منتديات بنوته - عرض مشاركة واحدة

02-04-2011, 02:57 AM

( في باريس)
عبدالاله: حبيبتي دينا اشفيك..
دينا: مشتاقة لأهلي ياعبدالإله..
عبدالإله: طفشتي مني؟؟
دينا: اطفش من الدنيا ولا اطفش منك..
عبدالإله:طيب حبيبتي خذي جوالي كلميهم وطمنيهم عليك وإذا تبينا نرجع ماعندي مانع نرجع السعودية وتشوفينهم بعدين نروح أي دولة تختارينها..
دينا: لاحبيبي مستحيل أتعبك خلاص يكفي أسمع صوتهم....
:::::::
::::::::::
(فندق راديسون ساس)
كانت رهف جالسه تصلي الظهر وهي من أمس ماكلت شي..
جا مشاري ولقاها تصلي وجلس على طرف السرير الين سلمت وخلصت صلاة والتفتت عليه وشافته كان لابس برمودا جينز وتيشيرت أحمر مكتوب عليه ماركة Replay ... وكان محلق وكاشخ ومتعطر..
مشاري: خلصتي صلاة..
رهف: إيه..
مشاري: طيب البسي عشان بنروح نتغدى ونتمشى شوي أنا بستناك لين تخلصين,,
رهف انبسطت مرة: اوكي دقايق وأجهز..
لبست بنطلون جينز وتيشيرت أبيض ناعم من زارا وصندل أبيض.. ودعجت عيونها وحطت قلوز..
ولبست عباتها ولفت طرحتها,,,وطلعت لمشاري..
رهف:مشاري خلصت..
مشاري: ياللاه امشي,,
لبست نقابها رهف ونزلت وركبت السيارة مع مشاري وهي مو مصدقة إنها أخيرآ بتطلع مشوار مع مشاري,,
كان طول الطريق ساكت الما وصلوا مطعم [ جربينوز الإيطالي ]
طلب مشاري الأكل وجلس يحوس بجواله بيده اليمين ويده اليسار كانت على طاولة الأكل وهولازال ساكت..
مدت رهف يدها ومسكت يد مشاري اللي عالطاولة وحضنتها بيديها الثنتين..
مشاري طارت عيونه برهف وقعد يطالعها إلين ركز نظره بمنطقة وحدة ألا وهي عيونها..
رهف:مشاري..
مشاري وهو متنح وفاتح فمه عالآخر:نعم!!
رهف: ممكن تشيل هالجوال من يدك وتحاكيني,,
مشاري بلع ريقه وحاول يصرف:
لابس الظاهر إنه شي بضبط الجوال خرب..
رهف:خلاص خله بعدين ... إلا صح مشاري كم مرة رحت لجدة قبل هالمرة؟؟
مشاري يسحب يده ويعننه يدور شي بجيوب البنطلون..
والله مادري بس ماقد مرت سنة إلا وأنا رايحلهامرتين فأكثر..
رهف: طب قد اعتمرت؟؟
مشاري:حمدالله,,,وشرايك يعني كل شوي وانا طاب بجدة ولاقد اعتمرت..
الا اعتمرت اربع مرات..
رهف: ماشالله يا مشاري يا بختك؟؟
تصدق ولا عمري دخلت الحرم..
مشاري باستغراب:نعم
رهف: أبوي وأمي منيرة يعتمرون لكن أنا يخلوني مع أخواني الصغار وإلى الآن الله ماكتبلي..
مشاري سكت ومستغرب إنه وحدة بعمر رهف ماعمرها اعتمرت...
النادل جاب الأكل وابتدى مشاري ياكل بكل صمت.... ورهف نفس الحالة,,,
حاولت تحاكي مشاري كذا مرة وتسولف معه لكن مشاري كان مطنشها..
...
الساعة ثلاث العصر...
وصلوا مشاري ورهف الفندق ودخلت رهف تاخذلها شور سريع ..
