منتديات بنوته - عرض مشاركة واحدة

02-04-2011, 03:04 AM

(بيت أبوصالح)
,, كانت خايفة وتراقب الدرج والسيب ولا لقت أحد دخلت غرفتها وصكت الباب..
جلست عالسرير وهي مترددة..
أثير:ياربي أدق ولاماأدق.. ياربي بس أنا ماأحب هالحركات..
يوووه هذي أبرارلها سنتين تكلم ناصر ومبسوطة معاه ولاضرها بشي..
خلاص بدل الطفش والملل أدورلي أحد يفهمني ويسليني ويحبني ويحتويني زي مو ناصر يموت بأبرار..
,,خذت نفس عميق وطلعت الجوال من الدرج.. وقررت إنها تدق على محمد..
رن التليفون ورد محمد لكنه ماقال ولاكلمة,,
محمد:....
أثير:... أأ ألو؟؟
محمد:....
أثير: ألووو؟؟
محمد: ودي أرد عليك بس أخاف تسكرين بوجهي زي المرة اللي فاتت..
أثير:..معـــ..معليش آسفة عاللي سار..
محمد: لاعادي بس أبي أعرف شي واحد ليه عصبتي علي..
أثير: هاااه.. أنا عصبت؟؟
محمد:ولايهمك عادي تمونين..
أثيربعد صمت دقيقة تقريبآ: اممم... خلاص أنا الحين بقفل..
محمد:بهالسرعة؟؟
أثيرقلبها يدق بسرعة:ليه تبي شي؟؟
محمد:... تصدقين أثير أحسك زي الحلم الحلو اللي يجي بسرعة وينتهي بسرعة..
للمرة الثانية تدخلين حياتي بدون سابق إنذار وتطلعين بكل سهولة..
وتتركيني متعلق فيك..
,, أثير بلعت ريقها وتلعثمت وماتدري وشتقول ولا شتسوي لأنه أول مرة أحد يحاكيها بهالطريقة..
محمد:خلاص يالغلا في أمان الله متى تبين أدق عليك..
أثير بخوف: لا لاتدق أنا متى مالقيت الوقت مناسب أدق عليك..
محمد:خلاص صار.. انتبهي لنفسك
أثير وهي متشققة من الحياء:مع السلامة..
****
*****
*******
(بيت أم عبدالرحمن)
الساعة 11,30 الليل..
,,فتح مشاري باب الغرفة ولقى رهف قاعدة تستناه وبيدها مجلة..
رهف أول ماشافته ابتسمت وقالت: هلا مشاري..
على طول مشاري نزل راسه وعطاها ظهره وراح غرفة التبديل وقال:
هلا فيك..
رهف وهي تمشي وراه: تعشيت؟؟
مشاري: إيه..
رهف:إمممم... طب كيفك ؟؟
مشاري:وهو منشغل يغير ثيابه:حمدالله..
رهف:اليوم من أوله ماشفتك..
مشاري:......
,,,سكتت رهف وراحت وتركت مشاري لأنه باين إنه مايبي يحكي معها.. ولافي أي مجال للحديث..
,,طلع مشاري للغرفة وناظر لرهف بطريقة غير مباشرة نظرة موعارف لها أي تفسير هل هي نظرة اطمئنان أو يبي يشوف كيف سار وجهها... وهي كانت منشغلة تقفل جوالها استعدادآ للنوم..
,, ناظر لرهف وجهها زي ماهوتعبان بس عينها اليمين خف الانتفاخ اللي فيها بس لسه من تحتها أزرق..
تضايق بشدة ودخل تحت لحافه وغطا نفسه..
رهف بهدوء:مشاري تصبح على خير..
مشاري بصوت واطي:.... وانتي من اهله..
***
****
(غرفة أسيل..)
الساعة 1 ليلآ..
كانت جالسة عاللاب توب ومشغلة أغنية سيرين عبدالنور.. لوبص فعيني..
أسيل:ياربي اشفيني انا انهبلت ,,,, أعوذ بالله من ابليس..
صورته موقادرة تفارق خيالي..
صدق من قال إن البنات تافهات بس شفته مرة وحدة موقادرة أبعده عن بالي..
بس صراحة وسامته موطبيعية...
يللاه يابخت راعية النصيب..
:
:
:
***
****
اليوم اللي بعده...
الساعة 8 الليل..
كانت لطيفة جالسة بالصالة هي وحريم عيالها ومن ضمنهم رهف وأسيل..
كانوا يتقهوون ويسولفون.. وطبعآ رهف حاطة طبقات من كريم الأساس اللي نفس لون بشرتها ومخفي عيوب على الضربات الموجودة بوجهها وتحت عينها..
ومكحلة عيونها وحاطة روج,, عشان تختفي ملامح الألم نهائيآ..
وعشان ماتلاحظ أم عبدالرحمن ويرجع الموضوع ينفتح من جديد..
,,شوي ولاتركي يتنحنح ويدخل.. وعلى طول رهف حطت شالها على راسها وغطت شعرها وحاولت انها تبعد وجهها بحيث مايكون كله واضح..
