منتديات بنوته - عرض مشاركة واحدة

07-15-2010, 12:07 AM

عبدالله كان يالس في حجرته مهموم وسرحان، يفكر فالي صار وكيف هو كان السبب في تعب أغلى الناس على قلبه..
رن تلفونه وشاف رقم غريب وقال يمكن حد يبا يطمنه على حرمته.. شل التلفون وعرف الصوت من قالت ألوو..
عبدالله: إنتي شو تبين مني!!.. ومن وين يبتي رقمي..؟؟
غدير: عبدالله مب صعبه ألاقي رقمك.. وإنت تعرف شو الي أبيه منك.. أنا يايه أعيش حياتي وياك الي انحرمنا نحن الإثنين منها..
عبدالله: انتي ماتستحين على ويهج، حرمة ريال وأم عيال وتسوين جي.. عيب والله عيب..!!
غدير: عبدالله زوجي توفى من سنه تقريبا والله مارزقني عيال لأني عاقر وما أييب عيال..
عبدالله الي انصدم: وأنا شو ذنبي، أنا إنسان تزوجت والله وفجني من بعدج.. وحرمتي حامل واليوم يابت لي ولد..
غدير: بس أنا غدير حبك الأولاني.. وكل حب يموت إلا الحب الأولاني..
عبدالله: هههههههههه تخدعين نفسج وإلا تخدعيني، لو تبين تكتبينها أغنيه الكل بتعيبه الكلمات بس الواقع غير.. الواقع يقول الحب الخالص الصافي هو الي يبقى..
غدير: بس أنا..
عبدالله: حبي لجميله هو الأصل وانتي وهم وسراب إنتهى من حياتي من عشر سنين وأكثر..
غدير: عبدالله حرام عليك.. مستعده أعطيك عمري كله بس ارجع لي..!!
عبدالله: خلي عمرج لج.. أنا عندي زوجتي ومرتاح معاها، ووالله ياغدير لو دقيتي على رقمي مره ثانيه لاتشوفين الموت بعينج..
وبند في ويها وهو حده معصب لأنها إنسانه ماتستحي لى ويها.. الله ياخذها رجعت ودمرت حياتي.. عساها ماتتوفق ولاتتهنى بحياتها..
ودق تلفونه مره ثانيه بس كان رقم أمه..
عبدالله: هااا أميه بشريني عساها أحسن..
أم عبدالله: الحمدلله الحين أحسن، بس كنت أباك تييب لها شوية ملابس وييب بعد أغراض ولدك..
عبدالله: يعني تبيني أسير المستشفى..؟؟
أم عبدالله: هيه بس لاتدخل دق لي وأنا بظهر لك..
عبدالله بضيج: إن شاءالله..
وبعد نص ساعه عبدالله كان فالمستشفى يسلم الأغراض لأمه.. الي خذتها عنه ودخلت لجميله..
جميله: عموووه.. منو ياب الأغراض..؟؟
أم عبدالله: عبدالله... وقال بيقعد برع.. وإذا إحتجنا شي نقوله..
جميله عورها قلبها عليه: عموه.. إزقريه..
أم عبدلله: تبينه..!!
جميله: هيه..
وطلعت أم عبدالله وقالت حقه جميله تباك.. وهو ماصدق ويلس يحلفها..
أم عبدالله: مافيك مذهب تحلفني وأنا أمك..
عبدالله: يعني صج تباني..؟؟ ياربي مب مصدق..!!
أم عبدالله: يالله إدخل عندها وأنا بسير بشوف الياهل..
ودخل عبدالله لجميله الي كانت راقده عالسرير وفاله شعرها.. ومبين عليها التعب..
عبدالله راح ويلس عالكرسي وهو يتأملها، جميله إلتفتت عليه وهي مب قادره تتحرك وايد.. بس مدت إيدها شوي على طرف السرير..
جميله: تعال هني..
عبدالله ماصدق إنها رضت عليه، قام ونقز عالسريرومسك إيدها وباس راسها..
عبدالله: فديت روحج ياقلبي.. جمول أحبج والله أحبج..
جميله: أدري.. وسامحني لأني قسيت عليك، بس والله من حبي لك سويت الي سويته..
عبدالله باس إيدها: إطلبي روحي تفداج.. بس الله يخليج لاتزعلين علي..
جميله: فديت روحك.. وين سارت عمووه..؟؟
عبدالله: أميه ذكيه أونها تبا تفضيلنا الجو، قالت بتسير تشوف البيبي.
جميله: فديته بخاطري أشوفه.. منو يشبه..؟؟
عبدالله: منو..؟؟
جميله: شو الي منو.. ولدنا يشبه منو..؟؟
عبدالله بحيره: ولدنا.. هيييييييييي ولدنا.. تصدقين مادري، من طحتي وأنا هني حتى ماسألتهم شو يابت..
جميله: يعني ماشفته..؟؟
عبدالله مسح على شعرها: بنشوفه مع بعض.. عسى الله لايحرمني منج قولي آمين..
جميله: آمين.. ولايحرمني منك إنت بعد.

