منتديات بنوته - عرض مشاركة واحدة

02-04-2011, 02:55 AM

(الجزء السادس)
طارق:حشى,,, حشى منت بمسافر شهر عسل رايح الجيش؟؟
مشاري شيل هالتكشيرة من وجهك..
مشاري وهو سرحان ويحوس بجواله:من قالك إني مكشر أو زعلان بالعكس...
طارق: لاوالله من شاف وجهك يحس إن ميت لك ميت..
مشاري: فكنا من لقافتك وبثارتك... إلا شخبار عزام؟؟؟
طارق: ماعليه يزقح... آخر مرة شفته يوم زواجك..
لا وتراه زعلان منك..
مشاري: يزعل الين يوم الدين...
طارق: هههههه حرام عليك يا مشاري تراه ضعيف..
مشاري: ضعيف ماقلنا لا,,, بس داج وموبصاحي أبد... أنا ماقلتلك وشسوى قبل يوم زواجي بيومين... الا صح وشوله أقولك وأنت كنت معي وشفت بعينك وشسوى خير وين إحنا فيه من متى نسوي هالحركات؟؟..
طارق:هههههههه ياخي فلااا موبصاحي..
مشاري: إلا مجنون..
طارق: ياخي مسيكين الله يهديه ويتوب عليه قبل لا يفوت الفوت..بس أنت كان تفهمت الموضوع ولا عصبت عليه بهذيك الطريقة شفت الضعيف يوم زواجك حضر وقعد معك وسولف معك ولا كأنك سويت شي...
مشاري:نعم؟؟؟ تبيني ما أعصب عليه.. طارق بالله عليك أنت راضي عالشي اللي سواه عزام..مجمع لي أربع بنات صايعات مادري من وين جابهم في فلته,, ويقولي كل واحد يختار وحدة ويوسع صدره,,,, أنا وياك طارت عيونا أقوله ياعزام استح على وجهك ياعزام وشهالحركات...يقولي يامشاري ترى ماجبتهم إلا عشانك هذي حفلة توديع للعزوبية لك ... اليوم وسع صدرك لأنه بعد يومين خلاص بتبدى ضيقة الخلق..
بالله ياطارق كم مرة أنا وياك فهمناه أنه إحنا ما نحب هالحركات لكنه يستعبط وماجاه جزاه وأقل من جزاه..
طارق:يامشاري عزام ماينلام مسكين من يوم وعى عالدنيا وهو مشرد ومشتت ولا حس بالأمان والراحة ولا لقى تربية صح,, مايلقى إلا هالألوف اللي تنكب برصيدة شهريآ,,, أمه عايشة مع زوجها بأمريكا ولا تدري عنه وكل ماقالها أنه يبي يسافرلها ترسله فلوس وتقوله أنا بسافر للمؤتمر الفلاني بالدولة الفلانية مع زوجي,,
وأبوه مع زوجته وعياله بالشرقية لاهي بمصانعة ومحلاته وعياله وكل ما سافرله عزام تنكد عليه مرة أبوه وتهبل فيه وأخوانه مسفلين فيه ومحقرينه عشان كذا الولد
فضل يعيش لحاله ويكونله عالم خاص بعيد عن هالصجة كلها ..
مشاري:طارق أنا عارف هالحكي كله ومقدر ضروفه.. بس هم إحنا ماقصرنا معاه ياكثر ماوقفنا جنبه ونصحناه وقلنا هذا طريق لا مشى الواحد فيه ينبلي ولايقدر يطلع منه ولاهوطالع إلا بفقر ولا مرض ولا فظيحة لكنه مايفهم,,,
وبعدين ياطارق إنت آخر واحد يتكلم عن الظروف .. ظروف عزام لاتقارن بظروفك أبدآ..
أبوك ميت وأمك مريضة بالقلب وأختك اللي أكبر منك مقعدة ومتخلفة عقليآ وأنت اللي تشيلها وتحطها ,وعندك خواتك الثنتين اللي بالمتوسط إنت اللي تصرف عليهم وتراعيهم وتربيهم وحالتك حالة ...
ومع كل هذا منت بقاعد تسوي ربع اللي يسويه عزام..
طارق: يامشاري محنا ملائكة منزلين كل الناس يخطئون.
مشاري: يخطئون بس مو يستمرون بالخطأ ويجرون خلق الله معهم أوكي مشيناها معاكس بالتليفون مشيناها استهبال في الأسواق بس ماتوصل لجريمة تهز عرش الرحمن ياخي ذنوبنا تكفينا....
طارق:الله يهديه,,, الله يهديه يا مشاري..