طلعت رهف من الحمام وكعادتها دايمآ تتعطروتلبس أنعم الملابس وأفخمها وتحط مكياج خفيف,,,لكنها طلعت تدور مشاري لقته مو فيه..
جلست بالصالون تستناه...
::::
::::::::
مشاري بعد غياب ساعة برا...
دخل الفندق وبيده شريحة جديدة برقم مميز لرهف وأوراق مهمة وفواتير راح أخذهم من فرع معرضهم حق الزل بجدة طلب منه عبدالرحمن إنه ياخذ هالأوراق ويحفظهم عنده....
وهو ماشي قدام الريسيبشن ولا يسمع صوت من خلفه يناديه..
يلتفت مشاري لورى ولا طلع اللي يناديه أعز أصدقاءه لما كان بالثانوي..
مشاري: هلااا والله مو معقول..
سعود: لالا..ماصدق؟؟
ويسلمون على بعض ويحضنون بعض..
مشاري: متى جيت من أمريكا؟؟
سعود: لي أسبوع..
مشاري:لك أسبوع ولا تكلمني يالدلخ؟؟
سعود:يووه يامشاري والله ماجيت إلا عشان الوالد تعبان وأنامختبص وحالتي حالة ولالقيت وقت حتى أزور الرياض وهذا أنا رحلتي بكرة بعد المغرب على أمريكا..
مشاري:سلامته مايشوف..
سعود: الشر مايجيك... بس أبدآ ماتوقعت بهالوقت إنك موجود بالسعودية لأنك العادة هالوقت شاخط على برا ومنت بالسعودية أبد...
مشاري سكت وسرح شوي..
سعود: وشعندك هنا بجدة..
مشاري:...ها
بعد تفكير بسيط...
أبد بس في مشاكل هنا بالحلال ودزوني أخواني أشوف شالسالفة..
سعود: وهاه خلصت؟؟
مشاري:...... إي إي خلصت
سعود: أجل اليوم كله أنت ضيفي..
مشاري: لاياسعود الله يستر عليك... دامك مشغول ماودي أثقل عليك..
سعود: أفا عليك وشمشغوله أفضى لك... تعال يبن الحلال نروح نتقهوى ونتسكع شوي ونتذكرأيام زمان ونسولف وبعدها نتعشى وكل واحد يروح لحالها..
اليوم أنا فاضي لكن بكرة بقوم من بدري أخلص أشغالي,,, عشان كذا طلبتك يامشاري تقبل دعوتي وتجي معي..
مشاري كان من جد وده أنه يغير جو ويبعد شوي عن الجلوس مع رهف:
خلاص والله ما أردك يالغالي بس انتظرني شوي بطلع احط هالأوراق وأجيك الحين..
سعود:خلاص أجل بستناك هنا إلين تنزل..
::
طلع مشاري لجناحه هو ورهف وأول مادخل لقى رهف قاعدة تستناه وأول ماشافته وقفت إحترامآ له:
هلا مشاري..
مشاري يوم شافها على طول نزل راسه وكان يتحاشى إنه يناظرلها وقال:
شوفي رهف أنا بطلع الحين ,, هذي شريحة لك جديدة بدل هالسوا لأني ما أحب حركات هالشحن أبدآآ..حطيها بجوالك وشغليها..
وهذي أوراق مهمة حافظي عليها إلين أطلبها منك..
رهف: ....مشاري بتطلع وتخليني؟؟
مشاري: اشبيسيرلك يعني.. إقعدي ناظري بالتلفزيون لين تطفشين ونامي..
الفندق أمان من بيجيك يعني... أنا طالع مشوار مهم..
ويطلع مشاري ويخلي رهف مقهورة وواقفة لحالها..
دخلت رهف غرفتها وهي سرحانة وبالها مو معها أبدآ وحطت الأوراق المهمة بوحدة من شنط اليد حقتها..
رهف:ياربي معقول في عريس يطلع ويخلي زوجته لحالها..
الله يهديك يامشاري..
::::
::::::
الساعة,,3 الفجر
(سوق حراء..)
