منتديات بنوته - عرض مشاركة واحدة

07-07-2011, 06:32 AM

(( الجزء الثالث والثلاثين ))

صاح فهد في هيفاء بصوت عالي ,, هيفااااء

سمعته هيفاء واستغربت منه ليه يصوت كذا وش صاير ,,,

طلعت له تبي تشوف وش فيه ,,, الا هو واقف في نص الغرفه وحط يده على جنبه ,,

فهد : انتي اللي رتبتي الغرفه ,,

هيفاء : ايه في شي ,,,

فهد : انا ما احب احد يشيل اغراضي من مكان للثاني ,, وهذا طبعي ,, انا الحين وانا اقدر اطلعها من بعض

هيفاء : وش يدريني ان هذا طبعك ,, واعتقد اني مسويه خير ,,

فهد : اكيد وين تعرفين طبعي وانتي هاجه بروووحك ,,,ويضرب فهد الكوشن من الكنبه في الارض ,,, عصب عليها بقووووه

لا وبعد مفتشه درجي,, ومتعبثه بأغراضي ,,,

قربت منه هيفاء ومسكت الكتاب اللي عند راسه ,,وظهرت الورقه اللي في الوسط

هيفاء : بس اظن هاذي من اغراضي ,,,

فهد وببرود شديد : انتي بكبرك من اغراضي ,,,ودفها من طريقه وطلع من الغرفه ,,, نزل تحت وطلع لسيارته وتحرك من قدام البيت ,,, قعد يدور في الحي كم مره وبعدين توقف عند محطة البترول ,,, عبأ بنزين وبعدين مشى ,, راح للكوفي اللي يمر عليه بالعاده ونزل وهو طفشاااان حده ,, ما كان وده يعصب بس هووو طبعه كذا من اول ما يحب حد يتدخل في مكانه واغراضه ,, وهي من اول يوم تزوجها ما فرضت نفسها عليه ولا حاولت تعرف خصوصياته حتى لو كان ما يبي ,, بس مجرد انه يحس انها تبي هالشي راح يرضي غروره ,,,

قعد يدخن وهو تعبان يبي يرجع للبيت يتريح شوي ,,

ام طلال تغدت مع هيفاء اللي ما ذااقت منه شي ولا حبه ,, الى متى وهي وفهد بينهم تتش , على ادنى الدون يتطاقون ,, كله منك يا هيفاء ,, المفروض انك معطيته خبر انك بترتبين اغراضه ,, حلوووه كذا يحطها براسك هالهوشه وتصيرين غلطانه ,,,

بعد ما دخلت ام طلال ,, قعدت في الصاله عندها احساس يمكن يجي فهد بعد شوي ,, بسأله اذا يبي غداء ,, على الاقل اكسر هالشي اللي بينا ,, فهد تأخر ماجاء فطلعت لغرفتها وهي متملله من وضعها مرررره ,,

اتصلت على ريما تسألها عن احوالهم وش اخر تطورات نواف ,, وقعدت تحكي لها موقف البارح

ريما : اتصل علي نواف ,, وقال انا طلبت من فيصل اني اخذك للعشاء برى في مطعم راااقي ووافق

فرديت عليه: ومن قال اني ابي اطلع اتعشى ,, انا ما ابي عشيات برى ,, اذا تزوجنا طلعني

نواف : بمر عليك الساعه 8 وكوني جاهزة ,, وسكر السماعه

كملت ريما وعقبه على طول كلمت فيصل : انت ليه توافق لنواف اطلع معه ليه ما سألتني اذا ابي والا لا ,,

فيصل " زوجك ويبي يطلع معك تتعشون ,, انا لو مكانه كان طلبت من لمياء تطلع معي ,, هما انتي زوجته عااادي يا قلبي ,,

بس عاد لا تسهرون برى ولا تروحين مكان غير المطعم ,, ونواف زوجك وبيحافظ عليك يا قلبي ,, يالله رووحي غيري جوو معه الله يسعدكم ,,,

ريما ما درت وش تسوي عقب كلام فيصل فأتصلت على لمياء تفزع لها ,, فأكدت كلام نواف وفيصل ,, عاااادي ياعمري انتي مع زوجك مو حرام

كملت ريما كلامها مع هيفاء ,, والليله يا قلبي بيمر علي وبنروح نتعشى برى ,,

ريما : مدري وشقول له يا هيفاء احس ما عرفت لنواف شكله شاااعري مررره ,, ,, ضحكت هيفاء عليها لأنها تعرف ريما وشخصيتها ,,