,,,مشاري يقوم: اللهم آمين يالله طارق أنا بروح الحين ,,
طارق: الله يحفظك يالغالي انتبه لنفسك ولزوجتك ,,, ويقوم طارق ويحضن مشاري ويودعه.. ويحمله مشاري السلام لصديقهم عزام لأن مهما صار هذا صديقهم ولازم يوقفون معه الين يبطل هالحركات ويتوب لله....
***
*****
وصل بسيارته عند باب البيت ... لكنه حس نفسه تورط..
,,,ياربي ماودي أنزل وأدق جرس البيت أخاف يطلعلي أخوها البثر ولاأبوها وأنا مالي خلق أحد ... وحتى رقم جوالها ما أخذته منها..
ياللاه مافي حل إلا إني أدق الجرس واللي يسير يسير..
نزل مشاري ودق الباب..
أفنان: مين؟؟
مشاري:أنا مشاري بالله خلي رهف تنزل..
أفنان: طيب..
....
أبرار: من اللي دق الجرس؟؟
أفنان:هذا مشاري زوج رهف يقول خليها تطلع..
أبرار: خلاص للحين قاعدة انزلي تحت وقوليلها تذلف..
... أول مانزلت أفنان لتحت عشان تنادي رهف,, على طول أبرار نطت للشباك وفتحته وقامت تطالع مشاري..
أبرار: ياااويلي يجنن..
أثير تتجه لأبرار: منهو؟؟
أبرار:مشاري يا أثير تعالي بسرعة شوفي واقف برا في الشارع يجنن..
أثير: أشووف [وتشهق أثير] يجـــــــــــــــنن
أبرار: لا وشوفي سيارته بعد.. شي يخقق
أثير: الله يابختك يارهف كامل والكامل الله..
أبرار: ياالله يالقهر بالله واحد مثل هذا تاخذه عجوز ابليس..
أثير: حرام عليك يا أبرار حتى رهف ماعليها مزيونة..
ابرار: إي مرة اللي مثلها تروح دار المسنين أزين..
... ولا صوت منيرة من تحت : أبراااار,, أثيــــــــر , تعالوا سلموا على رهف بتروح..
أبرار:روحي انزلي سلمي عليها وأنا بقعد أطالع هالزين وقوليلها أبرار تتروش,,
أثير: ياشيخة انزلي وشبتقعدين تسوين هنا..؟؟
ابرار: بقعد أطالع هالملاك واتحسر على حض أمن جابتني..
أثير: هههههه الله يرجك يا ابرار الرجال بيجيه عين هو ورهف والسبة أنتي..
أبرار: أقول اطلعي برا..
.....,,,
ودعت رهف أهلها وكان الوداع جدآ بارد لأنه الصراحة ماحد جاب خبرها سافرت ولا قعدت هذا موشي مهم بالنسبة لهم إلا صالح اللي كان يتمنى لأخنه كل خير..
,,, طلعت رهف ولقت مشاري يستناها بالسيارة برا..وركبت اسيارة..
رهف:السلام عليكم..
مشاري:.....سلاام
رهف:طولت عليك وانت برا؟؟
مشاري:........لاء
رهف:مشاري الله يهديك خوفتني عليك إنت قايلي إنك بتجي العصر تاخذني وتأخرت مرة علي ..
هنا مشاري مارد على رهف وعلى طول قالها: ,,, وين جوالك؟؟
رهف حست بالتصريفة: هنا معي..
مشاري:سجلي رقم جوالي ودقي دقة وقفلي عشان اعرف رقمك..
رهف:... طيب
مشاري******0555) دقي دقة
رهف بعد مانقلها الرقم دقت دقة وقفلت ..
::::
وصلوا رهف ومشاري البيت وقالها في السيارة قبل ماتنزل:
زي ماقلتلك الساعة 11 شناطك جاهزة..
رهف: طيب..
نزلت رهف ودخل مشاري الديوانية وسولف مع أهله شوي وبعدين طلع غرفته عشان يرتب ملابسه بالشنطة... وكان طول الوقت يتحاشى النظر لرهف وماقالها ولا كلمة ولماعرضت عليه إنها تساعدها قالها بكل رسمية:
لآء شكرآ..
بعد ماجا وقت طلوعهم للمطار سلموا رهف ومشاري على أهل مشاري وتحركو بالسيارة للمطار واللي وصلهم للمطار السواق ..
:::
بعد قص البوردنق وشحن الشنط.. مشاري خلا رهف تجلس بصالة الانتظار جنب مجموعة حريم وهو راح جلس بعيد عنها,, على العكس من كل العرسان المتواجدين كان كل واحد جنب عروسته وحاط راسه براسها وكل واحد غرقان بالسوالف والمزح ..
إلا رهف اللي كانت تحس بالوحدة وجالسه لحالها وعيونها ما انشالت عن مشاري اللي كان جالس بعيد عنها ومقابلها ولا فكر إنه ينظرلها نظرة وحدة..