سعود: آآآه يامشاري,,, سبحان الله مهما شفت من بنات حلوات وشقر ولا عباتي ولا عباتك فهالدول اللي برا..مافي مثل السعوديات..
ملح وزين وثقل وجمال... بالله يامشاري شوف هالثنتين اللي قدامنا...شي شي
مشاري:هههههههه الله يرجك ياسعود مابعد بطلت هالحركات..
سعود:وش ابطل,, الله يهديك من شاف ذالعيون وهاللثم ضاعت علومه..
مشاري:مساكين هالبنات تتمكيج وتتزين وتعب عمرها وآخر شي نازلة السوق..
وللأسف من بيطالعها؟؟؟
إلاكل واحد ناقص مافيه خير..
سعود:... احم..احم ,,,ياخي راعي شعوري ياخي..عيني عينك تسبني..
مشاري:ههههههه ياحليلك ياسعود والله إني ماأقصد بس استغرب اشلون ترخص عمرها وتقعد فاتشة ومتمكيجة عالآخر وتسبلي بهالعيون كذا..
سعود:آآآآه ,,اسكت اسكت بس... التفتوا التفتوا
مشاري:منهم؟؟
سعود:الثنتين اللي اقولك عنهم.. ياحليلهم شفت إشلون يضحكون لنا.
مشاري: ولاالحين قاعد... رح رقم..
سعود: ودي ودي ,,, بس خلاص وش استفيد بكرة مسافر..
مشاري:ههههه أحسن ههههههه
سعود: والله الود ودي اسفطهم واحطهم بالشنطة وآخذهم معي أمريكا..
أقول مشاري ورى ماترقمهم إنت وتوسع صدرك بهالصيفية دامك ماسافرت..
,,,, شوي ولا جوال مشاري يدق..
طلع مشاري جواله ولا لقى (r.f يتصل بك...)
قعد مشاري يطالع بالأسم...طبعآ هالمز يعني رهف..
سرح مشاري وتنهد وحط جواله عالصامت ورجعه بجيبة وناظر قدامه وهو سرحان..
سعود: إخــــــــس...إخــــــس
مايمديني عالرومنسية وشهالحركات..
مشاري ينتبه لنفسه:..ها وشو أي حركات؟؟
سعود:لاياشيخ ماشفت عمرك وشسويت؟؟
مشاري:وشو شسويت؟؟
سعود:أقول إخلص علي منهي,,منهي؟؟
مشاري:الله يصلحك منهي اللي منهي؟
سعود:لاااا يعنني بريء...ذي اللي يوم دقت تنهدت الين بغت تطلع روحك..
مشاري:ههههه سعود الله يهديك تعرفني ماتوصل فيني أرقم وأكلم..
سعود:لاياشيخ...الله يسقي زمان أول..
مشاري:ههههههه لا لا خلاص عقلنا..
سعود:ههههه تتذكر آخر يوم في امتحانات الوزارة وشسوينا..
مشاري:هههههههه ياالله وأنا أقدر أنسى..
,,,,"وتموا مشاري وسعود يتمشون ويسولفون لما أذن الفجر وراحوا صلوا ووادعوا بعض وداع حار وكلن راح بطريقه...
:::::::::
:::::::::::::
(في فندق راديسون ساس)
دخل مشاري للجناح وهو تعبان ودايخ جدآ..
وانصدم لما لقى رهف قاعدة عالكنبة لأنه توقع إنها نامت وكانت تفرك بيدينها وعيونها مليانة دموع ومتوترة بشكل فظيع..
رهف:مشــــــاري وينك؟؟
مشاري وقف ورفع حاجبه وماعطاها وجه ودخل داخل عشان يغير..
ومن عادة رهف إذا دخل مشاري يغير تقعد تستناه برا بس هالمرة من شدة توترها وخوفها لحقت وراه للغرفة..