استانسي يا قلبي وراااح يتغير جوووك معه ,, مو هذا نواف اللي حشرتينا عليه ,,,

سكرت ريما وهيفاء ما زالت في حيرتها ,, ماتدري وين رااح فهد ,, كل هذا طفش منها ,,

مرت ثلاث ساعات ما سمعت صوت الباب ,, لامت نفسها انها تدخلت في خصوصياته ,, يمكن صحيح هو مو متعود حد يمسك اشيائه ,,

نزلت للمطبخ وحاولت تتذكر طريقة كيك حلووو كانت تحب تسويه مع نكهة الجزر ,, دخلتها الفرن وتركت الشغاله تنتبه لها ,,

جات ام طلال ,, وحصلتها متمدده على السرير ,, رجعت على ورى شوي عشان ما تحس فيها وتكمل نومتها ,,,

بعد كذا طلعت للحديقه ,, حاولت تأخذ شوي من الزهور اللي فيها وترتبها في فازا صغيره ,, يمكن تعطي البيت شكل ,,,

دخلت المطبخ ثاني وطلبت من الشغاله تجهز لها صينية القهوة وسوت لهم قهوة ولا صارت ,,, طلعت كيكتها في الصحن وزينتها في قالب مخصص لها ,, وخذتها الشغاله للصاله عشان تتقهوى منها ام طلال ,,,

طلعت هيفاء فوق وهي تمر من غرفة فهد ,, طالعتها وهي ماشيه ,, والله مو قصدي اتدخل ,,, يالله وش صار يعني ,,,

دخلت غرفتها اللي كل يوم تحبها اكثر وتحب الفتها ومكتبها الصغير ,, اللي يشاطر سهرتها كل ليله وو بتدوينها احرف منسوجه من مشاعرها المتضاربة ,,

استعدت مثل كل يوم وحاولت هالمره ما تجط مكياج ,,, اكتفت بالجلوس والماسكارا ,, لكنها غيرت روتين ملابسها ,,, ولبست لها فستان قصير له حزام من عند الخصر ,,, اظهر خبايا جمالها اكثر ,, رفعت شعرها على شكل ربطه دائريه وسوت لها بف صغير من عند الغره ونزلت خصل صغيره على الجبهة ,,, اول ما شافت شكلها في المرايه رضت مررره عليه ,, ما ناقص بس الا يجي فهد ويقدرني ربي واعتذر منه عشان اغراضه ,, وان ما رضى بالطقاق ,,

لبست لها صندل ناعم ,,, وعطرت الغرفة وحاولت تأخذ المبخره تبي تبخر البيت تحت بالعود ,,

وهي شايله المبخره في يدها ,, قابلت فهد في نص الطريق عند باب غرفته ,,

هيفاء : مساء الخير ,,

فهد : هلا وهو يبي يدخل غرفته ,,, وقفت تبي تشوف هل بيكمل كلامه معها والا بيدخل لكنها انصدمت منه وهو يسكر الباب ,, وقفت في مكانها وهي متسمره ,, نزلت البخور على الطاوله ودقت الباب بس فهد ما رد عليها ,, دقت ثاني ولا رد فتوقعت انه دخل لدورة المياة ,, حست انها اهليه شوي وتمون ,, فتحت الباب الا تشوف فهد لابس روبه ويبي يدخل ياخذ شاور ,,

فهد : الناس الذووق يدقون الباب !!! فهد ناوي يطفشها ,,

هيفاء : صدقت بس انا مو ذوووق ,,

فهد : طيب وش عندك ,,, وهو يطلع له ملابس وزهقان منها او يبين لها انه زهقان ,,,

هيفاء جت تبي تطلع الكلمات من فمها بس حست انها وقفت في حنجرتها مو راضيه تطلع ,, كنها بتصير عبره بس لا هي لازم تكون قويه ,,

لاحظت ان يدها تلعب في علبة المناديل جنبها على الطاولة وفهد يراقبها بأستكشاف ,,

تكلمت وهي تحاول ما تحط عينها في عينه ,,

هيفاء : انا كان قصدي بس اني اترك لك المكان مرتب عشان تحس براحتك فيه اذا جيت من الجامعه ,,