الساعة11,55دقيقة
شوي ولا المطار يعلن عن تأخر رحلة جدة من الساعة 12 الى الساعة 2,15..
هنا مشاري انصدم وحامت كبده وقال في نفسه:
يا الله على كثر ماسافرت وجيت سبحان الله ماقد صادف وتأخرت الرحلة الا هالرحلة لاوبعد مو أي تأخير..ساعتين وزيادة..صدق المنحوس منحوس,,
والبلشة إني بموت من النوم.. والصداع يالله أقوم آخذلي كوب قهوة أعدل فيها المزاج ,,,,,.. وانتبه مشاري للاب توب اللي بيده..,,,يووه يالفشلة يعني اشلون اقوم واشتري وهو بيدي مافي حل إلا أروح واعطيه رهف بدل ماهي قاعدة زي قلتها..
رهف كانت قاعدة وطفشانة وألمت الجلسة ظهرها بشكل كبير ولما سمعت خبرتأخر الرحلة تأزمت نفسيتها زيادة.. وخاصة إن كل رجل كان بعيد عن عايلته قام عند أهله وقام يسولف معهم ويصبرهم ويطمن نفسياتهم بعد خبر تأخر الرحلة إلا مشاري..
شوي ولا رهف شافت مشاري متجه لها وارتسمت على وجهها ابتسامة وقالت:
ياحرام والله إني ظالمته,,
مشاري لما قرب منها: خذي اللاب توب خليه عندك بروح أجيب لي كوفي تبين؟؟
رهف بخيبة أمل: لآء شكرآ..
راح مشاري على طول وشراله كوفي ورجع جلس بمكانه وقعديشرب الكوفي وهو في أشد حالات الطفش والملل طلع جواله عشان يقول لأهله إن الرحلة تأخرت ويخليهم ينامون وإذا وصلوا بيرسلهم مسج ويطمنهم..
توه ينتبه مشاري للميسد كول اللي بجواله من رهف لأنه طول الوقت مافتح جواله ولا كلم أحد..
لما فتح مشاري رقم رهف قال:
لا وبعد من زين الرقم ...لا وسوى بعد.. بطلعلها شريحة ورقم زي الناس وفواتيرها تتسدد زيها زي أي فاتورة بالبيت بدل هالسوا فاظي أشحنلها كل شوي..
::::
,,,,الساعة 3,50 الفجر
بعد ما انفجر مشاري من الانتظار وملت رهف من الجلوس,,
اعلنوا المطار للمسافرين لرحلة جدة إنه يتوجهوا للبوابة... كل الناس قاموا بعد انتظار طويل ,,
وعلى طول مشاري فز وقام وأشر لرهف بكل عصبية إنها تقوم..
هنا رهف خافت من نظرات مشاري وفزت على طول لكنها من التعب وشدة احتياجها النوم نست تجيب اللاب توب وخلته عالكرسي اللي جنبها,, وطارت لمشاري..
مشاري هنا لاحظ نسيارن رهف للاب توب ولا إراديآ لما وقفت جنبه وبكل عصبية قال:
الحين انتي خبلة ولا تستهبلين جاية تتمخطرين وين اللاب توب؟؟
رهف:ها...
وتذكرت رهف إن مشاري اعطاها اللاب توب بس هي نسته..
رهف وهي خايفة وقلبها يدق بسرعة:طيب طيب بجيبه الحين..
مشاري بكل عصبية:انثبري أنا بجيبه,,
::
جلست رهف على مقعد الطيارة ودموعها كانت تنزل لاإراديآ على خدودها لأنها تهزأت تهزيئ محترم ولايمكن عروسه يسيرلها هالشي...
من جهة مشاري اللي ماكذب خبرعلى طول حط مخدة تحت راسه ونام...
وترك رهف مجروحة وحاسة باحساس كبير بعدم الأمان والاستقرار..
::::
::::::
وصلوا مشاري ورهف عالساعة 6 الصبح مطارجدة وبالفعل لقى الموظف أمجد يستناه ومعاه مفاتيح السيارة .. أخذ مشاري السيارة وركب الشنط وعلى فندق
(راديسون ساس) ولما طلعوا جناحهم بدون أي شعور ولاتفكير فصخ مشاري ثوبه وشماغه وظل بسرواله السنة وفنيلته ورمى نفسه على الكنبه اللي قدام التلفزيون من دون مايلبس بجامته ولا ياخذله شور ولا يزين أي شي ولايقول أي كلمة لرهف وراح في سابع نومة..
أما رهف كانت تحس راسها بينفجر من الصداع وألم فظيع بعيونها من كثر الصياح,,,غيرت ملابسها ولبست بجامة وتمددت عالسرير وراحت بسابع نومة...