رهف:مشاري خوفتني عليك... كل هذا وانت برا؟؟
مشاري:معليش ياطويلة العمر آسف مرة ثانية أبحط برقبتي سلسلة واعطيكياها تمسكينها بيدك عشان توجهيني وين أروح..
رهف:مشاري وشفيك...أنا كنت خايفة عليك,,, من قبل المغرب وأنت برا وكل هذا وأنا أبي أدق عليك بس كنت مترددة,,,وعلى الساعة ثلاث دقيت عليك مارديت علي...
مشاري:آهاا... ياحليلها حاسبتلي الوقت بعد..
رهف:مشاري حبيبي أنا ما أحاسبك بس انت المفروض تكلمني عشان تطمني..
مشاري بنبرة صوت مرتفعة جدآ:
لااااا,,,,احلفي هذا اللي ناقص بعد تحاسبيني..
وبعدين وشحبيبي هذي,,,,, بزر أنا عندك..
شوفي يابنت الناس لاتحطين لنفسك قيمة أبدآ ولا تقولين أحاسبك وما أحاسبك مو إنتي اللي تحاسبيني..
أمي وهي أمي ماكانت تسألني وين رايح ووين جاي تجين إنتي تبين تسوين نفسك شخصية علي..
وياخذ مشاري ملابسه بيده ويدف رهف اللي كانت واقفة عند الباب ويطلع للصالون..
,,هنا رهف صكت الباب ووقفت وتكت عليه وحطت إيدينها الثنتين على فمها وانهارت تبكي من غير صوت..
ليش يسوي فيني كذا ليـــــــش؟؟
أنا وشسويت له؟؟
الله يعلم إني خايفة عليه ويوم تأخر انهبلت..
ليه يظلمني؟؟
"""من جهة مشاري رمى ثيابه عالكنبة بأقوى ماعنده وجلس يغير بكل عصبية..
والله هذا اللي نشبتلي..
ماأطلع إلا وين رايح وين جاي..
ويعنني أحبك""تأخرت وشغلت بالي عليك..
وكيدهن عظيم لكن هين يارهف والله لخليك تتأدبين وتعرفين مستواك زيك زي أي شغالة بالبيت..
لكن هين .. موكفاية إني نايم عالكنبة زي الكلب..
وهي ماخذه راحتها بالغرفة..
كل الشباب اللي في سني عايشين سنهم وحياتهم إلا أنا !!!..
,,تمدد مشاري عالكنبة وهو يتنفس بقوة..
ياالله من يصدق إنه بظرف ثلاث شهور,,,يسير هذا حالي؟؟
يابختك..ياخالد..يابختك مت وارتحت..
ياليتني أنا...
استغفر الله العظيم استغفر الله العظيم
إشهالتشويش اللي إنت عايش فيه يامشاري..
منت قادر تاخذ قرار صح بحياتك..
ماكنت كذا يامشاري ماكنت كذا أبدآ.. وبعدين إش اللي سويته اليوم ؟؟
أنا اشلون أكذب على سعود وأقوله إني جاي لشغل؟؟
ليش ماقلتله إني تزوجت؟؟
,,
تم مشاري يتقلب على الكنبة وهو متوتر ويحاسب نفسه ومو مصدق الواقع اللي يسيرله..
لكن مادرى مشاري إنه كذب على سعود وماقاله سالفة زواجه لأنه بكل بساطة رافض بشدة الواقع اللي هو عايش فيه ويبي يطلع منه حتى لوكان بالكذب..
::::
::::::
(بيت أم عبدالرحمن)
الساعة 4الصر
أسيل:ياحبينلك كيفك؟؟
رهف: حمدالله
أسيل:إخس إشهالرقم المميز إشهالحركات؟؟
رهف:ياحبيلك كيفك وكيف عمتي وأمك وإيمان
أسيل:والله الحمدلله كلنا طيبين..بيتنا مظلم متى بترجعون تنورونه..مررا مشتاقين لكم
رهف وهي ودها إنها ترجع اليوم قبل بكرة:
مادري والله متى ماقرر مشاري..
