رديت
عليج يوم تتصلين .. عسب اسمع صوتج لاخر مره بحيااتي ..
روضه وشهقاتها تعلى اكثر : آآآآآه ياعهود ليـــــــش الموت كان اقرب لج مني
بس وررربي احبج .. ليش استسلمتي ليش ما دقيتي عليه مره ثاانيه ..
(روضه خلاص ويها احمر من الصيـاح ودموعها غطت ملامح ويها البريئ بالملامح
الطفوليه )
روضه تنهدت بالقوو وكانت تحاول تتنفس لانها تعبت عمرها واايد والدكتور ياما
حذرها بعدم بذل مجهود ..

حاولت تسحب كميه من الهواء لانها تحس عمرها بتختنق خلاااص ..
كانت دموعها تذرف وقلبها يذرف من الالم والجروح اللي ادمته ..

سمعت قوم يزوي يايات صوب الحجره ونشت بسرعه وسارت الحمام (وانتو بكرامه)
عسب مايطالعن دموعها اللي ياما حبستهن داخل يوفها اللي يشتعل من الضيج الهم
اللي يسريبه ..
وهي بالحمام مارامت توقف حست عمرها مشلوله يلست بالارضيه وحضنت ريولها
ومره ثانيه عادت لماضيها وذكرياتها :
سارت حق ابوها ومن بعد الحادثه اللي استوتلها
روضه وهي خلاص متحطمه بس تحاول تخفي الالم : ابويه ابا ارمسك فموضوع واايد
مهم .
بوسالم : خير بنتي بلاج جيه ..
روضه : ابويه انا قررت اكمل دراستي بالخارج
بوسالم بخوف : شـــــــــــو .. روضه انتي شو قاعده تقولين انا مستحيل اودرج
لروحج مستحيـــــل ..
روضه وبكل ضيجه الدنيا بس بعدها تقاوم وتخفيها : ابويه انا قررت وخلاص ..
ومستحيل اتم هني فالبلاد ..
ابويه انت طول عمرك تحترم قراراتي وتأكد انه هالقرار هو الصح ..
بوسالم : بس روضه انا اخاف عليج ..
روضه : ابويه لا تخاف ولا هم يحزنون .. وترا انا بكون فقصرنا اللي فـ باريس
مب فسكن عسبت اتخاف عليه ..
والخدم والكل بيكونون ويايه .. ولا تنسى ان بعض من هلك هناك ..
بوسالم : روضه مادري بس انامول مب مقتنع بسفرتج ..
بس انا اللي اعرفه ان قراراتج كلهن ايكون عين الصواب ..
واتمنى هالقرار اللي اتخذتيه ايكون منهن ..
.
طبعا مع اعتراض اخوان روضه وامها .. الا ان ابوها وقف فصفها ومن عقب رمست
بوسالم محد يتجرا ايزيد كلمه على رمسته ..