نزلت عيونها وهي تشبك يديها مع بعض بس جد انا اسفه ,,, ,, ورجعت على ورى تبي تطلع من الغرفه ,,,

اول ما فتحت الباب تبي تطلع سمعت فهد : بالعكس انا بعد ما شفت ترتيبك الحين ,, ودي كل يوم ترتبين ,,, التفتت له وهي طالعه شاف ابتسامتها العذبه ,,, ااااخ يا هيفاء بتجننيني ,,

في مكان ثاني بعيد جدا ,,, نواف وريما جالسين في اعلى مطعم يطل على الرياض من برج المملكة ,, الجو اقل ما يقال عنه شاعري ورومااانس كثيير ,,, نواف بيموت على ريما من اول كيف وهي قباله ,,,

نواف : تدرين لو ما جيتي كان زعلت عليك ,,

ريما وهي منزله عيونها في الصحن : ما تعودت اني اكلمك فشلون اطلع معك ,, غصب عني جاني احساس بالرفض ,,

نواف : اااه يا ريما تدرين اني اعد الليالي عشان يجمعني بك سقف واحد ,, انحرجت ريماا وخجلت منه مررره ,,,, صار وجهها الوان من الوردي والمشمش ,,

نواف : ما ابيك تستحين مني ,, ابيك تقولين لي انك تبيني مثل ما انا ابيك ,,

ريما حست بالاحراج يخنقها : نواف واللي يسلمك لا تحرجني عاد ,,,

نواف اجل لو تدرين وش في بالي ,,,

ريما وهي تقول في نفسها لا والله ما ودي اعرف ,, انت ناوي تذبحني كذاا ,, ياليتك يا نواف تدري وش كثر انحرج منك ,,,

طلب نواف العشاء ,, رفضت ريما انها تاكل غير الحلووو مع الكابتشينو ,, ونواف ما حط يده في الاكل ,,, كان شوفة ريما وعيونها الحلوة اشبعته عن كل غذاء ,,,

لما خلصت قهوتها ,, قالت له : نواف ودي ارجع البيت اذا ما عندك مانع ,,

نواف وهو يطالعها حط يده على خشمه : على خشمي ,,,

ريما : تسلم ,,,

قامت ريما وهي تحس عظامها تيبست من الكرسي اللي طول الوقت وهي شاااده نفسها عشان ما ترتبك او تغلط في اي شي كنها في اختبار ,,,

خذ نواف شنطتها وناولها لها حست ريما انه ذوووق ,,,اول ما نزلوا للسياره فتح لها نواف الباب وسكرته هي بنفسها ,, ما تدري ليش ما ودها انه يدلعها كذا لانه خافت انه يحبها اكثر مما تحبه , وهي ما في مجال تبين له اي شي الحين ,, ودها لما تكون زوجته في بيت تكشف له عن كل مشاعرها ,,,

شغل نواف السي دي ,, وترك للشعر الكلمة الاولى عشان تعبر عن اللي في قلبه لريما ,,, ومن قصيده للثانيه ,, لكن ريما ركزت انه غير طريق القصر ,,

قالت له ريما : نواف وين بتروح ,,

نواف : لا تخافين ما راح اخطفك بس بلف بك شوي ,, ما ودي اخليك تروحين ولو على كيفي اني اسهر معك للفجر ,,,

ريما متوتره وما خذت راحتها : بس انا قلت لفيصل ما راح اتأخر ,,

نواف : ممكن تنسين فيصل الحين ,, حست ريما صدق انها طفشته وما عطته على اللي يبي ,,

سكر نواف السي دي ,, وقعد يدور بالسياره في صمت توقع يمكن تقول له ,, حس منها ببرود ,,

نواف كان وده يسمع منها شي كثييير على الاقل تبين له شوقها ,

وفي الأخير دخل للقصر وخذ لفه لحد ما وصل لفيلا خاله طلال لكنه وقف على جنب الفيلا ,,

ريما التفتت له ,, نواف : ودي اشكرك على الطلعه ,, ادري تتوقع مني اكثر من كذا ,, بس ابيك تعذرني ترى ما تعودت ,,

نواف ما سمح لها تكمل وباسها في خدها وهمس في اذنها : الله يصبرني يا قلبي ,,,

نزلت ريما وهي مستحيه منه ,, مسك يدها قبل تنزل ,, لحظه ,, وفتح صندوق السياره وطلع من علبه صغيره ,,

