منتديات بنوته - عرض مشاركة واحدة

02-04-2011, 03:15 AM

مرت أيام العطلة الصيفية بهدوء وقربت أيام الدراسة.. والكل مشتغل يجهزنفسه ويستعد للدراسة..
لكن قبل بدء الدراسة بثلاث أسابيع أخذ عبدالرحمن إجازة وسافر هو وزوجته وعياله للندن يغيرون جو..
وطبعآ رهف كانت ماخذه إجازه أيام عودة المعلمات ولاداومت .. وكانت إجازتها تخلص في بداية السنة الجديدة وعودة الطالبات..
أما بالنسبة لأم طارق ولله الحمد تشافت وطلعت من المستشفى لكنه سار لسانها ثقيل شوي..
وأسيل بعد مارجعت من سفرتها كانت متحمسة لأول سنة لها بالجامعة وكلها نشاط..
وصالح طلعت نتيجة قبوله بالجامعة طب بشري..
وأثيرمستعدة لثالث ثانوي وحاطة ببالها إنها تجيب نسبة فوق 95%..
وأبرار ماجابت خبر للدراسة وخايفة إنه أحد يدري عن سقوطها في كذا مادة..
وأخيرآ مشاري اللي كان كل همه إنه يخلص هالترم اللي باقي له.. ويخلص من السجن اللي هو فيه..
***
****
*****
(في بيت أبو صالح..)
يوم الخميس... الساعة 7,30 المغرب..
في غرفة أثير..
كانت أثير قاعدة على طرف السرير ومنهارة إنهيار تام وحاضنة مخدتها وتبكي..
مدت يدها للمسجل اللي جنبها وطفت الشريط بعد ماخلص... وحطت مناديلها على عيونها ورجعت ترتجف وتبكي..
,,,الباب يدق..
أثير: يوووه أفنان ابعدي احسلك مارح أفتح..
رهف : اوف ليه كل هالعصبية..
,,بسرعة أثير نطت وفتحت الباب وحضنت رهف وكملت صياح..
رهف: بسم الله عليك أثير وشفيك؟؟
,,أثير ماترد ومستمرة تبكي...
رهف وهي تدخل وتسكر الباب:أثيــــــر وشفيك تبكين..
أثير وهي تمسح دموعها : مافيني شي ..
رهف:حلوة ذي مافيك شي.. كل هالبكى ومافيك شي.. أثير حبيبتي اشفيك؟؟
أثيروهي تبكي: رهف أنا خايفة..
رهف:من ايش خايفة؟؟
أثير:خايفة.. خايفة.. الشريط يخوف..
رهف: شريط.. أي شريط؟؟
أثير: هذا الشريط اللي تو سمعته.. يارهف مره يخوف..
رهف:أثير حبيبتي تعالي اجلسي وفهميني وشو شريطه اللي سمعتيه..
أثير:هذا شريط الشيخ عبدالمحسن الأحمد ... وغارت الحور..
فيه قصص تروع..
رهف وهي تبتسم: آآآآه.. ياحبيلك يا أثير قصدك قصص البنات اللي قابلوا شباب وسارت نهاياتهم قبيحة..
أثير: إيه..
رهف: حبيبتي لاتصيحين.. لاسمعتي عن هالناس قولي الله يعافيهم ولايبلينا..
والواحد ياأثير ياخذهم عضه وعبره ويبتعد عن اللي مثلهم.. ولايفكر إنه يسوي مثلهم أبدآ..
أثير بعد تردد: رهف طب ... طب...آآآ... اللي سوا زيهم وتاب الله يسامحه؟؟
رهف طبعآ فهمت قصد إختها وقالت:
أكيد يا أثير الله غفور رحيم ويفرح بتوبة العبد.. والواحد مهما سوى مايقنط من رحمة الله..
بعد ما تأثرت أثير من كلام رهف مسحت دموعها وقالت:
يووه رهف نسيت أقول الله يحييك..
رهف وهي تضحك : الله يبقيك..
أثير: غريبة رهف جاية عندنا يوم خميس..
رهف:تعرفين الدراسة يوم السبت وأنا جايه آخذ أغراضي وأوراقي وخرابيطي عشان بكرة أجهز لأنه من يوم السبت بداوم..ها استعديتي لمشوار ثالث ثانوي؟؟
أثير:أكيد ناوية أجيب فوق 95%
رهف: الله يوفقك حبيبتي..
,,, صالح وهو واقف عند الباب:
وأنا أقووول اشفي البيت منور؟؟
رهف وهي تضحك: أهليــــــن..
صالح وهو يحضن رهف:
ياحيالله رهوف.. إلا صح اللاند كروزر هذي اللي برا بسواقها حقت مين؟؟
رهف:هذي سيارة عمتي أم مشاري .. مشاري مشغول وسمحتلي عمتي أروح بسيارتها..