أسيل:هههههههه إذا على مشاري منتي براجعه أجل إلا السنة الجاية.
رهف:ليه؟؟
أسيل:وش اللي ليه..غرقان بالعسل أدق على جواله من بعد الظهر يالله يالله رد علي واقوله عطني رهف يقولي أنا نايم خذي رقم جوالها ودقي عليها..
بعدين عاد أمي هاوشتني وقالتلي أدق عليك بعد العصر..
,,رهف في نفسها(إي مرة الله لايخليك تعيشين بهالعسل اللي مغرقني)
رهف:عزيزة وغالية حبيبتي متى مادقيتي حياك الله..
أسيل:هاكيف ميشو يابختك وانتي معاه..
تصدقين أنا مايحلالي السفر إلا إذا كان معي.. السفرية يسيرلها طعم ثاني إذا ميشوكان معانا..
رهف بكل ألم:الله يخليه لكم ولايحرمه منكم..
أسيل:وانتي بعد الله يخليك له..عالعموم حبيبتي أخليك الحين..سلميلي على عمو ميشو أوكي؟؟
رهف:أوكي حبيبتي سلمي عالكل..
,,قفلت رهف الخط..,,,,
...
(في جدة...)
كانت نفسيتها جدآ تعبانة وقررت إنها تصالح مشاري وتتأسفله مع إنها ماسوت شي بس قالت ماله داعي أكبر السالفة لأنه من سابع المستحيلات يجي يصالحني..
تعطرت رهف وحطت ميك أب خفيف.. وطلعت لمشاري..
كان مشاري متخدد وحاس بالقرف ويلعب بالميدالية بيده ومقابل التلفزيون..
رهف:السلام عليكم
مشاري:.....
رهف جلست جنبه وبعد صمت دقايق بسيطة:مشاري... أنا آسفة
مشاري:..... ""ولايطالع فيها حتى
رهف ودموعها تنزل غصب عنها:
مشاري معليش أنا آسفة خلاص لاتزعل مني آخر مرة أتدخل فيك..
مشاري الله يخليك كلمني لاتسفهني أناما أحب أعيش مع أحد وهو متضايق مني ولايبيني خلاص أنا آسفة..
مشاري:..... ""عينه ماتحركت من عالتلفزيون
,,,زاد صياح رهف وحست بسلبية شديدة من جهة مشاري لها..
شالت نفسها وقامت ودخلت غرفتها وجلست على كرسي الكمدينة وكملت صياح..
,,,الموقف اللي سار بين رهف ومشاري ما يحتاج كل هالصياح بس لأنه رهف حاسة بالضياع وعدم الاستقرار وقاتلها سفهان مشاري لها تعبت نفسيتها وسارت ماتتحمل... وتبكي على أتفه سبب..
بعد ماطلعت رهف من عند مشاري.. حس مشاري إن قلبه يعوره وموفاهم هو ليه يسوي كذا وليه هالشي يسير؟؟
ياربي أجرمت بحقي وبحق هالمسيكينة,,, أعوذبالله من ابليس..
**
**
بعد ما أذن المغرب و صلى مشاري...
قال:حرام خلاص خلني أطلعها مسيكينة من أمس ماشفتها كلت شي..
شكلها ماتاكل إلا إذا شافتني آكل..
,,,دخل مشاري على رهف لقاها نايمة عالسرير من غير ماتتغطى وبنفس اللبس اللي كان عليها العصر..
جلس مشاري على طرف السرير وماقدر يمنع نفسه أبدآ إنه يتأمل رهف..
غصبن عنه قال بنفسهsleep Angel ..
بالفعل كانت رهف مثل الملاك النايم .. لاإراديآ مد يده مشاري على خدها ..
لكن رهف فتحت عيونه وحست فيه ويوم شافته اشهقت..
مشاري استحى وقام بسرعه..
رهف: اشفيك؟؟
مشاري:هاااه,,, لابس كنت ابي اشوف رموشك تركيبة ولا طبيعية..