ابيك تلبسينها في يدك ,, وفتح العلبه وتشوف سلسال يد روووعه بحرفه وحرفها في اخره ,,, وفي نصه قلوب صغيره بالالماس ,,,

ريما من عيوني

نزلت وهي تشوف ان نواف عبر لها عن شوقه بشكل ما توقعت منه ,, توقعت يستحي منها او ينحرج اذا شافها منحرجه لكن اخر شي اللي شافته ,,, واكتشفت ان نواف يملك قلب عاشق ,, وجهزت نفسها للأيام القادمه ,,, مو معقوله تبادله مشاعره بمواضيع تسد النفس ,,,

دخلت ريما وعلى طول ارسلت مسج لفيصل (( انا رجعت يا عمري )) تبي فيصل يرتاح ,, وخصوصا انه موصيها ,,

دخلت وبدلت ملابسها ,, وقعدت تتأمل السلسال في يدها ,,, هذا اللي تتمناه من اول انه يكون في نواف ,, انه يحب الاشياء اللي تعبر عن مشاعرها سواء بحرف او كلمه او هديه بسيطه المهم لها معنى عنده ,,,اول ما حطت رساها على المخده بتنام ,, جاه اتصال من نواف رفعت الخط وسمعت نواف : ما قدرت انام يا قلبي ابي اسمع صوتك ,,,,,,,,

ام طلال وهيفاء يتقاسمون صحن الكيك الصغير بينهم وهيفاء تصب قهوة على جدتها ,,,

ام طلال : وش هالزين اليوم ,, الفستان عليك يهبل ,,,

هيفاء : فديتك يمه ما احلى كلامك ,,,

ام طلال : انا اقول الصدق ,,, ما قال لك فهد شي ,, مو معقوله بيسكت ,, اخبر فهد يحب الزين ويستمتع فيه ,,,

هيفاء: لا ما قال !!!

فهد وهو داخل عليهم : اللي اشوفه ان هيفاء مانيكان حلووووه ما ودك تشيل عينك منها ,,,

هيفاء تسمع فهد وهي تحاول تضبط نفسها عشان ما يبين انها مطفوقه على كلامه صحيح : تسلم ,,,

فهد : شكلكم قضيتوا على الكيكة ونسيتوني ,,,

ام طلال : لا من جدك ,, هيفاء سوت الكيكه ذي عشانك مخصوص,,, ام طلال تزيد من عندها تبي تقرب بينهم

فهد وهو يتأملها بفستانها المغري

فهد : دامه كذا وهيفاء بنفسها طابخه عشاني امشوا بطلعكم تتعشون برى

ام طلال : الساعه 10 مافي طلعه في ذا الليل ,, خلها بكره بدري ,,,,

فهد : عادي الليله ويكند امشوا يالله بنروح مطعم مغربي ,,,

هيفاء ودها تطلع بس شافت الوقت متأخر ,,, فهد خلها وقت ثاني ,,

فهد :كيفكم ,,,

قعدوا يشوفون التلفزيون ,, ساعه تقريبا ويتخللها سوالف من ام طلال وفهد لحد الحين هيفاء ما بينها وبين فهد سالفه على بعضها ,, يا اوامر يا طلبات يا مطاق ,, ما به شي يفتح النفس عيونهم تكلم اكثر منهم ,,,

قامت ام طلال تبي تروح دارها ,, فقامت معها هيفاء لكن ام طلال نادت الشغاله ,,

ام طلال : لا خليك مع فهد انا عندي شغل داخل ,,,

هيفاء عارفه حركات جدتها احيانا ودها تشكر جدتها على الحركات ذي لانها تخفف عنها بداية الحديث مع فهد ,,

فهد وهو متعمد ينظر لها نظره متفحصه : ذوووقك حلوو في اللبس ,, من متى عندك الموهبة ذي ,,

هيفاء ابتسمت ..: مو اي شي يعجبني ,, احب البس شي اجد فيه نفسي مو تكملة عدد بس ,,

فهد : طيب ااختيارك على خط ازياء معين او مصمم واحد والا وشو ,,,

هيفاء وهي داخله جو الحديث معه : مو شرط انا اشوف القطعه سواء غاليه او متوسطه المهم لونها يعجبني وديزاينها خلاص اشتريها ,,,