صالح: ماشالله سيارة تفتح النفس.. يعني هالسيارة لها ولبناتها..
رهف: لا لها لحالها لأن ماعندها بنات..
,,صالح استغرب وقال بنفسه: أجل أسيل أكيد تسير بنت عبدالرحمن..
أثير: إلا صح رهف أسيل وين سجلت؟؟
[دق قلب صالح لما سمع اسم أسيل وقال بنفسه سبحان الله الطيب عند ذكره..]
رهف:جامعة الملك سعود..
أثير:ماشاللـــــه أي قسم؟؟
رهف:لغات وترجمة..
أثير:اووه عاد أحس هالقسم مرة صعب..
رهف:لا موصعب على أسيل ماشالله عندها لغة من أول... طول العطلات يسافرون برا باريس ولندن واستراليا..
,,سكت صالح وسرح بعيد وفكر بنفسه وقال:
أسيل بنت عزونعمة وتلعب بالفلوس لعب.. ماشالله طول عمرها عايشة بقصور وتركب أفخم السيارات وطول الوقت سفريات برا..
وانا أبعد منطقة سافرت لها الطايف.. وحافي ومنتف أقعد بالأيام بوكي مافيه الا عشرين ريال.. معقولة بنت مثل أسيل تتنازل وتتزوجني مستحيـــــل..
,,تنهد صالح ونزل راسه وقام طلع من الغرفة..
**
**
,,في غرفة أبرار..
,,الساعة 12 الليل...
أبرار: اوف .. أخيرآ طلعت ياثقل دمها..
أثير:عاد اللي يشوفك يقول طول الوقت قاعدة معها ماقعدتي معها خمس دقايق..
أبرار:ياربي ممللـــــــه مادري اشلون رجلها مستحملها..
أثير:حرام عليك يا أبرار والله إنها عسل.. يكفي إنها قبل ماتتزوج كانت شايلة البيت على راسها.. شوفي حالتنا الحين من بعد ماراحت..
أبرار:أقول ماعلي منها... إلا تعالي هنا ليش ماعد كلمتي محمد ومقفلة جوالك ترى ناصر يقول إنه منهبل مسكين...
أثير:الله يزيده.. قولي لناصرحقك هذا يقوله خلاص أثير بح..
أبرار:ليه ياخبلة الولد يموت فيك..
أثير:شسوي به.. خلاص أنا قرر أترك هالحركات.. أعوذ بالله من يوم بديت أكلمه لا ارتحت لا ليل ولا نهار..
أبرار: كيفك.. بس هذا وجهي يا أثير إذا مارجعتي تكلمينه أكثر من أول..
أثير:لا حبيبتي مارح أرجع أكلمه.. تدرين ليه لأني ماتقبلت هالشي ولاقدرت أتقبله عشان كذا أنا أخذت قرار إني أترك هالحركات.. ومستحيل أرجعلها.. تبيني أخسر دنيتي وآخرتي عشان تفاهات...
***
****
*****
(في بيت أم عبدالرحمن...)
,,تحديدى بغرفة رهف الساعة 12,30 الليل..
لبست رهف قميص نومها واستعدت للنوم.. ومشاري كان منسدح عالسرير ويطالع فيلم..
,,بس الحقيقة كان مشاري سرحان ومو يم الفيلم أبدآ وكان يفكر..
...خلاص أنا أخذت هالقرار ولازم أقوله لها.. وهي بعد لازم تتقبله..
أنا أكثر واحد بهالزواج انظلم.. ومو مستعد انظلم زيادة.. عيال مابي عيال.. ولازم رهف تمتثل لرغبتي..
آآآآه أنا وين والزواج وين..
لكن انشالله اني بخلص دراستي هالترم ورهف ترجع معززة مكرمة لبيت أهلها والله يوفقها مع اللي يقدرها .. وانا اضبط أموري واسافر على استراليا أكمل دراستي..
.. مشاري بعد تردد:... رهف..
رهف: نعم..
مشاري: رهف بتنامين؟؟
رهف: إيه..
مشاري: طب بغيت أفاتحك بموضوع..
رهف تلتفت لمشاري: سم يا مشاري قول..
مشاري:...رهف... رهف.. أنا مابي عيال..
رهف وهي مصدومة: وشو مافهمت؟؟
مشاري: لايعني مابيك تحملين... أقصد هالأيام يعني..
يعني قصدي الين اتخرج.. وأفضى بعدين انشالله الله يرزقنا..