تركي:السلام عليكم..
الكل:عليكم السلام..
تركي:ها إيمان نروح جاهزة؟
إيمان:إي جاهزة بس استناك..
تركي:يمه أنا استأذنك أبروح أودي إيمان المستشفى..
لطيفة:ليه يابنيتي سلامتك..
إيمان:الله يسلمك ياعمة بس موعد..
لطيفة:الله يساعدكم..
,, طلعوا تركي وزوجته من الصالة.. ولاعلى طول دخلت أسماء وهي معصبة وواصله حدها..
أسماء:يمه تكفين شوفي حمودي ولدك هذا..
منى:وشفيه..
أسماء:يمه كل ماطلعتله لبس عشان يلبس مايعجبه وآخر شي قام يصرخ ويزاعق..
أسيل: أسماء لاتخلينه يعصب ويبكي بعدين يتشنج زي كل مرة... إذا بغى شي خلاص على طول عطيه..
أسماء:قومي انتي أناخلاص تعبت من دلعه الزايد..
منى:خلاص لاانتي ولاهي أنا بقوم..
لطيفة:أسماء يابنيتي ترى دقت صديقتك روز وقلتلها إنك مشغولة تلبسين أخوك..
أسماء وهي تجلس بعد ماخذتلها حلا:
يووه ياجدة الله يصلحك كان ناديتيني ليه الفضايح..لازم تقولينلها إني ألبس هالبزر..
لطيفة:إلا صح انتي مصادقة شغالة ليه أهلها مسمينها روز..
,, لطيفة وأسيل ورهف يضحكون..
أسماء:ياجدة هذي الأسامي الحلوة أجل اشتبينهم يسمونها منيفة..
لطيفة:والله منيفة ولا روز.. هذي الأسامي لاهي من عاداتنا ولاتقاليدنا..
الله لوتدرين ياأسماء إش كنت أبي أسميك بس إني في الأخير هونت,,
أسماء:الله يستر.. وشبغيتي تسميني..
لطيفة:بغيت أسميك مزنة على اسم أمي لكني في الأخير قلت لأبوك يسميك أسماء..
أسماء وهي طايرة عيونها:الحمدالله إنك بطلتي ولاتهورتي الحمدالله..
,, الكل جلس يضحك ورهف كانت تنظر لأسماء بكل حب على براءتها وتضحك..
كان مشاري نازل من الدرج ومن أول مانزل وهو عينه على انسانة وحدة اللي هي رهف..
مشاري يحاكي نفسه:معقول هذي رهف.. وشهالضحك وشهالوناسة اللي هي فيها..هالابتسامات ماتطلع إلامع أسيل وأسماء يعني..
مشاري:الســلام عليكم..
الكل:عليكم السلام..
لطيفة:هلا ابوي هلاتعال تقهوى..
مشاري:لايمه مستعجل باطلع..
,,,هنا رهف نزلت راسها وهي تفكر وتقول ياربي مالنا بالرياض اسبوع وهو كل يوم يطلع لآخر الليل وتاركني..وشبيقولون أهله..
لطيفة:أول شي خذلك فنجال وكلك من هالحلا..
مشاري:يمه بعدين..
لطيفة:والله يامشاري منت بطالع من هنا إلا وانت متقهوي وماكل حلا..
تعال إقعد..
,, وراح مشاري وجلس جنب أمه وقال:يللاه ناخذ فنجال مو مشكلة..
,,على طول رهف قامت وصبت لمشاري فنجال قهوة وعطته..وأخذه منها من غير مايطالع فيها.. ورجعت قطعتله قطعة من الحلا وعطته..
مشاري:اللـــــه يجنن هالحلا أول مرة أذوقه..
أسماء:جد ياعمي عجبك؟
مشاري:إي مرة طعمه فظيع من مسويه؟؟
أسماء:أنا مسويته..
مشاري:إخس والله وكبرتي ياأسماء وصرتي مرة..
أسيل:أقول أسماء عبيتي المكان أرانب خلاص ذبحتينا..
أسماء:ههههههه أسيل حرام عليك تكفين لاتخربين علي والله إني صدقت إني انا اللي مسويته..
مشاري:طيب ياأسماء تنصبين علي هاه.. بس أنا الغبي الا المفروض إني أعرف إنكم ماتدبرون شي بالمطبخ.. لولا هالشغالات كان متنا جوع..
أسيل:ومن قالك إن الشغالة هي اللي مسوية هالحلا.. اللي سواه رهف..
,,مشاري سكت ورجع ياكل بهدوء من لما سمع اسم رهف ويقول بنفسه:
والله ماعليها طباخة..
*جوال مشاري يدق..
مشاري:هلاا..
طارق:ياخي وينك؟؟
مشاري:اصبر شوي..
طارق:ليه وشعندك..
مشاري:قاعد اتقهوى مع الوالدة..
طارق:إي صدقتك عريس وتارك زوجته وقاعد مع أمه خخخخخخخخ
مشاري:أقول لايكثر..