فهد وهو يقوم : انا بطلع عندي بحث ,, تسمحين لي ,,,

هيفاء حست بحزن ان السالفه وقفت بينهم : اي اكيد خذ راحتك ,,,

طلع للطابق الاعلى وهو يحمد ربه انه ما تهور قدام لمياء ,, هو عزم انها تجيه بنفسها عشان تقتنع انها تبيه مو فارض نفسه عليها ,,,

قعدت هيفاء في كرسيها شوي وهي تحس انها وحيده في ذا العالم دامها ما صارحت فهد وتعاهدت معه على كل شي بتبقى بعيده منه ,,

ما تدري ليه تغيرت مشاعرها اكثر من يوم صلوا حست قلبه عليها يمكن ا تكلم كثير بس تشوفه بحركاته ,,,

اطفت النور ,, وطلعت غرفتها ,,,

بدلت ملا بسها ,, ولبست بيجاما رمادي شكلها رهيب عليها ,,, كمها طويل بس شاد شوي ,, وما فيها اي درجه ثانيه ,, دخلت في فراشها تبي تنام ومسكت لها كتاب تبي تشغل نفسها ,,,

بعد ساعه او اكثر شوي ,, لا جاها نوم وحاسه بطفش ,, نزلت للمطبخ تبي تسوي لها شاي يعدل مزاجها شوي ,, بغت تغير ملا بسها بس شافت الوقت متأخر واكيد فهد قد نام وراه جامعه ,,,

اول ما دخلت شافت فهد قاعد على طاولة المطبخ وهو يأكل توست ,, رفع عينه فيها ,,

فهد : جوعانه ,,,

هيفاء : لا بغيت شاي ,, بس خلاص ما في داعي وترجع على ورى حست بفشيله منه وهي ببجامتها وطلعت فوق بسرعه البرق ,,, دخلت في فراشها وهي قلبها يدق بسرعه ,,, متى بتعودين على فهد يا هيفاء ,,, مو بعبع هذا زوجك ,,,

بعد ربع ساعه ,,, فتح فهد الباب بدون ما يدق ,,ومعاه كاس شاي ,,

قعدت هيفاء على دخلته : ما كان في داعي تسوي شاي ,,

فهد : كم هيفاء عندي ,, بس وحده ,,, وواقفه قدامي ,, واعتقد اني راح اكون اغبى واحد اذا ,,, ما كمل

ويقرب منها شوي ويمسك يديها ,,ويطالع عيونها ... اذا ما خدمتها !!!!

هيفاء : تسلم ما قصرت ,, وهي تحاول تكون صامده قدام كلماته ,, فهد صاير اسلوبه رقيق معها مره ,, لدرجه ممكن تسقط كل اقنعتها الحصينه قدامه ,, وهي عارفه هالشي اليوم والا بكره هي بتضعف قدامه ,, بس تمنت انها عنده شجاعه تكفيها انها تقول لفهد كل اللي يضايقها منه ,,,

طلع فهد فجأه مثل ما دخل فجأه,,,وترك هيفاء مثل الورقة الخضراء اللي تصارع المطر في يوم ممطر ومتمسكه بالغصن قد ما تقدر قدام هالرياح القويه ,, وشافت هيفاء نفسها قدام حضور فهد وجاذبيته ورجولته الطاغية على حنانه ورقته معها مثل هالورقه ما تبي تسقط في احضان الشجره,,,

اما فهد قعد يشوف بحثه وهو ما يقرأ الا اول سطر ثم يرجع يعيده يتذكر شكل هيفاء اول ما دخلت المطبخ ,, فيها براءة بتذبحني ,,,

اااخ يا هيفاء لولا اني ما جرحتك مره ,, والا والله ما كان اعتقك الليله ,,, ونام وهو يتمنى من هيفاء ,, تحس به وبمشاعره تجاهها ,,,

من الصباح بدري ثاني يوم ,,, طلع فهد للجامعه ,, وهيفاء قعدت مع ام طلال في الحديقه يتمشون فيها ,, صحيح صغيره بس روووعه باشجارها وزهورها الملونه ,,

هيفاء : يمه وش رايك نطلع شوي نروح للسوق والا نطلع اي مكن نتمشى ,, فهد ما راح يجي الا اخر النهار ,, بيضيع وقتنا في الانتظار ,,

ام طلال : يالله امشي ,, توكلي على الله ,,,

طلبت لهم تاكسي ,, يوديهم للسنتر في وسط المدينه ,, قرت عنه في الدليل السياحي للمدينه ,,