(يلعن أم التصريفة,,,,,)
"رهف حست إن مشاري يصرف لأنه كلامه مايدخل الراس أبدآ..
لكنها قامت وجلست عالسرير وانشغلت تعدل بشعرها.. وتطالع تحت وتخفي ابتسامه سببها تصريفة مشاري البريئة,,
مشاري وهو يناظرها بعينه من عالجنب:
صليتي؟
رهف: ليه أذن؟؟
مشاري:الناس صلوا من زمان..
رهف وهي تقوم من عالسرير ومتوجهه للحمام..
مشاري: أقول رهف لا صليتي البسي عباتك بنطلع نتمشى برا بعدين نتعشى لاتتأخرين..
رهف:...طيب
,,,بعد ماطلعت رهف جلس مشاري عالسرير,,
قال: صدق إني غبي وشهالتصريفة اللي زي وجهي..
ماشالله يـــاكثر رموشها ...
يعني بس رموشها الشي الوحيد اللي حلو فيها..كلها على بعضها حلوة..
طلع مشاري للصالون قبل ماتجي رهف ووقف عند الشباك وهو سرحان وفحيرة شديدة والأفكار البطالة توديه وتجيبه...
رهف:مشاري ترى خلصت..
يلتفت مشاري بكل برود وينظرلها بنظرات تعالي ويدقق النظر فيها ويرجع يناظرلها من فوق لتحت..
رهف خافت :مشاري وشفيك؟؟
مشاري يعطيها ظهره ويمشي بهدوء :
ياللاه إمشي..
مشت رهف ورى مشاري وهي مستغربة من طريقة نظراته لها..
...
...
كان طول الطريق ساكت ومافتح فمه بكلمة..
لين وصلوا لمنطقة بالكورنيش هادية يعرفها مشاري ومتعود عليها..
كان دايم يقعد فيها إذا حس بضيقة صدر وحيرة..
انبسطت رهف لما جلست قدام البحر كانت أول مرة تشوف هالمنظر..
مشاري:رهف ماله داعي قاعدة بنقابك تقدرين تفصخينه..المنطقة هنا هادية ومافي أحد يمشي كثير,,
رهف انبسطت زيادة لماقالها مشاري إنه مافي أحد..
وفكت نقابها وخذت نفس عميق وقعدت تطالع بالبحربكل تأمل من جهة اليمين..
مثل ماكان مشاري صاد عنها وملتفت للبحر من جهة اليسار..
بعد مرور ربع ساعة من الصمت المتبادل والمطبق على المكان..
,,
,,
مروا شلة شباب صغاريمشون على الكورنيش كانوا من أهل جدة..
...: شوف شوف..
..: إش أشوف..
...: القمر اللي جالس هيناك..
....: وااااوو
....: يابخت البحر اللي قاعدة تطالع فيه..
...: إلا هذاكا اللي جالس جنبها تتوقعوا زوجها؟؟
...: بالله عليك جالس قريب منها بهالشكل أكيد زوجها..
...: إشبه سافها مايطالع فيها..
... : مومقدر النعمة
... : إشرايك نربيه ونعلمه إشلون يقدر النعمة اللي بين إيديه..
... :إش رح تسوي يامتهور؟؟
...: إمش معايا وانت ساكت ورح تعرف إش رح أسوي..
,,,مشوا شلة الشباب إلما وصلوا خلف مشاري ورهف..
وبأعلى صوت قال الأول..
....: اسكت اسكت ياماهر لاتكلمني..
....:اووف اشبك زعلان إشسويت؟؟
...: بالله عليك القمر من يمينك وانت صاد عنه..
...: ياخي اش اسوي مغرور وشايف نفسي..
...: ليــــــه الغرور حرام عليك..
**ويلتفت مشاري بكل عصبية وينظرلهم نظرة استحقار..
هنا الشلة التفتوا على بعض وقاموا يضحكون بصوت عالي وهجوا بسرعة لأنهم يستهبلون بس ماكان قصدهم المشاكل والهواش,,,
بعد ما مشوا الشلة وابتعدوا عن المكان اللي فيه رهف ومشاري التفت مشاري لرهف لقاها رجعت تنقبت ومازالت تنظر للبحر..