طارق:طب خلاص أنا اللي بمرك بسيارتي بعدين نروح ناخذ عزام..
مشاري:أقول لاأشوفك إنت وكامريتك هالقرنبع..
طارق:مشاري حرام عليك راعي شعوري ياخي.. تسب الغالية قدامي..
مشاري:اللي يسمعك يقول إني احكي عن امك ماكنها كامري من خمس سنين وهي عندك انتهى عمرها الافتراضي..
طارق:لوفيك خير تشتريلي Bmw زي حقتك ولا همر زي سيارة عزام..
لكن مافيك خير لاانت ولاهو..
مشاري:خلفتك ونسيتك ... المهم مسافة الطريق وانا جاي..
,,ويسكر مشاري الخط ويقول:يللاه أنا بروح تامرين على شي يمه..
لطيفة:لاسلامتك ياولدي..
,,وطلع مشاري من دون مايقول لرهف ولا كلمة..
****
******
********
(في سيارة مشاري)
بعد ما أخذ مشاري عزام وطارق وخذولهم كوفي وقاعدين يفرفرون بالسيارة في شارع التحلية..
,,في المرتبة الخلفية صوت جوال عزام يرن..
عزام:هلا حياتي.. هههههه
اعذريني حبيبتي والله اني انشغلت شوي..
صدق.. سلامتك ياقلبي ليه وشفيك..
ياحياتي ماتشوفين شر..
موعدك الساعة كم طيب؟؟ ..... أجل خلاص أنا بصحيك..
لا لا اعتمدي بس انتي خلي جوالك مفتوح وسيري نشيطة إذا قومتك قومي..
ماتشوفين شر حبيبتي مع السلامة..
,, مشاري وطارق يطالعون ببعض ويضحكون..
عزام:عسى ماشر ضحكوني معكم..
مشاري وهويطالع في عزام بالمراية ويضحك:
ياحليلك ساير هالأيام شغالة تصحي خوياتك..هااه..ههههههههههه
طارق:ههههههه ياخي خلك مفيد وتعال صحني بعد.. الأقربون أولى بالمعروف..
عزام:تتريقون علي طيب..
مشاري:بالله هذولي وين أهلهم وين أمهاتهم رجال يدق عليها الصباح ويصحيها؟؟
طارق:أقول عزام الغفوة حقتك كل خمس دقايق ولا كل عشر دقايق..هههههههههه
مشاري:ههههههههه
عزام:إي صح تذكرت بالله وقف أبي أشتري شي ضروري..
مشاري:وشتبي؟؟
عزام:وحدة من خوياتي شحنها خلص وتبيني أشحنلها..
طارق:هههه بالله خذ جوالي واشحنه معك له يومين مافي الا ريالين..
مشاري:ياالدلخ تراهم يستغلونك أنت تشحنلها من هنا وهي تكلم ألف واحد غيرك..
عزام:ياخي كيفي حلالي وانا حر يستغلون زي مايبون..
مشاري وهو يوقف السيارة: يالله انزل وجبلي معك موية صحة عطشني الكوفي..
عزام:وانت طارق تبي شي غيربطاقة شحن..
طارق:حلوة ذي من جدك تبي تشتريلي بطاقة شحن..امزح عليك..
,, ويطلع عزام ويصك الباب وراه..
مشاري:تتوقع ياطارق عشان عزام منحرم من أهله والحنان يحاول يعوض النقص اللي عنده بعلاقته مع البنات وانه يصرف عليهم..
طارق:ياخي تهون مكالماته معهم وانه يشحنلهم جوالاتهم... انت تدري يوم انك بجدة وحدة من خوياته تزوجت وقبل زواجها بيومين راحت حجزت كوشة بـ20 ألف وراح عزام حاسب عليها..
مشاري يشهق:من جدك.. معقول توصل فيه لين هالدرجة..
طارق: واكثر... مابقى وحدة بهالصيفية ماراح دفعلها فلوس على فساتين وعلى خرابيط وراح عشاها بأفخم الفنادق..
مشاري:الله يهديه..خلاص اسكت هذا هو جى..
عزام بعد ماركب:مشاري خذ مويتك.. وطارق هاك شريتلك ثلاث بطايق شحن كل وحدة بميتين اشحن جوالك يللاه..
طارق:عزااام...اقول تلايط.. من قالك تشتري.. مارح آخذها..
عزام:والله لتاخذها.. ومتى ماسار معك رجعلي.. وبعدين هذا أنا قاعد أشحن لبنات خلق الله جت عليك إنت..
طارق:لاتحلف.. والا اقول دامك حلفت هات وحدة والباقيات خليهن لك..
,,, وتموا مشاري وعزام وطارق يتمشون بالسيارة ويسولفون..
وعزام كل ربع ساعة تكلمه وحدة... وكل شوي يشحن جوال وحدة بهالبطايق اللي معه... دون أي تفكير أوتردد..
ومشاري مافكر ولو تفكير بسيط بالإنسانة اللي تستناه بالبيت..