ام طلال كانت لابسه قطيفه وفوقها شال وطرحتها المميزة ,, وهيفاء لابسه عبايتها ,, وحاطه نظاره ولثمه ويتمشون في السوق ,,

هيفاء تسند لجدتها بيدها وام طلال تمسك العصا بيدها الثانية ,, كان مشيهم براحتهم مجرد تقضية وقت ,,,

وهما واقفين امام فاترينا محل كبير للشوكلاته ,, طلع جروب من الشباب مع بعض من اولاد وبنات ,, وفهد كان معهم ,, اول ما شاف جدته وقف لها ورفع نظارته على شعره ,, هيفاء تشوف المجموعه اللي معاه ,, مشالله فالينها هالشباب وناسه وتمشيه ,, وانا بغبائي فكرته بالجامعه ,,, وعينها على البنات ,,

فهد : هلا متى امداكم تطلعون ,,

ام طلال : عقبك بشوي قلنا نغير جوو وهيفاء ساكته ودها تتوطى في بطنها هذا الشعور اللي جاها ,, سمعت هيفاء صوت بنت تقول : فهد اكيد هاذي جدتك اللي تحكي عنها ,,

فهد وهو يلتفت للبنت : ما شالله عليك ايوا هي ,,,

البنت وهي تصافحها : هلا بيك يمه ,, انا ساره ,,,

هيفاء كن حد صفقها هالبنت فالتها مره بالشعر والجينز الضيق وفررري ,,,

ام طلال : الله يحيك ,,

فهد وهو يتدارك : وهاذي زوجتي هيفاء ,

ساره : اهلا ,, بصراحه ما قد سمعنا فهد يطري انه متزوج بالصدفه عرفنا ,, شكلك يا فهد ودك تكون عزوبي على طول ,,,

هيفاء ما ردت عليها بحرف خلتها هي والجدار واحد ,, تحركت شوي تبي جدتها تتحرك ,,

هيفاء : ما نعطلكم حنا ورانا مشوار ,,

كملت الطريق الطويل اللي قدامها وهي ما تشوف الا وجوه ناس يتحركون مثل الريموت ,, ما تدري بهم الا انهم يتحركون وبس نست الوقت والزمن والمكان ,,, وشافت بس فهد ,, اكيد مبسوط مع شلته ,,, الله يهنيه ,,

رجعوا البيت بعد الحاح ام طلال ,, هي عارفه ان هيفاء مو معها ,, وانصدمت بشوفة الطالبات مع فهد ,, وهالعلة ام لسان ,, شكلها مطيحه الميانه مع فهد ,, وش معنى محد من الجروب جاء يمنا وكلمنا بس هي ,, وهي اللي متصله على البيت ,, وما خفي كان اعظم ,,,

دخلوا البيت ,, واستئذنت من جدتها تطلع لغرفتها ,, دخلت وهي تحس بالعجز التااام ,, رمت نفسها على السرير وهي بعابيتها وما حست ابد الا وفهد يحاول يشيل عبايتها,, تحركت تبي تشوف وش فيه ,,

فهد : انتي ليه نايمه كذا ,,,

هيفاء وهي معصبة عليه مرره ,, كيفي انام بالشكل اللي ابيه ,,

فهد ما استغرب ردة فعلها قده عارفها ,, وتحاول تفك يده منها ما تبي اي شي منه ,, خله يروح ينبسط مع صديقاته ,,,

هيفاء : روح انبسط مع صديقاتك لا ومخبي عنهم انك متزوج بعد ,,

فهد : اذا صرتي زوجه اقدر ارفع راسي عند الناس وافتخر انك زوجتي قدامهم واخاف عليك وتخافين علي ,,,قلت لهم ذيك الساعه اني متزوج

اما حياه بذا الشكل ,, في ذمتك تسمينه زواج ذا ,,

هيفاء : انا مو اللي طلقت وزعلت وبعدت وفارقت ,,,

انا يا فهد بنت يتيمه لا اخ ولا اب ,, اذا بتحفظني وبتشيل عني همي وتفتخر اني زوجتك ,, ذيك اللحظه اعرف اني رضيت من قلبي عليك ,, ولفت على جنبها وهي تصيح وتلحفت بالحافها وسط ذهول فهد من البركان اللي انفجر ,,,,,,