,,رهف زعلت وانصدمت من قرار مشاري وانقهرت لأن ماله حق يمنعها.. هي بتموت وتجيب بيبي.. وهو ماهمه.. بس ماحبت تعارضه وتناقشه وتكبر السالفة وترجع تتضارب معه لأنها ماصدقت إن الأمور هدت بينهم هالأيام قالت:
اللي تشوفه..
..مشاري ارتاح لما رهف وافقت على طول من غير جدال ونقاش..
ونام هذيك الليلة وهو مبسوط...
***
****
*****
يوم السبت..
في مكتب عبدالرحمن أبو فيصل..
الساعة عشر الصباح..
عبدالرحمن وهو ماسك التليفون: يسير خير انشالله يابومتعب.. أنا بشاور الأهل وارد لك خبر..
أبومتعب: والله يابوفيصل انت عزيز وانسان معروف وسمعتك طيبة ولا بنلقى أحسن من بنتك لولدي معاذ وانا واثق انك بتوافق.. زي منت عارف ولدي معاذ ماشالله مؤدب ومتربي وسمعته طيبة وولد خير ونعمة ولابتلاقون احسن منه..
عبدالرحمن: على خيرة الله عطنا مهلة أسبوع.. أشاور أهلي وارد لك خبر..
... انهى عبدالرحمن مكالمته وهو مبسوط جدآ إن بنته بتاخذ ولد من أولاد أبومتعب.. لأن ابومتعب وأولاده عائلة غنية فوق الوصف وسمعتهم كويسة جدآ.. وأولاده مؤدبين ومحترمين وفي مراكز مرموقة بالدولة..
***
****
*****
(في بيت أم عبدالرحمن..)
,,تحديدآ بغرفة منى وعبدالرحمن بعد ماتغدوا وطلعوا..
عبدالرحمن: هايا منى اشقلتي؟؟
منى:والله ياعبدالرحمن مادري شقولك بس أحس أسيل شوي صغيرة على الزواج..
عبدالرحمن: أنا يوم أخذتك كنتي أصغر منها.. وبعدين أسيل ماشالله عاقلة ورزينة وحلوة وفي سن زواج.. ولاتنسين اللي متقدملها واحد ماينرد..
منى: قلت لعمتي؟؟
عبدالرحمن: إيه قلتلها وانبسطت بشكل لأنها تعرف أم متعب ومدحتها مرة..
منى:مادري..
عبدالرحمن:يابنت الحلال خلنشاور البنت ونشوف رايها ونسأل عن الولد والله يقدم اللي فيه الخير...
منى : اللهم آمين..

**
:::
(في غرفة رهف..)
,,الساعة كانت 3,30 العصر..
كان مشاري برا مع أصحابه وكانت رهف نايمة من بعد الظهر لأنها جت تعبانة من الدوام..
,,باب غرفة رهف يدق..
رهف وهي مفزوعة من النوم: ميـــــن؟؟
الشغالة جيسي: ماما رهف بابا إنت برا في مجلس يبقى إنتا..
,,رهف فزت من عالسرير وطارت وفتحت الباب وهي مي مستوعبة وقالت:
وشــــــو؟؟؟
جيسي: بابا إنتا برا في مجلس يبقى إنتا..
رهف: بابا مين؟؟
جيسي: بابا انتا يور فاذر..
رهف وهي مي مستوعبة أبدآ: أبوي سلطان..
جيسي: آآآيوااا...
رهف: طيب طيب الحين بنزل..
,,طارت رهف لغرفة التبديل وغيرت ثيابها وغسلت وجهها وبسرررررعه نزلت للمجلس..
رهف وهي مو مصدقة عيونها: السلام عليكم..
سلطان وهو باين عليه الإستعجال:هلا هلا..
رهف وهي تسلم على أبوها:أهلين يبه كيفك..
سلطان: حمدالله.. أقول وأنا أبوك بسرعة ألبسي عباتك وجيبي دفتر العايلة حقكم وتعالي معي بسرعه..
رهف: ليه؟؟
سلطان وهو معصب:حلوة ذي ليه... أبيك تجين معاي..
رهف وهي خايفة: وين؟؟؟
***
****
*****
في الشقة..
ناصر: ياخي اللي يشوفك يقول كنت تقعد معها 24 ساعة.. ماكنك ماكلمتها إلا يمكن خمس مرات بس..
وأغلبها تسكر السماعة بوجهك..
محمد: ياخي قاهرتني هالبنت عربجية غير إختها أبرار هاللي تكلمك.. ماتعطي وجه وتنافخ.. والحين لي ثلاث اسابيع ماسمعت صوتها..
ناصر: أبرار آخر مرة كلمتني قالتلي إنها خلاص بطلت ولاعاد تبي تكلم أحد..
محمد: آآه والله إني مقهور منهم هالثنتين..
ناصر: وسع صدرك يابن الحلال.. مافي شي يجي بالساهل..