مشاري أخذ نفس عميق وقال فنفسه:
آآآآآه كل هالجمال وهالنظارة وهالأسلوب الذرب وتوها تتزوج!!!
ليش للحين ماتزوجت؟؟
أبوها سيئ سمعه ... طب وإذا؟؟
يمكن رهف كانت راعية حركات؟؟
,,,استغفرالله,,,شهالأفكار يامشاري..
يقطع تفكير مشاري صوت رهف..
رهف: مشاري..
مشاري:نعم؟؟
رهف:ممكن أطلبك طلب..
مشاري:نعم..
رهف: مشاري ممكن قبل مانرجع الرياض نعتمر..
نفسي أزور الحرم وآخذلي عمري,,
مشاري:....
رهف:...خلاص إذا ماتبي نخليها بعدين..
,,,ياربي أنا ماصدقت يرضى أقوم أعكر مزاجه مرة ثانية..
مشاري: رهف بسألك سؤال؟؟
..رهف انبسطت مرة إن مشاري أخيرآ بيفتح معها موضوع ويسولف..
رهف:آمر..
مشاري:مايامر عليك عدو..رهف إنتي ليه للحين ماتزوجتي..
رهف جلست تطالع بمشاري وهي مو مصدقة أنه في رجال بهالدنيا يسأل زوجته هالسؤال..
مشاري:شوفي أنا أقصد يعني وحدة مثلك المفروض انها متزوجة لها فترة..
رهف:..... النصيب
مشاري سكت وحس إن رهف تضايقت من السؤال بس لازم يلقى جواب لسؤاله..
مشاري:رهف قد انخطبتي من قبل؟؟
رهف:طبعآ أكيد..
مشاري:طيب وليه ماتزوجتي؟؟
رهف كان الكلام يجرحها ومثل السكانين تنغرس بقلبها..
رهف:مادري؟؟
مشاري:إشلون ماتدرين؟؟
لاتقولينلي ماكان أحد يعجبك.. ولا مالقيتي أحد من مستواك..
,,, كان كلام مشاري جدآ قوي على رهف.. لكن رهف مسكت نفسها وأعصابها وتعاملت مع الموقف بحكمة..
رهف:مشاري أخوك خالد لما توفى هل كان بيدك إنك تمنع عنه الموت؟؟
,,مشاري سكت واستغرب من كلام رهف لأنه ماله علاقة بسؤاله..
رهف:حتى أنا يامشاري جلوسي ببيت أهلي ماكان بيدي ..
مشاري:طب اشمعنى أنا وافقتي علي..
رهف:ليه ماكنت تبي أوافق عليك...؟؟
مشاري: إنتي كلما سألتك سؤال تجاوبيني بسؤال..
رهف:......
مشاري:وشفيك ساكته؟؟
رهف بهدوء: مشاري إنت اشتبي توصله... أنا موفاهمتك أبدآ..
كلامك هذا يدل إنك إنت ماتبيني ومومقتنع فيني..
مشاري: رهــــــف
رهف تقاطعه:مشاري عمر اللي يحب وحدة ويبيها مايقولها هالكلام لو إيش؟؟
مشاري يوقف ويقول وهو معصب:
إمشي نرجع..
,,
وركبوا رهف ومشاري السيارة ورجعوا للفندق من دون مايتعشون..
وكالعادة مشاري رمى نفسه عالكنبه وسرح بالتلفزيون..
ورهف راسها على مخدتها ودموعها موراضية توقف..
*********
*******
****
انتهى الجزء السادس..
*هل بياخذ رهف ومشاري عمره قبل مايرجعون الرياض؟؟
*إش الصدمة اللي رح تهز كيان رهف بعد رجوعها للرياض؟؟
*ياترى من أصحاب قصة الحب الجديدة فهالقصة..واشلون رح تسير..