وفي الطرف الثاني..
غاليه يلست ساعات وهي تفكر كيف بتقدر تقنع جاسم يصلح غلطته، ياربي الي صار مب شويه وفيها سمعة عيله بكبرها.. محد يقدر يقنع جاسم غيره أبوه.. بس كيف بقول لريل خالتي ولدك خاطب من وراك وخطيبته حامل منه.. هشام.. مافي غيره الي يقدر يساعدني..
وفعلا دقت لبنات خالتها وقالت لهم إنها بتزورهم الحين، وتلبست بسرعه وراحت تشوفهم..
شروق: مسرع ما اشتقتي لنا، الصبح كنتي هني..
غاليه: امممممم أبا أكلم هشام أخوج في موضوع خاص..
شروق: شوووو..؟؟
غاليه: أقولج خاص.. المهم هو وينه..!!
شروق: في حجرته..
غاليه: زقريه وأنا بنتظره فالميلس..
راحت شروق وهي مستغربه من بنت خالتها وشو الي تباه من أخوها، المهم بعد دقايق نزل هشام وكان لابس جينزوسار الميلس يشوف شو السالفه..
هشام: خير بنت خالتي شو صاير..؟؟
غاليه: هههههههه للحين متأثر بالغرب..
هشام: هيه والله مب قادر ألبس الكندوره للحين.. إنزين شو السالفه..؟؟
غاليه: شروق ممكن تخلينا بروحنا..!!
شروق: لا والله..!!
غاليه: شروق مب وقتج هذا.. والله السالفه خطيره وماتتحمل تأجيل..
شروق يلست تتأفف وتتحرطم وقامت ودخلت عنهم، هشام الي إحتار من الموقف راح ويلس قريب من غاليه..
هشام: خير..!!
غاليه: أي خير ياحسره، أنا يايتنك في مصيبه وأباك تساعدني..
هشام: يالله سترك يارب.. آمريني الشيخه..
وخبرته غاليه بالي صار كله، ومن خلصت هشام حط يده على راسه من الصدمه..
هشام: الله وأكبر عليك ياجسوووم.. توصل فيك النذاله لشرف الناس، حسبي الله ونعم الوكيل فيك.. أنا الي عشت فالغربه مافكرت أسوي هالشي..
غاليه: هشام.. محد غيرك بيقدر عليه، ولو ماتقدر كلمك أبوك يكلمه، لأن صج السالفه بتطير فيها رقاب..
هشام: ولايهمج أنا اليوم بشوف السالفه ولو ماقدرت عليه بكلم الوالد..
غاليه: تسلم وماتقصر..
وطلعت عنه غاليه وخلته يفكر بالي بيسويه.. وهي راحت لبيتها وتدعي ربها إنه ينقذ ربيعتها من هالموقف.